Read Lautu Chin 2 Johan 1 Bible Online

2 Johan 1 - Lautu Chin bible

2 Johan 1

¹Khrihsaa uvthyi ta, Biehmisipa chunglie ta i duepa, a tlawpa nungcuo hne a saata zaw kha caa ica paphya yi. Kama dyi ta ica duepa yi cuo li pata biehmisipa a pachangpa bangkhuo ta aca due yi,

²tahematapakieca ma chunglie a awpa hne chuozaa ta a aw riypa biehmisipa nakawta a cuo.

³Paa Khazing hne Paa Khazing Saacapaa Zingsuv Khrih'[1]a taata vihnyina, nangduena hne diena ca biehmisipa hne duena chunglie kiema'a lie aw mangsue.

⁴Paa ta malie a changpa haata na saata zaw chekha na biehmisipa lie a hring yi tapa i hmung tiyta i palung a tluo hringhruo.

⁵Cacuonakawta duepa nung, pakha hne pakha a due ungsiy tapata paa ica kie. Hinghing nawbie thaapa i vya cape pata cuo vyi, a hruothu taata ma za hnyipa khatana a cuo.

⁶Duena ma tapa ca a nawbie ziy pata hringpa hingna a cuo. Capa a nawbie ca nama ziy aa tapata a hluo baataata nama za thyipa khatana a cuo.

⁷Zingsuv ca thiysaa tana a vaw tapa a paw lipa dungvietuv hluvpuv kha chuelyi luo ama vya pya tli. Cahaapaapa cawsaa bangkhuo ca dungvietuv hne Khrih a dutuv tana ama cuo.

⁸Ma[2] hrie hnuochuopa kha namaa sung li riypa hne nama lawmuo kha a tlingsa pata nama hmung riypata a raaring pata aw tie ung.

⁹Khrih pacuvna chunglie aw li pata a hlyi ta kuorakuo hliy te a hringpa ca Khazing kha hnyi vyi. Pacuvna chunglie a awpa bangkhuo ca Paa hne Saacapaa kha a hnyi.

¹⁰Capa pacuvna a cyi li pata niema'a luo a vawpa ahunghmuo ing chung luo pangie kha ung; bie zaw a chang kha ung.

¹¹Tahematapakieca iema kha bie a changpa ca hmangpha lipa ama tuepa lie khana namaa hraw ra tanata a cuo.

¹²Niema'a luo cape riypa a hluvpuv i hnyi raalaa pata caahnaa hne caatiy ca hmuo'a va ang. Maa lawna aa kyna riypata niema'a luo a vaw'a ang te hmie a hmung pata bie maa rue'a ung tapata i hnabie a syi.

¹³A tlawpa na nutanung a saata zaw ta bie acaa chang yi.[3]