Read Lautu Chin 1 Johan 3 Bible Online

1 Johan 3 - Lautu Chin bible

1 Johan 3

¹Khazing ta khatluv tama malie a due tapa hing pacuo tie ung. Khazing saata tapata kupa ma cuo; ma cuo hmisi saw. Chuelyi ta kiema malie a pachang li pahing Khazing kha a pachang li nakawtana a cuo.

²Duepa zaw, ata hing kiema ca Khazing saata ta ma cuo ung; Hmie luo khaama ma lu aa tapa ca pachang valie puv. Ma pachangpa ca: Khrih aa luo thueta, kiema ca ama kha lu'a pate a cuona dadang haakhata ma hmung aa.

³Ama'a lieta capa anguopuona a hnyipa bangkhuo ca Khrih a pathepa haakhata iema hne iema kha amaa pathe sa ra.

⁴Suena a tuepa bangkhuo ca Khazing phungbie a parapa tana ama cuo; suena ca Khazing phungbie parana khatana a cuo.

⁵Khrih ca cawsaa suena pathe sa riypatana a vaw tapa kha pachang ung cate, ama'a lieca suena aw vyi tapa kha nama pachang.

⁶Khrih chunglie a awpa ahungtahmuo suena tue va tli yi; suena a tuepazuepa ahunghmuota Khrih kha a hmungpa hne a pachangpa aw vayi.

⁷I saata zaw, ahunghmuo a padung sa kha ung. Khrih ca aa dangpa a cuopa haakhata aa dangpa hmang a tuepa bangkhuo ca aa dangpa ama cuo.

⁸Suena a tuepa bangkhuo ca Setaa saata ta ama cuo; tahematapakieca Setaa ca a hruothu baataata suena a tuepa tana a cuo. Khazing Saacapaa aa luona ca Setaa rehriena para riypatana a cuo.

⁹Khazing'a taata a puvpa ca suena kha tue vayi, tahematapakieca Khazing saciy kha ama chunglie aw te, sue khu vayi, tahematapakieca Khazing'a taata a puvpa ama cuo nakawtana a cuo.

¹⁰Khazing saata a cuopa hne Setaa saata a cuopa ca cahaa cata a hnang yite; hmangphapa a tue lipa bangkhuo ca Khazing'a taata cuo vayi, a uvnu a due lipa zaw cuo ra vayi.

¹¹A hruothu taata nama za thyipa bie ca: pakha hne pakha a due ungla tapata a cuo.

¹²Setaa'a taata a vawpa Kain, a nuta a thiepa haata ma cuo riypata cuo vyi. Khaapanakawma a nuta ca a thie? Tahematapakieca a hmang tuepa kha a dang li pata a nuta hmang tuepa kha a dang nakawta a cuo.

¹³Uvnu hne sieta zaw[5] chuelyi ta aca hue tiy yi ta nama kharue haa kha se.

¹⁴Tahematapakieca pakha hne pakha maa due nakawta thiyna taata hringna luo ma caluo tli tapa kha ma pachang ung.

¹⁵A uvnu hne a sieta a huepa bangkhuo ca lie a nawpa tana ama cuo, lie a nawpa ca chuozaa hringna hnyi vayi tapa kha nama pachang.

¹⁶Abyipa ta kiema cuota a hringna a pi nakawta duena tapa kha ma pachang. Kiema zaw pakha hne pakha cuota ma hringna maa pi riypatana a cuo.

¹⁷Pakhakha ca hnyirungsa te a uvnu a cuo li kie a sieta zaw ama siy a pasasa pakha a hmung thluo pata aa bya khing li kie yi ca Khazing duena ca a chunglie tuokhaatama a aw the aa?

¹⁸I saata zaw, ryi hne kaa dyi ta cuo li pata biehmisipa hne tuena ta a due'a ungpuv.

¹⁹Cahaa cata kiema ca biehmisipa taata ma cuopa kha pachang'a pate, ma pathiypalung ta sue malie a phaw kyry ta kiema ca biehmisipa taata ma cuopa kha a pachang'a pate ama hmielie ma hnaa a nguo aa.

²⁰Tahematapakieca Khazing ca ma pathiypalung laata lesyi vie te hmangting bangkhuo kha a pachang.

²¹I duepa zaw, ma pathiypalung na sue malie a phaw va tapa kieca; Khazing hmielie riephana ma hnyi.

²²Tahematapakieca a nawbie kha ziy pate ama palung ma patluo nakawta ma hiepa bangkhuo kha ma hmung.

²³Abyipa nawbie ca, ama bie malie a pipa haata, a Saacapaa Zingsuv Khrih kha zang pata pakha hne pakha a due riypa khatana a cuo.

²⁴A nawbie a ziypa bangkhuo ca ama chunglie aw yite ama zaw iema chunglie a aw. Canakaw cata kiema chunglie ama a awpa kha malie a pipa a Thlaapa thueta ma pachang.