Read Lautu Chin Biephu 16 Bible Online

Biephu 16 - Lautu Chin bible

Biephu 16

¹Biena-ing taata ueryi lesapa suokha ta avuoming pasariy kha, “Vaa ungla Khazing hihaana kuotung suosariy kha alyi cung luo va lyi tie ung,” a tapa yi kha i thyi.

²Avuoming a pakhanapa ta a kuotung kha riyliy luo a bungh ca saahruo a hnangna a hnyipa hne ama kuvtuezuv abiepa tie cunglie kha a pahnuosapa hne a pasasapa hmaa a kya aw.

³A pahningnapa avuoming ta a kuotung kha riyliy luo a bungh. Tiy ca a thiypa riy chung taata a pyapa thiy haata a li te riyliy chunglie a awpa a hringpa bangkhuo kha ama thiy diy.

⁴A pathungnapa avuoming ta a kuotung kha cavaa hne acaa luo kha a bungh ca thiy ta amaa li.

⁵Cakhutaata tiy a uvtuv avuoming ta, “Hluo ning taata za aw te atalie zaw a awpa A pathepa, nama ca aa dangpa tana na cuo, tahematapakieca hingpa hmang zaw cunglie hing nama na bie a chi ciy

⁶Iema ta mingpathepa tie hne profet tie thiy kha ama za palang nakawta, ama dang riypata thiy kha na pi yi. Caca iema amaa phuvpa tana a cuo.

⁷Cakhutaata bienatluophie ta a paliepa kha thyi ang te, “A cuo, A Lesyicepa Abyipa Khazing, na biechina ca a hmuo te aa dang,” a ta.

⁸A papaliynapa avuoming ta a kuotung kha ning cungluo bungh te, ning ca cawsaa kha myi haata kuona naw pi pata a cuo.

⁹Iema ca a lingsuesaapa myi ta kuo yite, cuorasala puvtlung pasana cunglie naw a hnyituv Khazing ming kha chie ama sa. A ngiepachiy pata Khazing ming kha pathuo sa vayi.

¹⁰A papangaanapa avuoming ta a kuotung kha saahruo byithude cunglie a bungh. Saahruo uvna chunglie kha khyzingna a tlung. Cawsaa ca ama palyi kha a ce yite,

¹¹ama angpa pasana hne hmaa kawlieta Khazing kha chie ama sa. Ama tuepa hmangpha lipa kha a ngiepachiy vayi.

¹²A pacaruvnapa avuoming ta a kuotung kha Zufrates cavaapuv cunglie a bungh. Ningchiy luo taata siepahruo tie cuota luo pa-aw riypata cavaa ca a ky.

¹³Cakhutaata riyhre pakaa taata cuose, saahruo pakaa taata cuose, profetpakhipa pakaa taata cuose, ca-uv a lupa thlaapa pyalyipa pathung amaa vawpa kha i hmung.

¹⁴Iema ca khuevuo thlaapa ta ama cuo, kharuehaa hmang kha tue yite, A Lesyicepa Khazing rietuvnapa ning thue huo cuota pahmya riypa yita ruo ting siepahruo tie'a luo kha ama si.

¹⁵(“Mang tie ung, a paruvpa haatana i vaw aa! A thliehripa ta aa khie li riypa hne nangzaahmiechi pata a aw li riypata a hmung li pata aa tuepa cawsie a mangchiypa ca thluechiypa tana a cuo.”)

¹⁶Cakhutaata khuevuo thlaapa tie cata siepahruo tie kha Hebru ryi ta Armageddon ama tapa hmang lie ama pahmya.

¹⁷A pasariynapa avuoming ta a kuotung kha thliy lieta a bungh. Ueryi lesapa kha biena-ing chung byithude taata kya paring te, “Aa lang tli,” a ta.

¹⁸Cakhutaacata thinghlaa aa cakang, khalung aa thy, paci tla te aling khuopuv ta aa siy. Chuelyi lie cawsaa ama aw baataata cahaapa aling ca a siy buo vyi, aling a siy buopa hrawlie a ruvcepa tana a cuo.

¹⁹Khypuv lesyipa ca chethung ta a chechi te, ruo ting lie khypuv zaw ca ama ra. Khazing ta a lesyipa Babilon kha maw li pata a hihaana mingsuv panuo kha a padang sa.

²⁰Parala bangkhuo ca a ruo diy yite, tluo zaw kha hmung khu aw va tli yi.

²¹Ari pangkalupa, paw zakha[20] te aa riypa kha avuo taata cawsaa zaw cungluo ca a za tla. Ciy aa chiy hringhruopa, ari ta puv a patlung sana kawlie cata cawsaa ta Khazing kha chie ama sa.