Read Lautu Chin Biephu 14 Bible Online

Biephu 14 - Lautu Chin bible

Biephu 14

¹Cakhutaacata i mang ca Zion Tluo lieta Tuvtaata aa daapa kha i hmung. Ama puo lieta ama ming hne a paa ming a capepa thaw zakha thaw sawliy thaw paliy ama hne ama awpa zaw kha i hmung.

²Cakhutaacata vuoruo taata ueryi thyi ang te, capa ueryi ca tiysue lesapa pu hne khalung pu haata a cuo. Ueryi i thyipa ca tingtuo a tungpa tie ta ama tingtuo ama tungpa ue hneta aa lu.

³Iema cata Byithude hne Saruopa a hringpa papaliy hmielie hne uvthyi zaw hmielie kha hlaa thaapa ama sa. Alyi taata khuopa thaw zakha thaw sawliy thaw paliy tie ri li pata ahungtahmuo capa hlaa ca the khu vayi.

⁴Iema ca canung hne a papya a palyi lipa, a pathepa, hne Tuvtaata a cakuona luo mekaa ta a ziylepa tie ta ama cuo. Iema ca cawsaa hraw taata Khazing hne Tuvtaata cuota khuopa thyipaa taapa tie ta ama cuo.

⁵Ama pakaa taata hangna bie pya vyi; risie riypa zaw aw vayi.

⁶Cakhutaata avuoming hrangpa pakha avuo liekhingkhuo lie aa zu nguoluopa kha i hmung. Ama ca alyi lie a awpa ruo ting, mingphang bangkhuo, ryi phangting hne cawsaa zawdya'a luo pathyi sa riypa chuozaa thuophaabie pathyi satuv ta a cuo.

⁷Ue paringsapa ta a ripa ca, “Khazing kha ciyzaa ungla rungnaana pi tie ung, A bierina ning na a vya tlung tli; vuoruo hne alyi, riyliy hne cavaa zaw a satuv kha abie tie ung,” a ta.

⁸Cakhutaacata avuoming hrangpa, a pahningnapa ta paziy te a ripa ca, “Aa lie tli, a lesyipa Babilon ca aa lie tli! A saapa huenapa Khazing hihaana mingsuv kha mingphang ting a padangsatuv nung tana a cuo,” a ta.

⁹Cakhutaata a pathungnapa avuoming a hrangpa ta ueryi lepuv ta a khipa ca, “Saahruo hne a kuvtuezuv kha abiepa hne ama puo lie hne ama kuv lieta a hnangna a hnyipa tie ca

¹⁰Khazing hiihaana panuo chung luo khaahmuo pyapa aw li pata ama lyipa Khazing mingsuv khana ama dang aa. Iema ca a pathepa avuoming hne Tuvtaata hmielie kha myi hne ke ta hrisaana ang'a yite,

¹¹iema ama hrisaanapa myikhuv ca chuozaa ta a khuvthaw pari aa. Saahruo hne ama kuvtuezuv abiepa hne a ming a hnangnapa a hmungpa tie ca ama cuota chungzuo ta a hyna cuo aw'a vyi.

¹²Hingpa hing na mingpathepa tie ang khuna hne Khazing nawbie a ziypa hne Zingsuv a zaa zang taapa tie cuota pasuna ta a cuo.

¹³Cakhutaata vuoruo taata ueryi suokha thyi ang te, “Cape tie: Khazing zangna cangta a thiypa tie ca thluechiypa tana ama cuo,” ina ta. Thlaapa ta, “A cuo,” ama tuena ta iema kha a paziyle nakaw yi ta ama rehriena taata amaa pahy'a mangtli,” a ta.

¹⁴I mang ca amyi ruopa suokha hmung ang te, capa cunglie ca Cawsaa Saacapaa a lupa pakha kha a luv cunglie siyylakhuv a khuv te a kuv lie tuokyi cahresapa suokha aa cyi pata i hmung.

¹⁵Avuoming a hrangpa pakha Biena-ing chung taata kya pya te amyi cunglie a tupa kha khuopuv ta u te, “Na tuokyi kha hmuo la uo tie, tahematapakieca alyi sa hing a hmingsa tli nakawta uo na cuo khana a de tli,” a ta

¹⁶Cacuonakawta amyi cunglie a tupapaa ca a tuokyi kha vya pahie te sa ca a uo.

¹⁷Cakhutaata avuoming a hrangpa kha vuoruo biena-ing chung taata kya pya te, ama zaw tuokyi cahresapa suokha a hnyi.

¹⁸A hrangpa avuoming, myi cunglie naw a hnyituv kha bienatluophie taata kya pya te, tuokyi cahresapa a hnyituv avuoming kyihuo khata, “Mingsuv kha a hmingsa tli nakawta na tuokyi cahresapa kha hmuo la alyi mingsuv zaw kha pahmya tie,” a ta.

¹⁹Cacuonakawta avuoming ta a tuokyi kha pahie te alyi taata mingsuv kha pahmya te Khazing hihaana mingsuv a ciyna chung luo kha a thaw.

²⁰Cakhutaata mingsuv ca khypuv le luo mingsuv a ciyna lie kha amaa ciy ca mingsuv a ciynapa chung taacata thiyse ca aruo hmyakhe te aa suo pata kilometer zathung[18] tluv te ta a lang.