Read Lautu Chin Biephu 6 Bible Online

Biephu 6 - Lautu Chin bible

Biephu 6

¹Cakhutaata Tuvtaata tah caakhe suosariy chung taata suokha a pahawpa kha i hmung. Cakhutaata a hringpa saruopa papaliy chung taa pakha ta khalung a thypa ueryi haata, “A vaw!”[3] a tapa kha i thyi.

²Mang ang te aruo ruopa sakha i hmung! A khangpapaa ta liy suokha a hnyi; byilakhuv kha pi yite tena hmung canyi lawmaw riypata a pyale.

³Caakhe suohningna kha a pahaw tiyta, a hringpa saruopa pahningna ta a upa kha i thyi.

⁴Aruo hrangpa sakha kya pya te a sepa ta a cuo. A khangtuvpapaa ca cawsaa pakha hne pakha amaa thie riypata chuelyi lie diena kha para riypata naw pi yite Zueziy lesapa zaw kha ama pi.

⁵Tuvtaata ca caakhe suothungna kha a pahaw tiyta, a hringpa saruopa pathungna ta, “A vaw!” tapata a upa kha i thyi. I mang ca aruo vawpa sakha i hmung. A khangtuvpapaa ta a kuv lie cyipathlienapa suokha aa hriepa kha i hmung.

⁶A hringpa saruopa papaliy hraw taata pakha ueryi haata i thyipa ca, “ning kha thavie[4] ta jungsacuo kilogram suokha, barli kie kilogram suothung, cuorasala Oliv chiytiy hne mingsuv tiy ca para khah!” a ta.

⁷Caakhe suopaliyna kha a pahaw tiyta, a hringpa saruopa papaliynapa ta, “A vaw!” tapata a upa ueryi kha i thyi.

⁸I mang ca a thluopadyapa a ruo sakha i hmung. A khangtuvpapaa ming ca Thiyna tapata cuote ama ca Hell ta a vya paziyle. Chuelyi chepaliychekha cunglie nawhnyina pi pata cuo yite, zueziy ta cuose, cakuo tlungna ta cuose, puvtlungna ta cuose, aa hruopa saruopa ta cuose cawsaa thie khuna naw kha ama hmung.

⁹Caakhe suopangaana kha a pahaw tiyta, Khazing bie kawlie cuose, tehte amaa khuona kawlie cuose ama thiepa thlaapa tie kha bienatluophie rawlie ta i hmung yi. Iema cata,

¹⁰“A Lesyicepa Abyipa, a pathepa hne a hmisipa, khatiy te khiyma hing chuelyi cawsaa tie hing bie ripa li pata hne ma thiyse kawlie phuv la li pata na aw'a yi?” tapata khuosa ta ama khi.

¹¹Iema pakha cyicuo ca pangruopa kha pi yite, iema haata thie ra riypata a cuopa ama changtaapa[5] tie hne ama uvnu hne sieta zaw[6] ama tlingna te ta sungkha a pahy caw riypata ama chang.

¹²Caakhe suocaruvna kha a pahaw tiyta, i mang ca aling khuopuv ta aa siy; ning ca pangcaw vawpa haata vaw te, thlaapa punglungpa ca thiyse haata aa li.

¹³Avuo aasiy zaw ca khysuv ta cahang te thyikuv hipa a kung taata a zungpa haata alyi luo ama za zung,

¹⁴Avuo ca caataw haata a vya kalang te a vie, tluo bangkhuo hne parala zaw ca ama awna taata ama palaw diy.

¹⁵Chuelyi siepahruo tie, uvtuv tie, riebyi tie, a hnyirungpa hne nawhnyituv tie, cawsaa bangkhuo, sii hne hya a zangpa bangkhuo ca lungkaraw lie hne alungpuvnung a lala lie amaa nu diy.

¹⁶Tluo hne alungpuvnung kha u yite, “Malie za vy ungla Tuvtaata hihaana taata hne byithude cunglie a tupa hmiekung taahingta malie nu thi tie ung;

¹⁷tahematapakieca ama hihaana ningkhue lepuv ca vya tlung te ahungma a ang khu the aa?” tapata ama khi.