Read Lautu Chin Biephu 13 Bible Online

Biephu 13 - Lautu Chin bible

Biephu 13

¹Cakhutaata riyliy taata saahruo sakha a kya pya pakha i hmung. Kiy suohraa hne luv suosariy hnyi te, a kiy zaw cunglie ca byilakhuv suohraa aw yite a luv zaw cunglie ca Khazing rithuochina ming ama aw.

²I hmungpa saahruo ca kyiching hneta a lu te, a phyi ca cavaw phyi hneta aa lu, a pakaa ca chingde pakaa hne aa lu. Riyhre ta a cahrana hne a byilakhuv hne nawhnyina lepa kha a pi.

³A luv suokha ca thiykhyi tluopa hmaa zaa phya tlipa na a lu, cuorasala capa hmaa taacata a tluo tli. Alyicung bangkhuo ta ama kharue haa te ama kha ama ziy.

⁴Iema ta riyhre kha amaa bie, tahematapakieca a nawhnyina kha saahruo a pi nakawta a cuo. Sahruo zaw kha abie yite, “Ahungma saahruo a lupa a aw, ahungma ama a du khu aa?” ama ta.

⁵Saahruo ca Khazing rithuochina biechiepa ri kha pa-awpa cuote, thla sawliy thla hning chung hmuo the riypata nawhnyina ama pi.

⁶Khazing rithuochi riypata a pakaa kha uo te, a ming, a awna hmang hne vuoruo lie a awpa tie kha a rithuochi yi.

⁷Mingpathepa tie kha a du pata te riypa zaw kha pa-awpa a cuo. Mingphang ting, cawsaa bangkhuo, ryi phangting hne ruo zawdya cunglie kha nawhnyina ama pi.

⁸Ama thie ciepa Tuvtaata hringna caa-uv chunglie chuelyi hruothu baataata ming cape lipa, chuelyi lie khy a sapa bangkhuo ta ama kha amaa bie aa.

⁹Thyina naa a hnyipa ta thyi yi se:

¹⁰Patuv pata a dale riypa bangkhuo ca, patuv pata hrepa ama cuo aa. Zueziy ta malie na thie kieca, zueziy ta thiepa tana na cuo ra aa. Hingpa hing ca mingpathepa tie ta ang khuna hne zangna ama hnyi riypata pasuna tana a cuo.

¹¹Cakhutaata saahruo sahningna alyi taata a kya pyapa kha i hmung. Tuvtaata haata kiy suohning hnyi te riyhre haata bie a ri.

¹²Saahruo sakhana ta a hnyipa nawhnyina bangkhuo kha ama cuopa ta hmuo te alyi hne a chunglie a awpa bangkhuo kha thiykhyi tluopa hmaa za phya te a tluo pakhaapa saahruo pakhana kha a pabie sa yi.

¹³Kharuehaa hmang a lepa puv zaw kha tue te cawsaa bangkhuo hmiekunglie caci kha avuo taata alyi luo myi a za pathla.

¹⁴Saahruo suokhana cuopa ta tue khu riypata ama pa-awpa kharuehaa hmang kha hmuo te a dung yi. Zueziy hmaa phya te a tluo pakhaapa saahruo kuvtuezuv kha sa riypata a chang yi.

¹⁵Saahruo sahningna ca Saahruo sakhana kuvtuezuv kha huv[16] pi pata bie pari sa khuna hne ama abie lipa tie zaw thie khuna naw kha ama pi.

¹⁶Capa saahruo cata a lepa hne a cawpa, a hnyirungpa hne siypasapa, a hyazangpa hne sii cuose ama cacuo luo kuv a cuo li kie ama puo lie a hnangna a patue sa yi.

¹⁷Saahruo ming a cuo li kie a ming nangbaa, a hnangnapa kha a hnyi lipa ca hmang kha a calyi zaw calyi khu li pata a zaa zaw zaa khu ra vayi.

¹⁸Hingpa lie hing singna hmuo aa hu ciemuo: singna a hnyipa ta saahruo nangbaa siyluo ca tue yi se, hingpa nangbaa hing cawsaa pakha nangbaa tana a cuo. Capa nangbaa ca zacaruv sawcaruv suocaruv[17] tana a cuo.