Read Lautu Chin Biephu 2 Bible Online

Biephu 2 - Lautu Chin bible

Biephu 2

¹Efesa khy lie a awpa khrihsaa-buv avuoming'a luo kha hinghaahingta cape tie: A cacuo luo kuv lie aasiy suosariy a cyi te siyymyivuonatung suosariy a lala lie a cakuolepa bie ca hinghaahingtana a cuo:

²Na hriepa re, te namaa nguoluopa hne palung pasiysa pata na ang law napa kha i pachang. Hmangpha lipa a tuepa tie na chaw the lipa hne lucuotuv na i cuo amaa ta raalaa pata a cuo lipa tie na dyapasyanapa yi hne a hangpa ama cuopa na hmung khuna kha i pachang.

³Na palung pasiysa pata ang cate i ming kawlie na te-angna hne riethyi ang cate na palung a chuo lipa zaw kha i pachang.

⁴Cuorasala ica pasuenapa suokha ca a hruothu ta na za hnyipa duena kha hnyi va tli ciy.

⁵Khaapa a daahmang taakhatama naa lie tapa kha a thyi la, a ngiepachiy la a hruothu ta na za tuepa hmang kha tue pakhaa tie. Cata cuo li pata na suenapa kha naa ngiepachiy li kieca namaa'a luo kha a vaw'a ang te na siyymyivuonatung kha a awna taata i palaw aa.

⁶Cadyiseca ica rithuophaa khingpa suokha ca kama ta i huepa Nikolas ziytuv tie ama tuepa kha na hue rapa hingta a cuo.

⁷Thlaapa ta khrihsaabuv tie'a luo a ripa hing thyina naa a hnyipa bangkhuo ta thyi mangyisue. Tena a hmungpa bangkhuo ca Khazing paradais lie a awpa hringna thingthyi khana ningna naw i pi'a yi.

⁸Smyrna khy lie a awpa Khrihsaabuv avuoming'a luo kha hinghaahingta cape tie: A hmietaace hne a hnangcawce ta a cuopa, thiy te a hring pakhaapa bie ca hinghaahingtana a cuo:

⁹Ruvnaana na angpa hne siypasana na angpa kha i pachang, cuorasala a hnyirung patana na cuo. Judah ming tana ma cuo ta raalaa yite a cuo lipa tie ta na thuo aca pachipa yi kha i pachang. Iema ca Setaa apungna-ing tana ama cuo.

¹⁰Na te-ang riypa kha ciy khah. Naathlie tie, dyapasya riypata Setaa ta niema chung taa chekha kha thaw aca pathla'a yi. Ning hraa chung riethyina nama ang aa. Thiyna te ta zangtluo aa tla pata aw la hringna byilakhuv kha ica pi aa.

¹¹Thlaapa ta khrihsaabuv tie'a luo a ripa hing thyina naa a hnyipa bangkhuo ta thyi mangyisue. Tena a hmungpa ca yihning thiyna ta para khu'a va tli.

¹²Pergamum khy lie a awpa khrihsaabuv avuoming'a luo kha hinghaahingta cape tie: Kuo hning ta a cahrepa zueziy a hnyituv bie ca hinghaahingtana a cuo.

¹³“Na awna hmang kha ica pachang, capa hmang ca Setaa byithude awna hmang ta a cuo. Niema zaw hrawlie ama thiepa, zangtluo aa tlapa naa pachangkhyituv Antipas kha Setaa awna hmang lie ama thie ning tahmuo na zangna kha thaw lipa cata i ming kha a cusa pata naa patuv.

¹⁴Cuorasala ica pasuenapa a cawta a aw: niema'a lieta Balaam pacuvnapa a ziypa cawsaa chekha ama aw. Balaam ta Balak kha Israel ming hmielie a pachiyna a cuo riypata kuvtuezuv amaa bienapa sa ning riypa hne aparuvsuena tue riypata a pacuv.

¹⁵Cahaa cata Nikolas ziytuv tie pacuvnapa a ziypa zaw nama aw ngiethie.

¹⁶A ngiepachiy tie ung, namaa ngiepachiy li kieca niema'a luo kha a vaw patang'a ang te i pakaa taata a pyapa zueziy ta iema kha i du'a yi.

¹⁷Thlaapa ta khrihsaabuv avuoming'a luo a ripa bie kha naa a hnyipa bangkhuo ta naathlie mangyisue. Tena a hmungpa bangkhuo ca nupa mannaa chebuo kha i pi'a yi. Alung ruopa zaw kha pi'a yi ang te, capa alung ruopa cunglie ca a cutuv ri li pata ahungtahmuo ama pachang lipa ming thaapa kha aa cape.

¹⁸Thiatira khy lie a awpa khrihsaa-buv avuoming'a luo kha hinghaahingta cape tie: Hingpa bie hing myihlaa haapa ming hnyi te sumyi chunglie ama rue khu taata aa li dyi aa li nate ta ama hnapa thiyhring haapa phyi a hnyipa Khazing Saacapaa bie tana a cuo.

¹⁹Na rehriepa i pachang. Duena na hnyipa, zangna, na rehriepa hne palung pasiysa pata na ang lawpa zaw i pachang. Na za hrie taapa laata a hnang ta na hriepa hing a le vie tapa zaw i pachang. Cuorasala ica pasuenapa a cawta a aw:

²⁰Profet tana i cuo a ta te i changtaapa tie kha aparuvsuena tue riypa hne kuvtuezuv amaa bienapa sa ning riypata pacuv te a dungpa yi Jezebel kha na chawkhusapa hingta a cuo.

²¹A ngiepachiyna cuo kha i pi, cuorasala aparuvsuena hring taata a ngiepachiy khing vyi.

²²Mang tie, ama kha iehmang cunglie thaw'a ang te, ama hne nungvaathingsuena a tuepa tie zaw kha ama suena amaa ngiepachiy li kieca a ruvsapa te-angna na amaa taw aa.

²³A saata zaw kha i thie'a yi. Khrihsaabuv bangkhuo ta kama ca pathiypalung hne palungphya a mangpasiepa i cuopa kha ina pachang'a yi. Niema pakha cyicuo kha nama hriepa hne aa phuvpa a muo ica pi'a yi.

²⁴Cuorasala hingpa pacuvna hing a ziy lipa, chekha ta, ‘aa thuvpa Setaa bieparuv,’ ama tapa kha a cuv lipa, Thiatira lie a awpa niema aa ngaapa tie cunglie capa hmangriypa ca nama cunglie ca khang khing va yi ang.

²⁵Nama hnyipa kha i vawna te a cusa pata a patuv tie ung.

²⁶Tena hmung te i re kha a chuona te ta aa pazue pata a hriepa bangkhuo ca, mingphang zaw cunglie nawhnyina kha i pi'a yi.

²⁷Kama zaw i Paa'a taata nawhnyina i hmungpa haata iema kha nawhnyina i pi'a yi. Mingphang zaw cunglie thaakhuecahryi ta uvna[2] naw hne alyi bi haata dechipatlaa khuna naw kha i pi'a yi. Dyivaa aasiy zaw kha i pi'a yi.

²⁹Thlaapa ta khrihsaabuv tie'a luo a ripa hing naa a hnyipa bangkhuo ta naathlie mangyisue.