Read Lautu Chin Biephu 9 Bible Online

Biephu 9 - Lautu Chin bible

Biephu 9

¹Cakhutaata a papangaanapa avuoming ta a hmyakaa kha a tung ca, avuo taata alyi luo aasiy suokha a za tlapa kha i hmung. Ama ca dena a hnyi lipa khue pahawna tawh kha ama pi.

²Dena a hnyi lipa khue kha a pahaw ca capa khue chung taacata a lesapa susana myi taata a pyapa myikhuv haakhata myikhuv ca a tawpuv ta a kya pya.

³Myikhuv taacata khawbyapa kha pya yite chuelyi luo ama za cung. Iema ca tluociekuo cahranapa haapa kha pi pata ama cuo.

⁴Chuelyi lieta a awpa aphuv cuose, tuokhaapa a hringpa kung bangkhuo hne thingkungpa zaw kha para li pata ama puo lie Khazing caakhe a hnyi lipa cawsaa kyalya dyi kha para riypata changpa ama cuo.

⁵Cawsaa kha thie tlung li pata thlapangaa chung hrisaana naw ama pi. Cawsaa ama hrisaa tiyta a pasana zya ca tluociekuo ta cawsaa a be ning haa khatana a pasa.

⁶Capa ningkhue thue ca cawsaa ta thiyna kha huv'a yite, cuorasala hmung'a vayi, thiy khing hringhruo'a yite, cuorasala thiyna ta iema kha a ruose'a yi.

⁷Capa khawbyapa tie hmingsuo ca rie tuv riypata pachie paciepa aruo hne tana amaa lu. Ama luv lieca siyy ta tuepa byilakhuv haapa kha a khuv yite, ama hmie ca cawsaa hmie kha ama lu.

⁸Ama suo ca canung suo kha lu te, ama haa ca chingde haa kha a lu.

⁹Thaa cacunghnaapakaw haapa phuvhling kha hnyi yite, ama mathlaa pu ca rietuvna luo a ruole nguoluopa aruole pu hne tana aa lu.

¹⁰Malie a be thepa tluociekuo lahmyi haapa kha hnyi yite, capa lahmyi lieca cawsaa kha thlapangaa chung riethyi a pi khupa cahrana ama hnyi.

¹¹Dena a hnyi lipa khue avuoming kha siepahruo ta hnyi yite, a ming ca Hebru ryi ta Abaddon[7] ta yite Grik ryi ta Apollyon[8] ama ta.

¹²A suokhanapa ciy aa chiypa ca chuo te, hingpa khu taahingta a vaw riypa a hrangpa suohning a aw kalie.

¹³Cakhutaata pacaruvnapa avuoming ta a hmyakaa kha a vya tung ca, Khazing hmiekunglie a awpa siyy bienatluophie kiy suopaliy[9] taakhata ueryi i thyi.

¹⁴Hmyakaa a hnyipa a pacaruvnapa avuoming cata, “Cavaa lesapa Zufrates lie ama hrepa avuoming papaliy kha pathlie ung,” a ta.

¹⁵Cacuonakawta avuoming papaliy ca ama pathlie. Iema ca capa cuo, capa ning, capa thlaa, capa kung, lie hrahring ta chuelyi cawsaa chethungchekha thie riypata chi paciepa ama cuo.

¹⁶Aruo rieka mekaa ca million zahning ama ta, tapata i thyi.

¹⁷Muocuo i hmungpa lieta i hmungpa aruo hne a khangtuv tie ca hinghaahingta a cuo. A khangtuv tie ca myi haata a sepa, safaiar lungvaa haata a dungpa, ke haata a mepa cacunghnaapakaw kha amaa pakaw. Amaa ruo luv ca chingde luv kha lu te, ama pakaa taakhata myi, myikhuv hne ke kha ama pya.

¹⁸Capa ama pakaa taata a pyapa myi, myikhuv hne ke taata a pyapa puvtlungna cata cawsaa chethungchekha ca a thie yi.

¹⁹Aruo zaw ama cahrana ca ama pakaa lie hne ama lahmyi lietana a aw. Ama lahmyi ca pariy haakhata cuote luv ama hnyi; capa cata ruvnaana kha ama pi.

²⁰Capa puvtlungna ta a thie lipa, aa ngaapa cawsaa zaw ca ama kuv ta ama tuepa hmang kawlie kha a ngiepachiy vayi: Setaa abie kha cuose, siyy, ngu, thiyhring, alung hne thing ta ama tuepa, a hmung the lipa, a thyi the lipa hne a cakuo the lipa kuvtuezuv abie zaw kha thuse hlyi vayi.

²¹Cahlyitaw taata cawsaa ama thiena, malie ama ca-iena, aparuvsuena ama tuena hne ama paruv thena taa zaw ta a ngiepachiy vayi.