Read Lautu Chin Biephu 4 Bible Online

Biephu 4 - Lautu Chin bible

Biephu 4

¹Cakhutaacata i mang ca, vuoruo lie ingchiypakaa suokha aa pahawpa kha i hmung. Hmyakaa haata paring te kama'a luo bie a zaa ri nguoluopa i thyi taapa ca, “Hingpa luo hing kya kie la hingpa khu taahingta khaapama a vya cuo aa tapa kha ica pahmung aa,” ina ta.

²Sungkhabala ta thlaapa ta bi ang te, vuoruo lie a tupa byithude suokha hne a cunglie a tupa pakha kha i hmung.

³Capa lie a tupa ca jasper lungvaa hne karnelian lungvaa haata khe te, byithude ca emerald lungvaa haata a tapa buvtuvruoriy ta a cadung.

⁴Byithude ca a hrangpa byithude suokiysuopaliy ta cadung yite, capa byithude zaw cunglie ca ama luv lie siyylakhuv a khuv yite pangruopa a buvpa uvthyi pakiypapaliy amaa tu.

⁵Byithude taacata thinghlaa a cakang te khalung aa thy. Byithude hmiekunglieca myisaa vuopa suosariy aw te, capa tie ca Khazing thlaapa suosariy ta ama cuo.

⁶Byithude hmiekunglieca thlaluo haata a pasingpa riyliy a aw. Byithude a kuo paliy lieca a hmie luo hne a hnang luo hne ming ta a bipa a hringpa saruopa sapaliy ama aw.

⁷A sakhanapa saruopa ca chingde hneta a lu te a sahningnapa saruopa ca cuetungpa hneta aa lu, a sathungna saruopa a hmie ca cawsaa hmie hneta a lu te, a sapaliynapa saruopa ca aa zulepa hmungthlu hneta aa lu.

⁸A hringpa saruopa sapaliy ca mathlaa suocaruv law hnyi yite ama chung luo hne ama le luo hne ming ta a bi diy. Chung hne zuo ta taw li pata hlaa sa yite, “A pathe, a pathe, a pathe, Abyipa Khazing A Lesyicepa, a zaa aw tlipa, a aw nguoluopa hne a vya aw riypatana a cuo.

⁹A hringpa saruopa tie ta byithude cunglie a tupa, chuozaa taata chuozaa te a hringpa ca rungnaana, pa-uvsathyina hne alawna ta ama pathuo sa.

¹⁰Cahaa cata ama pathuo sa ning ca uvthyi pakiypapaliy tie ca chuozaa taata chuozaa te a hringpa, byithude cunglie a tupapaa hmielie ca a bu yite amaa bie; ama byilakhuv kha byithude hmielie ca chi yite,

¹¹“Ma Byipaapa hne ma Khazing, Nama ca rungnaana, pa-uvsathyina hne cahrana cu tluo aa tlapa tana na cuo. Tahematapakieca, hmangting zawdya kha nama ta tue cate, Na khingna haata sapa hne a hringpa tana ama cuo.