Read Lautu Chin Biephu 1 Bible Online

Biephu 1 - Lautu Chin bible

Biephu 1

¹“Hingpa hing Zingsuv Khrih biephu tana a cuo. A ru hluo ta a vya cuo riypa biephu kha a changtaapa[1] tie'a luo pahmung sa riypata Khazing ta a pipa tana a cuo. A changtaapa Johan'a luo kha aa vuoming pathlie yite a pachang sapa yi ta a cuo.

²Johan ca Khazing bie hne Zingsuv Khrih kaw a hmungpa bangkhuo kha a chang yi.

³Hingpa profet-biephu hing aa thyisa pata a ripa hne ama ripa kha thyi te a chunglie aa capepa haata a ziypa ca thluechiypa tana ama cuo; tahematapakieca cuo na a ngie tli.

⁴Asia ruo chunglie a awpa Khrihsaabuv suosariy tie'a luo kha kama Johan ta caa ica paphya yi: A aw nguoluopa, zaa aw tlipa hne a vya aw riypa Khazing'a taata cuose, byithude hmielie a awpa thlaapa suosariy'a taata cuose,

⁵zangtluo aa tlapa pachaangkhyituv, thiyna taata a thupa tie hrawlie saacapaa taapa, hne chuelyi siepahruo tie siepahruo ta a cuopa Zingsuv Khrih'a taata vihnyina hne diena ca nama cunglie aw mangsue. Malie due te a thiyse ta ma suena chung taata malie a khuopa,

⁶kiema kha pena ruo suokha cuo riypata malie tue te tluobyi ta malie a tuetuv Paa Khazing cunglie ca rungnaana hne nawhnyina chuozaa ta aw mangsue. Amen.

⁷Mang tie ung! Ama ca amyi hne khiy ta a zuv'a te; cawsaa bangkhuo ta ama hmung aa, asyi ta a dawpa tie zaw khata hmung'a yite; chuelyi mingphang zaw bangkhuo ca ama kawlieta ama caa aa. Cahaa cata a cuo hrahring aa. Amen.

⁸A aw nguoluopa, zaa aw tlipa hne a vya aw riypa A Lesyicepa Abyipa Khazing ta, “Kama ca Alfa hne Omega tana i cuo,” a ta.

⁹Hrisaathieruena hne a pena hne palung pasiysa pata nama anglawna lie zaw Zingsuv ziytuv cuona taata a hraw rapa nama uvnupa kama Johan ca Khazing bie hne Zingsuv kaw tehte i khuona kawlieta Patmos parala lie ina chi yi.

¹⁰Abyipa Ning ningtakha thlaapa ta bi ang te, i hnangkaa taata hmyakaa haata ueryi a paringsapa thyi ang te,

¹¹“Na hmungpa kha caa-uv chunglie cape la Efesa, Smyrna, Pergamum, Thiatira, Sardis, Filadelfia hne Laodisia khy lie a awpa khrihsaabuv suosariy luo kha paphya tie,” ina ta.

¹²Cakhutaacata a ueryi ta bie naa changpa kha hmung riypata i pali tiyta siyymyivuonatung suosariy kha i hmung.

¹³Capa siyymyivuonatung tie aa lala lieca a cacunghnaa lie siyy tesaw a saw te buohryipasiypa a hryipa Cawsaa Saacapaa hne aa lupa pakha kha i hmung.

¹⁴A luv hne a suo ca tuvhming haata ruo te cahue haata a ngu; a ming ca myihlaa hneta amaa lu.

¹⁵A phyi ca sumyi chunglie ama rue khu taata aa li dyi aa li nate ta ama hnapa thiyhring hneta aa lu. A ueryi ca tiysue lesapa pu hneta aa lu.

¹⁶A cacuo luo kuv lie aasiy suosariy a cyi te, a pakaa taata kuo hning ta a cahrepa zueziy a kya pya. A hmie ca ningchungkhingkhuo ningkhepa haata a khe.

¹⁷Ama i hmung pahne ta kama ca a thiypa haata a phyi thabaw lie i liepatyi. Cuorasala a cacuo luo kuv kha i cunglie chi te, “Ciy kha; kama ca a hmietaace hne a hnangcawce tana i cuo.

¹⁸A hringpa zaw ta i cuo. I za thiy, cuorasala mang tie, chuozaa ta i hring tli. Cakhutaa Thiyna hne Athiykhy tawh zaw kha i hnyi.

¹⁹Na hmungpa hmang, a cuo nguoluopa hne a vya cuo riypa hmang kaw zaw kha cape tie.

²⁰I cacuo luo kuv lie na hmungpa aasiy suosariy hne siyymyivuonatung suosariy tie ta ama ri khingpa bieparuv ca hinghaahingtana a cuo: aasiy suosariy ca khrihsaabuv suosariy tie avuoming cuo yite, siyymyivuonatung suosariy ca khrihsaabuv suosariy ta ama cuo.