Read Lautu Chin Biephu 5 Bible Online

Biephu 5 - Lautu Chin bible

Biephu 5

¹Cakhutaata byithude lie a tupa pakha kuv chunglie kha caataw suokha i hmung. Capa caataw ca a chung luo hne a hnang luo ta caa aa cape diy te caakhe suosariy ta amaa cung.

²Cakhutaata a lesyicepa avuoming pakha ta a ueryi lesapa ta, “Ahungma a caataw kha pahaw pata caakhe kha para riypata a tla aa?” a ta.

³Cuorasala vuoruo lie cuose, alyi lie cuose, alyi rawlie cuose, capa caataw ca pahaw pata a chung luo a mang khu riypa pakhahmuo aw vayi.

⁴Capa caataw ca pahaw pata a chung luo mang khu riypata aa tlapa pakhahmuo ama hmung khu li nakawta kama ca khuopuv ta i caa.

⁵Catiyta uvthyi pakhapa khata, “Caa khah, Judah phang, David ciyhruo ta a cuopa ca tena kha a hmung tli. Ama ta caakhe suosariy hne caataw kha a pahaw khu aa,” ina ta.

⁶Cakhutaata byithude hne a hringpa saruopa sapaliy a lala lie Tuvtaata aa daapa kha i hmung. Tuvtaata ca thie ciepa hneta aa lu. Kiy suosariy hne ming suosariy hnyi te, capa ming suosariy ca alyi cung bangkhuo luo pathliepa Khazing thlaapa pasariy tana a cuo.

⁷Ama cata vaa te, byithude cunglie a tupapaa cacuo luo kuv lie caataw ca a la.

⁸A la khupa hne a hringpa saruopa papaliy hne uvthyi pakiypapaliy tie ca tingtuo suokha law hne mingpathepa tie thlaachuona ta a cuopa rangpa-uepa hne a bipa siyy kuotung kha amaa hrie kaluo pata Tuvtaata hmiekunglie kha amaa vya bu.

⁹Hlaa thaapa kha ama sa: Nama ca caataw la riypa hne caakhe pahaw riypata naa tla, tahematapakieca nama ca ca thie yite, na thiyse ta, phangting, ryi ting, cawsaa ting hne ruo ting chung taata mingpathepa tie kha Khazing cuota na calyi tli.

¹⁰Iema ca ma Khazing rehrie riypata ruo suokha hne tluobyi ta tue yi cate, iema ta alyi hing ama uv aa,” ama ta.

¹¹Cakhutaaca i mang ca, byithude hne a hringpa saruopa tie hne uvthyi tie kha a cadungpa avuoming ri tie lipa tie ueryi kha i thyi.

¹²Ama ueryi a aw zawdya ta ama sapa ca, Ama thiepa Tuvtaata ca, cahrana hne hnyirungna hne singna hne lesyina hne, pa-uvsathyina hne rungnaana hne thluechiy kha hmung aa tla! ama ta.

¹³Cakhutaacata vuoruo hne alyi hne alyi raw hne riyliy hne ama chunglie a awpa sapa hmang zaw bangkhuo ta hlaa sa yite, Byithude cunglie a tupa hne Tuvtaata cunglie, thluechiyna hne pa-uvsathyina hne rungnaana hne lesyina ca chuozaa taa chuozaa te aw mangsue!” ama ta.

¹⁴Cakhutaaca a hringpa saruopa papaliy tie cata, “Amen!” ta yite a bu yite amaa bie.