Read Lelemi Ala Kalɔ Buse 1 Bible Online

Ala Kalɔ Buse 1 - Lelemi bible

Ala Kalɔ Buse 1

¹Na kayawi kalɔ kesekɔ ƒui ni, Katɔti údie katɔ ku kalɔ.

²Na kalɔ kammɔ keeebo udu ɔdi. Na lɛla lɛdi lɛnɔ liiibo-ka kemmo, na lɛdisa kani náƒɔ kalɔ kammɔ lɛlɔ ƒui. Na Katɔti Kɔyu kani nkɛ mɔɔví ntu bɔni náƒɔ-ka anumi mmɔ ƒui lɛlɔ.

³Amu na Katɔti údie lɛdi ɔnini, “Bukeye bubo,” na bukeye búbo.

⁴Na Katɔti ɔ́nu ka bukeye bɔmmɔ bɔdia. Na úle bukeye bɔmmɔ na lɛdisa kudɔ.

⁵Na bukeye bɔmmɔ na Katɔti ɔ́lɔ ɔnii kadi nwaa, na ɔ́lɔ lɛdisa ɔnii usien. Na useyi údu na kadi kégye na limeyi lideedi lɛ́vi.

⁶Amu na Katɔti údie lɛdi ɔnini, “Kuƒi kuduo ntu bɔmɛni kemmo, na kule ntu bɔmɛni bɔsiku ɔkpanadi kudɔ.”

⁷Anwuɔsu Katɔti ɔ́ya na kuƒi kúduo ntu bɔmmɔ kemmo na kúle ntu bɔni nwi kalɔ lɛlɔ ɔ́siku bɔni nkya katɔ kudɔ. Na úbo úte lɛni kani.

⁸Na kuƒi kɔmmɔ na Katɔti ɔ́lɔ ɔnii kayaa. Na useyi údu na kadi kégye na limeyi linyɔdi lɛ́vi.

⁹Amu na Katɔti údie lɛdi ɔnini, “Ntu bɔni náƒɔ kayaa kalɔ ni, bɔsala likpo linwi. Na kesii kani nákwii kakɔ kalɛ.” Na úbo úte lɛni.

¹⁰Na kesii kani nákwii mmɔ na Katɔti ɔ́lɔ ɔnii, “kalɔ,” na ntu bɔni násala lɛlɔ buwi likpo linwi mmɔ na Katɔti ɔ́lɔ ɔnii, “ɛpu.” Na Katɔti ɔ́nu ka ɔdia.

¹¹Na údie lɛdi ɔnini, “Kalɔ kamɛni kakwɛ egyii ku livo lidu lidu ku adingyii lidu lɛnɔ.” Na úbo úte lɛni.

¹²Anwuɔsu kalɔ kammɔ kénwini lɛku ku livo ku adingyii lidu lidu. Na Katɔti ɔ́nu ka ɔdia.

¹³Na useyi údu na kadi kégye na limeyi lɛtɛdi lɛ́vi.

¹⁴Amu na Katɔti údie lɛdi ɔnini, “Bukeye lidu libo kayaa na bule usien ku kadi nwaa ntɛ. Na ɔmɛni ɔbla likposela ute uwi ku emeyi ku akwa.

¹⁵Na bukeye lidu lɛmɛni lɛsɔ lɛkya kayaa na buteekeye teewi kalɔ lɛlɔ.” Na úbo úte lɛni.

¹⁶Katɔti ɔ́bla bukeye bonwu akpa anyɔ. Bukeye bunengudi bɔni ndi ɔƒɛ bɔdanku kadi nwaa, na kɔbuli kɔni nsia lɛnɔ kɔdanku usien. Na ɔ́bla ayabi lɛnɔ.

¹⁷Katɔti ɔ́ya na bukeye lidu lɛmɛni ƒui lɛkya kayaa. Na buukeye teewi kalɔ lɛlɔ.

¹⁸Na ɔ́ya na bukeye bɔmɛni bɔɔdi kadi nwaa ku usien lɛlɔ, na buule lɛdisa ku bukeye ntɛ. Na Katɔti ɔ́nu ka ɔdia.

¹⁹Na useyi údu na kadi kégye na limeyi linedi lɛ́vi.

²⁰Amu na Katɔti údie lɛdi ɔnini, “Kɔbɛ ku kɔkpaku ku ketu kemmo bebuo benengudi lidu lidu bɛƒɔ ntu bɔmmɔ kemmo ƒui. Na lɛla biala lɛni mbo avwi lɛnɔ liteeveyi taavi kayaa.”

²¹Ɔmmɔ ɔsu Katɔti údie bebweyi benengudi bani nkya ɛpu kemmo ku babambadi bani mɔɔví ntu kemmo ɔdi biala ku nwuna udu. Na údie bani mbo avwi lɛnɔ, ɔdi biala ku nwuna udu. Na Katɔti ɔ́nu ka ɔdia.

²²Katɔti úte-ma kusɛ kusɛ na ɔ́su ɔnini, “Bɛwɔ na bimomo na bɛƒɔ ntu bɔmmɔ kemmo ƒui. Na bani mbo avwi lɛnɔ bemomo.”

²³Na useyi údu na kadi kégye na limeyi lɛlɔndi lɛ́vi.

²⁴Amu na Katɔti údie lɛdi ɔnini, “Bebuo lidu lidu bɛƒɔ kalɔ kamɛni ƒui lɛlɔ, bebuo benengudi ku bebliidi ku bebweyi lidu lidu ƒui.” Na úbo úte lɛni.

²⁵Anwuɔsu Katɔti ɔ́bla bebuo benengudi ku bebliidi ku bebweyi lidu lidu, na báƒɔ kalɔ kammɔ ƒui lɛlɔ. Na Katɔti ɔ́nu ka ɔdia.

²⁶Amu na Katɔti ɔ́su ɔnini, “Bɛya na bɔbla ukyuli na ɔlɛ-bu na bula udu kenye kalɛ na utaadi ɛpu ku kalɔ ku kayaa bebweyi ƒui lɛlɔ.”

²⁷Ɔmmɔ ɔsu Katɔti údie ukyuli na ɔ́lɛ-nwu na nwuna udu kenye. Údie-ma, na badi ɔnana ku uleku.

²⁸Na Katɔti úte-ma kusɛ kusɛ, na ɔ́su-ma ɔnini, “Bɛwɔ biyile kalɔ kamɛni ƒui lɛlɔ. Na bɛdi-ka lɛlɔ ku bebweyi bani ƒui nkya-ka kemmo.”

²⁹Ɔmmɔ kama ni, Katɔti ɔ́su bekyuli bammɔ ɔnini, “Binu! Líti livo lidu ku adingyii lidu ƒui líte-mii nnii enwini bina adila.

³⁰Na líti livo líte bebuo bani nkya kalɔ lɛlɔ ku baasɛ ku bebweyi ƒui nnii linwini bana adila.”

³¹Katɔti ɔ́nu ala ani ƒui na ɔ́bla na adia-nwu sɔsɔ. Na useyi údu na kadi kégye na limeyi lɛkundi lɛ́vi.