Read Lautu Chin Biephu 12 Bible Online

Biephu 12 - Lautu Chin bible

Biephu 12

¹Cakhutaata avuo lie khiy kharuehaa hmang suokha aa luo. Canung pakha ca ning khiy a cawsie ta aa tue, thlaapa kha a phyi ta chaa te, aasiy suohraa hlyihning ta tuepa byilakhuv kha a luv lie aa khuv.

²Nu phya te a puv'a nang tli nakawta nupazi te a khi nguoluo.

³Cakhutaata avuo lieca a hrangpa kharuehaa hmang suokha aa luo. A lesapa riyhre sepa sakha, luv suosariy hne kiy suohraa a hnyipa a luo te, a luv lieca byilakhuv suosariy aa khuv.

⁴A lahmyi ta avuo lie a awpa aasiy chethungchekha kha phiy pathla te alyi luo a thaw. Cakhutaacata a saata a za puv pahne paluo naa se ang tapata riyhre ca a saata zaa aw'a nang nung hmielie kha a daa.

⁵Cawsaanung cata mingphang bangkhuo thaakhuecahryi ta a uv[14] riypa saacapaa kha a sa. Cuorasala a saata ca la paluo yite Khazing hne aa byilakhuv hmie luo kha ama chiykhyi.

⁶Cawsaanung ca ning thaw kha zahning sawcaruv chung mangchiypa a cuo riy'a pata Khazing ta a cuota a parawpa ruochung luo kha aa ruo.

⁷Vuoruo lie rie thu te Mikhael hne aa vuoming khata riyhre kha amaa du. Riyhre hne aa vuoming ta ama tuv hriy,

⁸cuorasala amaa sung nakawta iema cuota vuoruo lie hmang aw va tli.

⁹Riyhre lesapa, khyhluo pariy, Khachie hne Setaa ama tapa, chuelyi bangkhuo a dungtuv ca aa vuoming hne khata alyi luo ama za thaw.

¹⁰Cakhutaacata vuoruo taata ueryi lepuv kha thyi ang te, “Ata hing ca khuona, cahrana hne, Khazing pena hne, Messiah[15] nawhnyina kha a vaw tli, tahematapakieca ma uvnu zaw kha Khazing hmielie chungzuo ta sue a phawtuv ca, thaw pathla pata a cuo tli.

¹¹Tuvtaata thiyse thue'a nata, tehte ama khuona thuophaabie thueta ama kha ama te mangtli, tahematapakieca ama hringna pi kha zaa pahya yite thiy zaw amaa zaa nguo.

¹²Vuoruo hne a chunglie a awpa tie zaw, nama palung tluo se. Cuorasala alyi hne riyliy cuota ca ciy na a chiy hringhruo, Setaa ca khuopuv ta hihaana cangta niema'a luo a za cung tli, tahematapakieca ama cuota cuo a pachangsa tlipa khana a pachang!

¹³Riyhre ca alyi luo ama thawpa kha aa hmung tiyta saacapaa a sapa cawsaanung kha a huv paluo.

¹⁴Cuorasala cawsaanung ca pariy lepa awna taakhata ruochung luo aa zu khuna riypata hmungthlu lesapa mathlaa kha ama pi. Capa hmang lie ca cuokha chung, cuohning chung hne cuoche chung kha mangchiy pata a cuo aa.

¹⁵Pariy cata cawsaanung phya naase tapata a pakaa chung taata tiy kha cavaa haata a papya.

¹⁶Cuorasala alyi ta cawsaanung kha a bya te riyhre ta a pakaa taata a papyapa tiy kha a pakaa kya uo te a saw diy.

¹⁷Riyhre ca cawsaanung cunglie kha a hihaasa te Khazing nawbie a ziypa hne Zingsuv kaw tehte a khuopa aa tuo kaliepa a saata zaw kha a du riypata a pya.

¹⁸Cakhutaata riyhre ca riyliy kie viehnang cunglie kha aa daa.