Read Lautu Chin Biephu 15 Bible Online

Biephu 15 - Lautu Chin bible

Biephu 15

¹Cakhutaata avuo lie khiy a lesyipa hne kharuehaa aa chiypa pahmungsana hmang suokha i hmung. Avuoming pasariy hne puvtlung pasana suosariy cuo yite caca a hnangcawcepa ta a cuo. Tahematapakieca Khazing hihaana a chuona tana a cuo.

²Cakhutaaca myi hneta aa pyapa thlaluo riyliy haapa suokha i hmung. Saahruo hne a kuvtuezuv hne a ming nangbaa a tetuv tie kha ama kuv lie Khazing tingtuo a cyi yite thlaluo riyliy kielie amaa daapa kha i hmung.

³Iema ca Khazing changtaapa[19] Moses hlaa hne Tuvtaata hlaa kha ama sa: “A Lesyicepa Abyipa Khazing, Khatluv tama na hmang tuepa hing lesyi te kharuehaa aa chiy! Aa dangpa hne aa hmuopa ca nama luopuv tana a cuo, Mingphang zaw Siepahruo!

⁴Abyipa, ahungma nama ca ciy li pata, na ming ca parungnaa sa li pata a aw aa? Tahematapakieca nama pakha dyi hingna a pathe ciy. Mingphang bangkhuo hing na hmiekung luo a vaw'a yite, nama kha acaa bie'a yi. Tahematapakieca na biechina ca aa luo tli.

⁵Cakhutaata i mang ca, tehtekhuona thluodaa biena-ing aa pahawpa kha i hmung.

⁶Avuoming pasariy kha puvtlung pasana suosariy hne biena-ing chung taata ama kya pya. Iema ca a pathepa pangruopa kha a buv yite, ama cacunghnaa kha siyy cacunghnaapaze amaa paze.

⁷Cakhutaacata a hringpa saruopa papaliy chung taa pakha ta avuoming pasariy ca chuozaa ta a hringpa Khazing hihaana ta a bipa siyy kuotung suosariy a pi yi.

⁸Biena-ing ca Khazing rungnaana hne a cahrana taata a pyapa myikhuv ta bi te, avuoming pasariy tie puvtlung pasana suosariy ama chuo hluo li pakha hmuo a ngie khu vayi.