Read Lautu Chin Biephu 20 Bible Online

Biephu 20 - Lautu Chin bible

Biephu 20

¹Cakhutaata a kuv lieta dena a hnyi lipa khue tawh hne thaabuoliriy a lesapa a cyi nguoluopa avuoming pakha vuoruo taata a za cungpa kha i hmung.

²Ama ta hluoning pariy ta a cuopa riyhre, Khachie hne Setaa ta a cuopa kha patuv te kung thawkha a hre.

³Cawsaa zaw a dung li tlina riypa yita kung thawkha a chuona te cakhiy te, khue chung luo kha pathla te khaakhung te caa a khe. Cakhutaacata cuo pachangta chung pathliepa a cuo aa.

⁴Cakhutaata byithude zaw kha hmung ang te, a cunglie a tupa tie ca bie ripa khuna naw kha ama pi. Zingsuv kaw tehte ama khuo nakaw hne Khazing bie kawlieta ama luv ama tepa tie thlaapa zaw kha i hmung. Iema ca saahruo hne a kuvtuezuv kha abie lipa yi ta saahruo a hnangnapa zaw kha ama puo lie hne ama kuv lieta hnyi vayi. Iema ca kya hring yite Khrih hneta kung thawkha chung ama uv aa.

⁵(Aa tuo kaliepa a thiypa tie ca kung thawkha a tlingna te ta kya hring'a vayi). Capaca a yikhanapa thupakhaana ta a cuo.

⁶Yikha thupakhaana lieta a te rapa tie ca thluechiypa hne a pathepa tana ama cuo. Hingpa tie cunglie hing yihning thiyna ta naw hnyi vyi, cuorasala iema ca Khazing hne Khrih tluobyi ta cuo'a yite ama hneta kung thawkha ama uv aa.

⁷Kung thawkha a chuo taata Setaa ca a thawtlana taata pathliepa cuo'a te,

⁸alyi kiy paliy lieta a awpa Gog hne Magog tapa mingphang zaw kha dung riypata aa thu aa. Iema ca rie tuv riypata pahmya yite riyliy kielie viehnang zaa ama ta.

⁹Iema ca alyi khy ting hne hmangting khata cahraw yite mingpathepa tie awnapa hne Khazing duepa khypuv kha ama cadung. Cuorasala avuo taata myi za tla te a kuo diy yi.

¹⁰Cakhutaacata iema a dungpa yi Setaa kha saahruo hne profetpakhipa zaw awnapa kemyiliy luo ama thaw. Iema ca capa hmang lieca chungzuo ta chuozaa hrisaa pata ama cuo aa.

¹¹Cakhutaata a lepa byithude ruopa hne a cunglie a tupa pakha kha i hmung. Alyi hne vuoruo ca a hmiekung taata a ruo yite awna hmang hmung vayi.

¹²Cakhutaacata a thiypa a le a caw ta byithude hmielie amaa daapa hne caa-uv zaw ama pakepa kha i hmung. Hringna caa-uv ama tapa caa-uv hrangpa suokha zaw kha ama pake. Caa-uv chunglie aa capepa haata, a thiypa tie ca iema ama tuena haakhata bie ama ripa.

¹³Riyliy ta a chunglie a awpa a thiypa kha kya papya te, Thiyna hne Athiykhy zaw ta iema'a lie a awpa a thiypa tie kha kya papya yite, iema bangkhuo ca ama tuena haakhata bie ripa pata ama cuo.

¹⁴Cakhutaacata Thiyna hne Athiykhy ca myiliy luo kha ama thaw. Hingpa myiliy hing yihning thiyna ta a cuo.

¹⁵Hringna caa-uv lie a ming cape lipa bangkhuo ca myiliy chung luo ca ama thaw.