Read Lautu Chin Biephu 19 Bible Online

Biephu 19 - Lautu Chin bible

Biephu 19

¹Cakhutaata cawsaa hluvpuv ueryi haapa kha vuoruo taata thyi ang te, “Hallelujah! Khuona hne rungnaana hne cahrana ca Khazing huotana a cuo,

²tahematapakieca a biechina ca a hmuo te aa dang Aparuvsuena ta alyi a para nung, a lesyinung siyhrawnung kha bie a ripa tli. A sii zaw thiyse kawlie ama kha phuv a la hriy mangtli,” ama ta.

³Luokha khi pakhaa yite, “Hallelujah! Ama a kuonapa myikhuv ca chuozaa ta chuozaa te a khuvthaw pari,” ama ta.

⁴Cakhutaata uvthyi pakiypapaliy hne a hringpa saruopa papaliy ca byithude lieta a tupa Khazing kha abie yite, “Amen. Hallelujah!” ama ta.

⁵Byithude taata ueryi suokha ta, “Niema a sii zaw bangkhuo hne, ama a ciypa a le a caw ta, Khazing ca pathuo sa tie ung,” ama ta.

⁶Cakhutaacata cawsaa hluvpuv ueryi hneta aa lupa ueryi, tiysue lesapa ryi hne khalung pu haapa ueryi suokha kha i thyi. “Hallelujah! Abyipa ma Khazing A Lesyicepa ca siepahruo a cuo nakawta,

⁷a nuo ung sala a law ungsiy, a rungnaana kha pathuosa ungsiy, tahematapakieca Tuvtaata nungchiyna cuo a vya tlung tli. Navaa a hnyi riypa lesaanung ca a ting pacie pata aw te,

⁸Cawphapa, a khepa hne a pathesapa kha, a tue riypata ama pi,” a ta. Tahematapakieca caw pathesapa ca mingpathepa tie hmangpha tuenapa tana a cuo, a ta.

⁹Cakhutaata avuoming pakha ta, “Hingpa hing cape tie: Tuvtaata nungchiyna pyi saduona luo kupa ca thluechiypa tana a cuo,” ina ta. Cakhutaacata, “Hing bie hing Khazing biehmisipa tana a cuo,” ina ta.

¹⁰Catiyta ama kha abie riypata a phyi thabaw lie i bu, cuorasala ama ta, “Haa khata tue khah! Kama zaw nama hne na viesaa zaw[21] haakhata Zingsuv kaw tehte a khuotuv changtaapa[22] pakha tana i cuo. Khazing kha abie hriy tie! Tahematapakieca Zingsuv ta a phupa biehmisipa hingna profet tie kha profet-biephu a pari sapa cahrana ta a cuo.

¹¹Cakhutaata vuoruo aa pahawpa kha hmung ang te aruo ruopa sakha aa luo. A khangtuvpa ca Zangtluo aa tlapa hne Biehmisipa ama ta. Adangna hneta bierina tue te rie aa du.

¹²A ming ca myihlaa haata cuote a luv cunglie ta byilakhuv a hluvsa aa khuv. Cape ciepa ming suokha hnyi te ama ri li pata ahungtahmuo pachang vayi.

¹³Ama ca thiy lie nawpa caw kha a tue te, a ming ca Khazing Bie ama ta.

¹⁴A khesapa hne a pathepa cawphasapa aa tuepa vuoruo rieka tie ta aruo a khang yite ama ziyle.

¹⁵A pakaa taata zueziy cahresapa kya pya te capa zueziy cata mingphang zaw kha a te yi. Iema kha thaakhuecahryi ta uv'a[23] yite, Alesyicepa Khazing hihaana mingsuv a ciynapa khue lie kha mingsuv aa ciy aa.

¹⁶A pang cunglie hne a baw lie kha a ming cape yite, “siepahruo tie Siepahruo hne abyi tie Byipaapa,” tapata a cuo.

¹⁷Cakhutaata avuoming pakha ning cunglie aa daapa kha i hmung. Avuo khingkhuo lie a zulepa pavaa tie kha a ueryi lesapa ta ku yite, “A vaw ungla Khazing sa duona rungnaapa luo kha a vya hmya tie ung.

¹⁸Siepahruo tie saa, riebyi tie saa, a lesyipa tie saa, aruo saa hne a khangtuv tie saa, hyazangpa tie hne sii tie saa, a cawpa hne a lepa tie saa ce riypa khata a vya hmya tie ung,” a ta.

¹⁹Cakhutaaca saahruo hne alyi siepahruo tie kha ama rieka hneta a hmya yite aruo a khangpa hne a rieka tie kha rie amaa du.

²⁰Saahruo ca a hmiekunglie kharuehaa hmang a tue tawpa profetpakhipa hne khata ama patuv. Capa kharuehaa hmang a tuepa cata saahruo a hnangnapa a hmungpa tie hne a kuvtuezuv abiepa tie kha a dung yi. Iema pahning tie ca ama hringpa ta kemyi chung luo kha ama thaw.

²¹A tuopa tie ca aruo a khangpapaa pakaa taata a pyapa zueziy ta thie diy yite ama saa ca pavaa bangkhuo ta ama riy bikaluv nate ta ama ning.