Read Lautu Chin Biephu 17 Bible Online

Biephu 17 - Lautu Chin bible

Biephu 17

¹Cakhutaata kuotung suosariy a hnyipa avuoming pasariy chung taa pakha kha a vaw te, “A vaw la, tiy cunglie a tupa a lesyipa siyhrawnung ta a ang riypa bieripana na ica pahmung sa aa.

²Alyi siepahruo tie ta ama hne aparuvsuena tue yite chuelyi lie khy a sapa tie ta hingpa nung aparuvsuena mingsuv kha ama pariy,” ina ta.

³Cacuonakaw ama ta thlaapa cahrana ta kama kha ruochung luo na sikhyi te, canung pakha ca chiesanapa ming ta a bipa, luv suosariy hne kiy suohraa a hnyipa, a sepa saahruo cunglie aa tupa kha i hmung.

⁴Capa canung ca a medungpa hne a sehunglungpa caw kha a tue te siyy alung sungnaapa hne palelungvaa ta aa pangi. A kuv lie kha duvsamakhie aa chiypa hne a pathe lipa ta a bipa aparuvsuena a tuenapa siyy panuo kha aa hrie.

⁵A puo lie aa capepa, bienupa a hnyipa a ming ca, “A lesyipa Babilon, chuelyi lie a awpa duvsamakhie aa chiypa hne siyhrawnung tie zaw nung,” tapata a cuo.

⁶Capa canung ca mingpathepa tie thiy hne Zingsuv cuota tehte a cuopa tie thiy a pariy pakha i hmung. Capa nung ca i hmung tiyta, i nang ta a uo.

⁷Cuorasala avuoming cata, “Khaapanakawma catluv nanaa na nang a uo? Canung nung hne ama a phyalepa a luv suosariy a hnyipa hne a kiy suohraa a hnyipa saahruo bienupa siyluo ca ica chang aa.

⁸Na hmungpa saahruo ca a hluo ta za aw te, ata hing ca aw va tli. Dena a hnyi lipa khue chung taakhata kya pya'a te a ra aa. Chuelyi hruothu baataata hringna caa-uv chunglie ama ming cape lipa, chuelyi lie khy a sapa tie ta saahruo kha ama hmung tiyta ama nang a uo sa aa. Tahematapakieca a hluo ta za aw te, ata hing a aw li tli raalaa pata a vya aw pakhaa aa.

⁹Hingpa kawlie hing singna hne pachangna aa hu: luv suosariy ca canungnung aa tunapa tluo suosariy ta a cuo; siepahruo pasariy zaw kha a cuo ra.

¹⁰Capa siepahruo tie chung taacata papangaa ca ama thiy tli, pakha hring kalie te, a hrangpa pakha ca a vaw valie; aa vaw thue zaw ta cuo pachangta dyina a aw aa.

¹¹A hluo ta za aw te ata hing a aw li tlipa saahruo ca a pacarinapa a cuo raalaa pata siepahruo pasariy chunglie ta pakha ta cuote, rana luo a chiy riypatana a cuo.

¹²Na hmungpa kiy suohraa ca uvpa ruo a hnyi li liepa siepahruo pahraa ta cuo yite, cuorasala saahruo hneta siymaluo pakha chung uv hne riypata siepahruo nawhnyina kha pipa ama cuo aa.

¹³Iema ca saahruo'a luo ama cahrana hne ama nawhnyina kha pi riypata ama palung aa lusa.

¹⁴Tuvtaata kha amaa du aa, cuorasala Tuvtaata tah a te'a yi. Tahematapakieca ama ca byi zaw hrawlie ta Byi hne siepahruo zaw hrawlie ta Siepahruo tana a cuo. Ama'a lie a awpa tie ca kupa tie, a tlawpa tie hne zangtluo aa tlapa tie tana ama cuo,” a ta.

¹⁵Cakhutaacata, “Siyhrawnung aa tunapa na hmungpa tiy ca ruo ting taata ryi ting a cyipa mingphang ting tana ama cuo.

¹⁶Na hmungpa kiy suohraa tie hne saahruo khata siyhrawnung kha huesa'a yite, ama kha para'a yite a thliehripa ta ama chi aa. A saa kha a ce chuv'a yite myi ta ama rue aa.

¹⁷Tahematapakieca Khazing ta a bie ripa a tling hluo li, iema ama uvpa ruo kha saahruo'a luo pi pata ama aa tingnapa re ama hrie khing riypa kha ama palung chunglie a chi.

¹⁸Na hmungpa canungnung hing chuelyi siepahruo tie a uvtuv khypuv tana a cuo,” ina ta.