Read Lautu Chin Biephu 11 Bible Online

Biephu 11 - Lautu Chin bible

Biephu 11

¹Cakhutaata khuecahryi a lupa taanapa asung suokha kha na pi yite, “A vaw la, Khazing biena-ing hne bienatluophie hne capa lieta abiepa tie kha vya taa tie yi,” ina ta yi.

²Cuorasala biena-ing ahmie khaca taa'a vaciy; pangaa tie, tahematapakieca khapakha ca Khazing abie lipa tie'a luo pi pata cuote iema ta khypuv pathepa kha thla sawliy hne thlahning chung amaa ciybaruv diy aa.

³Cakhutaata buri a hryipa i tehte pahning tie kha thawkha zahning angkha ning sawcaruv chung biephu ri khuna naw i pi'a yi.

⁴Iema ca alyi Byi hmiekunglieta a daapa Oliv thingkung kung hning hne myivuona tung suohning ta ama cuo.

⁵Pakhakha ta ruvnaana a pi'a nang kie yi ca, ama pakaa taata myi kya pya te ama carie tie kha a kuo'a yi. Iema riethyi a pipa ahunghmuo cahaa cata thiepa ama cuo aa.

⁶Iema ta profet-biephu ama ri nguoluo ningta khy a saa li riypata avuo khaana naw kha ama hnyi. Tiy kha thiy ta pali riypa naw hnyi yite, ama khing ning bangkhuo ta alyi kha pasana phangphang ta ruvnaana ama pi khu.

⁷Tehte amaa khuo khu taata dena a hnyi lipa khue chung taata saahruo kha kya pya te, iema kha rie a du'a yite a te khu taayita a thie'a yi.

⁸Ama riy ca mingnupa ta Sodom hne Izipt ama tapa, ama Byipaapa vieluo lie ama za taanapa khypuvlepa luopuv cunglie kha a laa aa.

⁹Phang ting ciy ting hne ryi ting taata cawsaa zaw khata ningthung angkha a che chung ama riy kha mang'a yite thluo chung luo paby riypa zaw ama thlu aa.

¹⁰Alyi lie khy a sapa tie ca iema chiycuona kawlie kha ama palung tluo'a te, lasaw zaw amaa thle aa, tahematapakieca hingpa profet pahning tie hing alyi lie khy a sapa tie kha zaa tuechiepa tie tana ama cuo.

¹¹Cuorasala ningthung angkha a che khu taata Khazing'a taata hringna huv[11] kha iema chung luo a ngie te ama phyi ta amaa daa, a hmungpa bangkhuo ca ama phuv te aa hling.

¹²Cakhutaata vuoruo taata ueryi paringsapa kha thyi yite, “Hingpa luo hing kya kie ung!” a ta yi. Ama carie tie ta ama mang nguoluopa khata amyi chung vuoruo luo kha ama kie.

¹³Capa cuota lieca aling khuopuv ta a siy te, khypuv ca chehraachekha ra te cawsaa thaw sariy ama thiy. A ngaapa tie ca ciy tuv hringhruo yite vuoruo Khazing rungnaana kha ama pathuo sa.

¹⁴Suohningnapa ciy aa chiypa ca a chuo tli. Suothungnapa ciy aa chiypa kha a ru hluo ta a vaw aa.

¹⁵Cakhutaata a pasariynapa avuo-ming ta a hmyakaa kha a tung ca vuoruo lie ueryi paringsapa ta, “Chuelyi pena ca ma Byipaapa hne Messiah[12] pena ta a li tli te, chuozaa taata chuozaa te ama ta a uv aa,” a ta.

¹⁶Cakhutaata Khazing hmiekung, amaa byithude cunglie a tupa uvthyi pakiy papaliy ca a bu yite Khazing kha hlaa sa yite amaa bie.

¹⁷“A Lesyicepa Abyipa Khazing, nama ca maca pathuo sa, Nama ca atalie zaw aw cate hluoning zaw ta a awpa na cuo. Tahematapakieca a lesyipa na cahrana kha hmuo cate uv hruo kha naa pathu tli.

¹⁸Mingphang zaw ca ama hihaa te, cuorasala a thiypa tie bieripa riypa cuo hne na hihaana ca a vaw tli, na changtaapa[13] na profet tie hne, na mingpathepa tie hne na ming caa ciyzaapa bangkhuo, a le a caw bangkhuo kha lasaw pi riypata hne, chuelyi a parapa tie kha para riypata a cuo,” ama ta.

¹⁹Cakhutaaca vuoruo lie Khazing biena-ing ca a pahaw te, a biekuona thingkaw kha biena-ing chunglie ca aa luo; thinghlaa aa cakang, khalung khuopuv ta aa thy, aling a siy te ari khuopuv ta a tla.