Read Lautu Chin Biephu 18 Bible Online

Biephu 18 - Lautu Chin bible

Biephu 18

¹Cakhutaacata avuoming hrangpa vuoruo taata a za cungpa kha i hmung. Nawhnyina lepuv kha hnyi te, a khena ta chuelyi kha a pakhe diy.

²Ueryi lepuv ta u te, “A ra tli, a lesyipa Babilon ca a ra tli! khuevuo zaw awna hmang tana aa li. A pyalyipa thlaapa zaw tlena hmang, a pyalyipa pavaa zaw awna hmang hne, a pyalyipa hne duv aa chiypa saahruo zaw tlena hmang tana aa li.

³Tahematapakieca mingphang bangkhuo ta, aparuvsuena a mingsuv kha pariy yite, alyi siepahruo tie ta ama hneta aparuvsuena kha ama tue. Alyi lie sung a palituv tie ca, ama saapa lunghruotlunghring cahrana kha ta a pa hnyirung sa yi,” a ta.

⁴Cakhutaata vuoruo taata ueryi hrangpa kha thyi ang te, I cawsaa zaw, a suena chunglie namaa te ra li riypa hne, a angpa puvtlungpasana kha namaa hraw ra li riypata, ama'a taakhata kya pya tie ung.

⁵Tahematapakieca a suena ca avuo dena te ta a pung te, Khazing ta a pha lina kha maw vyi.

⁶Ama ta aca za tue pahaa yi khata ama kha tue ungla, a tuepa kha lehning ta thung tie ung. Ama ta a za pya ciepa panuo lie kha, ama cuo khata lehning ta pya ungla pi tie ung.

⁷Rungnaana hne lunghruotlunghring ama hne ama a zaa pina zaa khata, riethyivuosuona hne ngiechina kha pi tie ung. Tahematapakieca a palung chunglie ta, siepahruonung a daahmang taatana ruo i uv; nunghlyi ta cuo va ang, ngiechina ca a taw buo'a va ang,” a ta.

⁸Cacuonakawta puvtlungpasana, pasachiepa hne angiy-aphiena hne cakuona ca ning kha bie ta vya tlung'a te, Ama ca myi ta ruepa a cuo aa, Tahematapakieca a bie a ripa tuvpa ca a lesyicepa Abyipa Khazing tana a cuo,” a ta.

⁹Ama hneta a aparuvsuena tue yite lunghruotlungsa pata zaa hringpa alyi cung siepahruo tie ca ama ruenapa myikhuv ama hmung tiyta pahya li pata ama caa aa.

¹⁰A te-angna kha ama ciy nakawta luohlaa taakhata, Na puosa hringhruo, na puosa hringhruo, khypuv lesyipa, Babilon, a cahrapa khypuv! Na bie ripanapa ca siymaluo pakha chung ta liena a vya tlung de,” ama ta aa.

¹¹Cakhutaata chuelyi cung sung a palipa tie ta a muochie sa yite ama caa, tahematapakieca ama chechiy kha ahungtahmuo calyi va tli yi.

¹²Siyy, ngu, alung sungnaapa, palelungvaa, palaa ta taapa caw, kadiypaa caw, puv ta taapa caw, a rang pa-uepa thing phangting, ale nue ta tuepa hmang phangting, thing muosungpa ta tuepa hmang phangting, thiyhring, thaa, alung ruopa ta tuepa hmang phangting,

¹³thinghaw pa-uepa, tiyhuo ca-ienapa bangkhuo, maasalaa, mura ziyhmyi, frankinsens ziyhmyi, mingsuv, Oliv chiytiy, jungsacuo viedie, jungsacuochuo, cue, tuv, aruo hne aruole, sii hne cawsaa zaw kha ahungtahmuo calyi va tli yi.

¹⁴“Na hringna ta a vuopa thyipaa bangkhuo ca, a khungle diy tli, tluesiyliy khata na awna hne na lesyina zaw ama vie diy tli, hmung pakhaa khu the'a va tli ciy!

¹⁵Hingpa hmang hne chechiy ta sung a palipa, ama'a taata a hnyirungpa tie ca a te-angna kha ama ciy nakawta luohlaa taakhata a daa yite, ngiechina hneta ama caa aa.

¹⁶Na puosa hringhruo, na puosa hringhruo, khypuv lesyipa, a sedungpa hne a sehunglungpa cawphapa kha a tue cate, siyy, alungsungnaapa hne palelungvaa ta naa pangi!

¹⁷Capa hnyirungna ca siymaluo pakha chungliena ama vie diy thluo!” ama ta aa. Tiypalaw mawtuv byi bangkhuo, palaw a ziypa tie, palaw lie re a hriepa tie hne riyliy cunglie sung a palipa tie bangkhuo zaw ta

¹⁸ama a kuonapa myikhuv kha ama hmung tiyta luohlaa taakhata a daa yite, “Khaapa khypuv ma hingpa khypuv haahingta zaa lesyi buo?” ama ta.

¹⁹Cakhutaacata ama luv lie alyidiypa a phuv yite, Na puosa hringhruo, na puosa hringhruo, khypuv lesyipa, riyliy lie tiypalaw a hnyipa tie bangkhuo kha a hnyirungna ta a palesyi sa nung! ama ca siymaluo pakha chunglie tana parapa a cuo.

²⁰Vya vuoruo ama cawsaanung kawlie hingta na palung tluo se, niema mingpathepa tie hne lucuotuv tie hne profet tie zaw nama palung tluo se! Tahematapakieca Khazing ca niema kuo luota a daa tena ama kha bie a ripa tli,” tapata ama khi.

²¹Cakhutaata a cahrasapa avuoming pakha ta sacuo rienapa lungtung haapa alung suokha kha riyliy luo thaw te, “Alesyipa Babilon khypuv ca, hinghaahingta riyliy luo kha thaasa ta thawpa cuo'a te, khatiy tahmuo hmung pakhaapa cuo'a va tli.

²²Cakhutaata tingtuo a tungpa tie hne, ramang a tungpa tie hne hmyakaa a tungpa tie ama tungpa hne hlaa sa a thepa tie ueryi kha, nama'a lie thyipa ta cuo buo'a va tli. Tuokhaapa kuvzung a thepa pakha khahmuo, nama'a lie hmungpa cuo'a va tli. Sacuo rienapa alung pu zaw kha khatiy tahmuo nama'a lie thyipa cuo'a va tli.

²³Cakhutaacata myi-ing khena kha, nama'a lie hmungpa cuo li tli'a pata, napuv a chiypa satlie hne navaa a hnyipa lesaa ueryi zaw kha thyipa ta cuo'a va tli. Tahematapakieca na sungpalituv tie ca alyi lie a lesyipa tie ta cuo yite, mingphang bangkhuo ca na pacuo thena ta na dung diy tli yi.

²⁴Na chunglie kha profet tie hne mingpathepa tie hne alyi lie za thiepa bangkhuo tie ama thiy kha hmung pata a cuo tli,” a ta.