Read Lautu Chin Judas 1 Bible Online

Judas 1 - Lautu Chin bible

Judas 1

¹Zingsuv Khrih changtaapa[1] hne Jeim nuta ta a cuopa Judas ta, Khazing kupa, Paa Khazing ta a duepa hne Zingsuv Khrih mangsangna chunglie a awpa tie kha caa ica paphya yi.

²Nangduena diena hne duena ca niema'a lie a kysa pata aw mangsue.

³Duepa zaw, ma bangkhuo ta maa hrawpa khuona kaw hing niema'a luo cape riypata palung thusa pata i ting nguoluo ningta cawsaa pathepa tie'a luo yikha ta a tling pata a pipa yi zangna hing namaa daakhyi riypata paakie namaa hu hrahring tapata i hmung.

⁴Tahematapakieca ma Khazing vihnyina kha a palipahnaa ta tue yite siyhrawna ta a hmuopa tie, pakha dyipa ma Ziypaapa hne Abyipa Zingsuv Khrih a thawpa tie ca niema hraw luo kha a paruvta tah amaa ngie tli. Iema ca Khazing a zang lipa ama cuona haata duotena ang riypata hluo ning taata thli paciepa tie tana ama cuo.

⁵Abyipa ca Israel ming kha Izipt ruo chung taata khuo yite cakhutaata a zang lipa tie a parapa yi kha ica chang diy tli raalaa pa yi ta ica pachang sa pakhaa khing yi.

⁶Ama nawhnyi khuna te chunglie aw li pata aa rawpusapa amaa daahmang a thusepa avuoming kha bierina Ning rungnaapa cuo thue huopa ta aa thuvcepa zingna chunglie kha chuozaa thaabuoliriy ta a hre yi.

⁷Cahaa cata, Sodom hne Gomorrah hne a kiecahriy khypuv zaw kha iema palungphya ca hnyi yite, aparuvsuena tue yite a phung lipa saapa khingna ama hnyi nakawta chuozaa myi chunglie duotena ama angpa ca cawsaa bangkhuo a cadangna riypatana a cuo.

⁸Cahaa cata, hingpa muo a sa thepa tie zaw hingta ama pangpasaa kha papyapalyi yite, nawhnyina kha ama i khu taata a rungnaapa tie thuo kha ama pachi.

⁹Cuorasala avuoming byi Mikhael ca Moses riy kawlie setaa hne bie amaa i ning kha chiesana biechiepa risue nguo li pata, “Abyipa na caa chuo aa!” a ta.

¹⁰Cuorasala hingpa cawsaa zaw hingta ca ama pachang lipa bangkhuo kha ripachie yite capa amaa puvkhyipa pachangna cata iema kha ruena a hnyi lipa saruopa haata a para yi.

¹¹Iema ca thluechiylipa tana ama cuo. Tahematapakieca iema ca Kain luopuv kha ziy yite, tuokaa vuota Balaam a sichiena luo kha ama si ra. Korah aduna luo lie kha ama ra.

¹²Iema ca niema hneta pyi luo ama chiy ning kha kuochi li pata a nuo yite ama ningdang nakawta nama duena pyi zaw a papyapalyipa tana ama cuo. Iema ca thliy ta a phyalepa khytiy a vyi lipa amyi, a thariy te ama phiepuo nakawta yihning a thiypa a thyi a pathyi lipa thlasiypaa thingkung haatana ama cuo.

¹³A nangzaanapa buv a papyapa riyliy tiylaw, hne a zulepa aasiy haata cuo yite, aa thuvcepa zingna kha iema cuota chuozaa ta chipa patana ama cuo.

¹⁴Adam taata chuosariynapa Enok ta hingpa kaw hing a za rilupa ca, “Mang tie ung, Abyipa ca a mingpathepa thawhraa hneta a vaw te,

¹⁵cawsaa bangkhuo kha bie a ripa'a yi. Khazing ciyzaa li pata cawsaa ta ama tuepa hmang bangkhuo cuo hne Khazing a ciyzaa lipa a suepa tie ta ama a du pata ama ripa bie bangkhuo cuota bie a chipa'a yi.

¹⁶Iema ca a cie thepa tie hne malie suena a huv thepa tie, iema saapa khingna a ziypa tie; a bietung lepa tie, iema phana cuota malie a patapa tie tana ama cuo.

¹⁷Cuorasala, i duepa zaw, ma Byi-paapa Zingsuv Khrih a ziytuv tie ta ama za rilupa kha maw lie ungciy;

¹⁸Iema ta, “Ning chuonapa cuo thue ca malie a ese hyalyapa tie hne Khazing ciyzaa li pata iema saapa khingna a ziypa tie amaa vya luo aa.

¹⁹Thlaapa a hnyi lipa capa chuelyi cawsaa zaw cata a chena ama chiykhyi aa.

²⁰Cuorasala i duepa niema zaw taca a pathecepa nama zangna lie kha a sathaw ungla, Thlaapa Pathe'a lie kha thlaa chuo tie ung.

²¹Khazing duena chunglie kha aw ungla, chuozaa hringna luo malie a chiypa ma Byipaapa Zingsuv Khrih nangduena kha a mangkhuo tie ung.

²²Asawdung-avadung ta a awpa tie cunglie kha nangduena hnyi ungla,

²³iema kha myi chung taata thue ungla khuo tie ung. Ciyzaana cangta malie kha nangdue ungla, cadyiseca ama saapa khingna ta aa hlawpa ama cawsie khaca hue tie ung.

²⁴A lie li pata caa pa-aw sa khutuv hne a hmiekunglie caw-yi riy khaa-hmuo aw li pata palung tluosa pata caa padaa sa khutuv yi,

²⁵maa khuotuv Khazing pakha dyipa cunglie, rungnaana, lesyina, cahrana, hne nawhnyina ca ma Byipaapa Zingsuv Khrih thueta, a chuo ciepa cuo hne ata hing hne hmie luo chuozaa ta aw mangsue. Amen.