Read Lautu Chin Biephu 10 Bible Online

Biephu 10 - Lautu Chin bible

Biephu 10

¹Cakhutaata vuoruo taata a thaaruvsapa avuoming pakha a za cung pakha i hmung. Ama ca amyi ta pahlaw te a luv cunglie buvtuvruoriy a aw; a hmie ca ning haata cuote, a phyi ca myitung haata a cuo.

²Ama ta caataw cawta pake ciepa kha a kuv lie aa cyi. A cacuo luo phyi kha riyliy lie cuose, a cavyi luo phyi kha alyi lie cuose chaa te

³chingde aa hrungpa haakhata khuopuv ta a khi. Ama a khi tiyta khalung suo sariy aa thy.

⁴Khalung suo sariy aa thy tiyta caa cape kha i nang. Cuorasala vuoruo taata ueryi suokha thyi ang te, “Khalung suo sariy aa thy pata a ripa kha cape li pata caakhe la chicaw tie,” ina ta.

⁵Cakhutaaca riyliy lie hne alyi lie a daa pata i hmungpa avuoming khata a cacuo luo kuv kha avuo luo pazuu te,

⁶avuo hne a chunglie a awpa, riyliy hne a chunglie a awpa, chuozaa ta chuozaa te a hringpa ming ta chie aa sapa ca, “Ru'a va tli,

⁷cuorasala a pasariynapa avuoming ta a hmyakaa a tung ningpa ca ama ta a changtaapa[10] profet tie'a luo a za pathyi ciepa Khazing bieparuv kha a tling aa.”

⁸Cakhutaata vuoruo taata i za thyipa ueryi khata kama'a lie a ri pakhaapa ca, “Vaa la, riyliy lie hne alyi lie a daapa avuoming kuv lieta pake ciepa caataw kha va la tie,” ina ta.

⁹Cacuonakawta avuoming'a luo kha vaa ang te, caataw cawta kha na pi tie, i ta ca, “A la lah ning tie; na pavaw chunglie kha a kha raalaa'a pata, na pakaa lieca khyitiy haatana a thlung aa,” ina ta.

¹⁰Cacuonakawta caataw taata kha avuoming kuv taaca la ang te i ning ca i pakaa lie kha khyitiy haata a thlung. Cuorasala i ning khu taata i pavaw lie kha a kha.

¹¹Cakhutaata iema ta, “Nama ca cawsaa hluvpuv, mingphang hluvpuv, ryi hluvpuv hne siepahruo zaw'a luo khana biephu na ri pakhaa aa,” ina ta yi.