Read Lautu Chin Biephu 7 Bible Online

Biephu 7 - Lautu Chin bible

Biephu 7

¹Cakhutaacata alyi kiy paliy lie avuoming papaliy amaa daapa kha i hmung. Alyi lie cuose, riyliy lie cuose, thingkung cunglie cuose a hruo li riypata thliy luopuv suopaliy kha ama patuv.

²Avuoming a hrangpa pakha kha a hringpa Khazing caakhe kha a hrie te ningchiyna luo taata a kya kiepa kha i hmung. Alyi hne riyliy para riypata cahrana ama pipa avuoming papaliy kha ue a suopuv ta,

³“Ma Khazing sii zaw kha ama puo lie caa ma khe diy hluo li yi alyi hne riyliy hne thingkungpa zaw kha para kha ung,” a ta yi.

⁴Cakhutaata Israel mingphang mekaa taata caa ama khepa bangkhuo ca thaw zakha thaw sawliy thaw paliy a cuopa kha i thyi.

⁵Judah phang chung taata thaw hraa hlyihning, Reubin phang chung taata thaw hraa hlyihning, Gad phang chung taata thaw hraa hlyihning,

⁶Asher phang chung taata thaw hraa hlyihning, Naftali phang chung taata thaw hraa hlyihning, Manasseh phang chung taata thaw hraa hlyihning,

⁷Simeon phang chung taata thaw hraa hlyihning, Levi phang chung taata thaw hraa hlyihning, Issakhar phang chung taata thaw hraa hlyihning,

⁸Zebulun phang chung taata thaw hraa hlyihning, Josef phang chung taata thaw hraa hlyihning, Benjamin phang chung taata thaw hraa hlyihning ta ama cuo.

⁹Cakhutaacata i mang ca ahung -tahmuo ama ri tie li riypa cawsaa-zaapuv kha i hmung. Iema ca ruo ting, phang ting hruo ting taa hne ryi ting taata cuo yite, pangruopa amaa hryi, ama kuv lie chanungbachuv hnaa a cyi yite byithude hmielie hne tuvtaata hmielie kha amaa daa.

¹⁰Khuopuv ta khi yite, “Khuona ca byithude cunglie a tupa ma Khazing hne Tuvtaata huopa tana a cuo!” ama ta.

¹¹Avuoming bangkhuo ca byithude hne uvthyi tie hne a hringpa saruopa tie kha cadung yite amaa tu, byithude hmielie kha a khuv yite Khazing kha amaa bie.

¹²Amen! Thluechiy hne rungnaana hne singna hne palungtluona bie hluona hne pa-uvsathyina hne cahrana hne lesyina ca chuozaa taata chuozaa te ma Khazing huopa ta cuo mangsue! Amen,” ama ta.

¹³Cakhutaata uvthyi zaw hraw taata pakha ta kama kha, “Pang ruopa a buvpa tie hing ahung zaw tama ama cuo? Khaapa taata ma amaa vaw? ina ta.

¹⁴Kama ta, “Abyipa, nama na a pachang ciy,” i ta. Cakhutaa ama ta, “Iema ca ruvnaana lesapa chung taata a vya lawpa tie tana ama cuo. Ama pang kha tuvtaata thiy lie pasuv yite a ruo phaalaa tli,” ina ta.

¹⁵Canakaw catana Khazing byithude hmielie aw yite, Biena-ing chunglie chung hne zuo hne amaa bie. Byithude lie a tupa khata iema ca a mangchiy yi.

¹⁶Ama nang diy li tli'a pata, ama tiy zaw hrie'a va tli; ningsaa ta e li tli'a pa yi ta, a lingpa khaapatahmuo riethyi pi'a va tli yi.

¹⁷Tahematapakieca byithude liekhingkhuo lie a awpa Tuvtaata ca ama tuvkhietuv cuo'a te, Ama ta iema kha hringna tiyhnaa luo aa chiy'a yi. Khazing ta ama mingthliy bangkhuo kha a hruvpa thluv'a yi.”