Read Lautu Chin 3 Johan 1 Bible Online

3 Johan 1 - Lautu Chin bible

3 Johan 1

¹Khrihsaa Uvthyi kama ta bie-hmisipa lieta i duepa Gaius'a luo caa ica paphya.

²I duepa, thlaapa luota hnaatluo pata na aw pahaata hmangting bangkhuo hing na cuota aa rawsa pata aw sala, na hnaa a tluo riypata thlaa ica chuopa.

³Viesaa[1] chekha vya chiy yite biehmisipa lie zangtluo naa tlana zya hne biehmisipa lie na hringna zya kha tehte ama khuo tiyta i palung a tluo hringhruo.

⁴I saata zaw na biehmisipa lie a hring yi tapa i thyipa laa hingta i palung naa patluo viepa aw vyi.

⁵I duepa, caa pachang buo lipa ama cuo zaw ta, viesaa cuota a cuo zaw, na hriepa bangkhuo lie zangtluo a tlasa pata na hrie.

⁶Na duena kaw kha khrihsaabuv lie tehte ama khuo. Khazing hne aa tlapa palungphya hnyi pata ama si khu riypa kha a bya tie yi.

⁷Tahematapakieca zanglituv[2] tie'a taata abyana khaahmuo la li pata Khrih cuota khy a tlawpa ta ama cuo.

⁸Cacuonakawta biehmisipa lie rehriehnetuv ma cuo riypata cahaapa cawsaa zaw kha maa bya riypa yita a cuo.

⁹Khrihsaabuv'a luo kha caa pachangta i cape; cuorasala ama hne ama kha pakhana lie a chi khingpa Diotrefes ta kiema ri kha a ngie khing vyi.

¹⁰Cacuonakawta i vaw kieca a cuo li pata kiema kaw a ripa bangkhuo kha i phu diy aa. Cadyi cata a palung tling li pata uvnu zaw kha ing a patlung sa khing li pata ing a patlung sa khingpa tie zaw kha thlu yite khrihsaabuv taata a papya yi.

¹¹I duepa zaw, a pha lipa kha a mangpuo kha ung, a phapa tuv kha a mangpuo tie ung. Hmangpha a tuepa ca Khazing'a taata cuote, hmangpha lipa a tuepa ca Khazing kha hmung vyi.

¹²Cawsaa bangkhuo ta Demetrias ca pathuo sa yite biehmisipa zaw ta a pathuo sa. Kiema zaw ta a cuo ta tehtekhuo pate ma tehtekhuona aa hmuo pakha nama pachang.

¹³Niema'a luo caa a hluvsa i vya cape khing, cuorasala caasung hne caatiy hmuo pata cape hriy li pata;

¹⁴niema hne a ru hluo ta hmie a hmung pata bie maa rue aa tapata i nguopuo.

¹⁵Na cunglie diena aw se. Viesaa zaw ta bie a caa chang yi. Ma viesaa zaw pakha cyicuo kha bie malie a changpa mya yi.