Read Lautu Chin Biephu 22 Bible Online

Biephu 22 - Lautu Chin bible

Biephu 22

¹Cakhutaata avuoming ta thlaluo haata a pasingpa hringna cavaa tiy kha ina pahmung, capa cavaa ca Khazing hne Tuvtaata byithude taata za lang te,

²khypuv liekhingkhuo lieta luopuv lie kha tathlyalya ta a lang. Cavaa kie kuovyicuo lieca a thyi phang hraa hlyihning kha thlakha phangkha ta thla ting ta a pathyipa hringna thingkung aw te, a hnaa ca mingphang zawdya cuota tluona a cuo.

³Chiesapa hmang suokha hmuo capa hmang lie ca aw'a vyi. Cuorasala capa khypuv lieca Khazing hne Tuvtaata byithude dyi aw'a te, a changtaapa[25] zaw ta ama kha amaa bie aa.

⁴A hmie kha hmung'a yite, a ming kha ama puo lie cape pata ama cuo aa.

⁵Capa lieca zuo aw li tli'a pata, myi-ing khena hne ning khena zaw a hu'a va tli, tahematapakieca Abyipa Khazing ca ama khena ta cuo'a te, iema ca chuozaa taata chuozaa te byi ama cuo aa.

⁶Cakhutaata avuoming cata, “Hingpa bie hing zangtluo aa tlapa hne a hmisipa ta ama cuo, tahematapakieca profet tie ama thlaapa zaw Khazing ta a cuopa Abyipa ta a vya cuo paluo riypa hmang kha pahmung sa riypata a avuoming kha a pathlie yi,” ina ta.

⁷“Mang tie, i vaw paluo aa! Hingpa caa-uv profet-biephu hing a ziypa ca thluechiypa tana a cuo”.

⁸Hingpa hmang a thyituv hne a hmungtuv hing kama Johan tana i cuo. Hingpa hmang thyi ang te i hmung tiyta naa pahmung sa tuv avuoming kha abie riypata a phyi thabaw lie i bu ca,

⁹ama ta, “Hinghaahingta tue kha! Kama zaw hing nama hne na viesaa[26] profet tie hne hingpa caa-uv chunglie aa capepa bie a ziypa tie haakhata changtaapa tana i cuo ra, Khazing kha abie hriy tie,” ina ta.

¹⁰Cakhutaaca ama ta, “Hingpa caa-uv chunglie aa capepa profet-biephu hing caakhe khah, tahematapakieca cuo na a ngie tli.

¹¹Hmang pha lipa a tuepa ca tue thluo sala, duv aa chiypa ca duv aa chiy pata hring thluo se. Cawsaa phapa ca a phapa kha tue pazue sala a pathepa ca a pathe pata hring pazue se,” ina ta.

¹²“Mang tie, i vaw patang aa; cawsaa bangkhuo kha ama hriepa cyicuo haata pi riypata lawmuo kha i zaa cyi.

¹³Kama ca Alfa hne Omega, a hmietaacepa hne a hnangcawcepa, a hruothuna hne a chuona tana i cuo,” a ta.

¹⁴Ama pang kha a pasuvpa tie ca thluechiypa tana ama cuo, hringna thingkung kha hnyina naw hne thlake taata khypuv chung luo a ngie khuna naw ama hnyi aa.

¹⁵Khypuv lelie a awpa tie ca uv tie hne ca-ie a thepa tie hne aparuvsuena a tuepa tie hne lie a nawpa tie hne kuvtuezuv abiepa tie hne hanghiepa kha tlechuo te a tuepa tie khatana ama cuo.

¹⁶Khrihsaabuv cuota tehtekhuona hne niema'a luo a avuoming zaa pathliepa ca Kama, Zingsuv tana i cuo. Kama ca David samingsahlaa, a thabaw cuo ang te dyivaa aasiy khepa tana i cuo.

¹⁷Thlaapa hne navaa a hnyi'a nangpa lesaanung khata, “Avaw tie,” a ta. A thyipa bangkhuo zaw ta, “A vaw tie,” ta yi se. Tiy a hriepa bangkhuo a vaw yi se. Hringna tiy a la khingpa bangkhuo a sepa ta a la yi se.

¹⁸Hingpa caa-uv lie profet-biephu a thyipa bangkhuo hing a raaringna ica pi yi: hingpa bie lie hing ahungtahmuo bie hrangpa a chachiy kieca Khazing ta capa cawsaa ca hingpa caa-uv chunglie capepa puvtlungpasana kha a chachiy aa.

¹⁹Ahung a cuo zaw hingpa caa-uv chunglie a awpa profet-biephu a thawpa ca Khazing ta hingpa caa-uv chunglie a capepa hringna thingkung taata a cu riypa hne khypuv pathepa chunglie a cu riypa kha a thawpa aa.

²⁰Hingpa bie bangkhuo tehte a khuotuv ta, “I vaw patang hrahring aa,” a ta. Amen. Abyipa Zingsuv, Avaw paatie!

²¹Abyipa Zingsuv Khrih vihnyina ca mingpathepa tie bangkhuo cunglie aw mangsue. Amen.[27]