Read Lelemi Ala Kalɔ Buse 11 Bible Online

Ala Kalɔ Buse 11 - Lelemi bible

Ala Kalɔ Buse 11

¹Na uwi ɔmmɔ kemmo ni, lɛdi linwi kani na bayawine ƒui bátaatɛmi.

²Na ka bekyuli bammɔ beelie taata na béti bésela ɔƒɛ katukɔ kakɛ ni, bébedu kalɔ ƒiaa kadi lɛlɔ. Mmɔ na básɔ bátu bana keliekɔ na kesii kani baalɔ banii Sinear na bélie mmɔ.

³Amu na básu lɛlɔ banii, “Bibo na bɛya na bɔnwu lɛti na bukulo atimbɔ na buƒi-nya kaduɛ.” Na atimbɔ ani na béƒi mɛni na béti bátu bana lɛtɔ lɛmmɔ.

⁴Na básu lɛlɔ banii, “Bibo na bɔda ɔma unengudi ɔdi bute lɛlɔ. Na bɔtu katu taasia ɔtɔ bonwu ɔdi na ɔkuku útédu Katɔti kudɔ. Na bɔƒɔ lɛnyi linengudi na bulegyingya bulakya kayawi.”

⁵Amu na Unwoti ɔ́yu úbo kalɔ na úbanu ɔma ku ɔtɔ ɔni na bekyuli bammɔ badaku bɔtu mmɔ.

⁶Mmɔ na ɔ́su ɔnini, “Si bekyuli bamɛni badi benwi na baatɛmi lɛdi linwi na béese kalɔ badaku lɛla lɛmɛni udu bɔbla ni, amu lɛla lɛdi liiibo na si béti-ni kasusu na balakana bɔbla.

⁷Anwuɔsu bɛya na bɔyu busie-ma kudɔ. Na butéƒu bana lɛdi lɛni na baatɛmi kalɛ na ɔdi ɔsɔ ulenu ɔkpanadi butemi kalɔ.”

⁸Ɔmmɔ ɔsu ni, Unwoti úgyingya-ma ɔ́kya kayawi kammɔ ƒui lɛlɔ na báda ɔma unengudi ɔmmɔ bɔda báya.

⁹Anwuɔsu baalɔ lɛla lɛni nálɛ mmɔ banii Babel ɔni kalɔ ndi buƒu bɔkya, ɔsika mmɔ na Unwoti ɔ́ya na bayawine lɛdi lɛni na bátaatɛmi liƒu lɛkya. Na ɔ́si ɔmmɔ kama ni, Unwoti ɔ́ya na bégyingya bákya kayawi kammɔ ƒui lɛlɔ.

¹⁰Sem lɛlɔ kɔtɛ na bɔdubo bunu mɛni. Ɔbla aani akwa anyɔ kama na ɔnantu ɔmmɔ bɔna kama uwi ɔni na Sem ɔ́ƒɔ akwa eti anyɔ ni, úbawɔ ubi ɔni baalɔ Arƒaksad.

¹¹Na Arƒaksad bɔwɔ kama ni, Sem ulie ngba akwa eti leevu (500) na ɔ́wɔ bananabi ku belekubi bamba asa na úkpi.

¹²Uwi ɔni na Arƒaksad ɔmɛni ɔ́bi lɛlɔ ɔ́ƒɔ akwa avlaatɛ-ɛlɔ ni, úbawɔ Sela.

¹³Na Sela bɔwɔ kama ni, Arƒaksad ɔmɛni úlie ngba akwa eti maane ku ɛtɛ (403) na ɔ́wɔ bananabi ku belekubi bamba asa na úkpi.

¹⁴Ɔmmɔ kama ka Sela ɔ́ƒɔ akwa avlaatɛ ni, ɔ́wɔ Eber.

¹⁵Na Eber bɔwɔ kama ni, Sela úlie ngba akwa eti maane ku ɛtɛ (403) na ɔ́wɔ bananabi ku belekubi bamba asa na úkpi.

¹⁶Uwi ɔni na Eber ɔ́ƒɔ akwa avlaatɛ ku ine ni, ɔ́wɔ Peleg.

¹⁷Na Peleg ɔmɛni bɔwɔ kama ni, Eber úlie ngba eti maane ku avlaatɛ (430) na ɔ́wɔ bananabi ku belekubi bamba.

¹⁸Ɔmmɔ kama ka Peleg ɔ́ƒɔ akwa avlaatɛ ni, úbawɔ Reu.

¹⁹Na Reu bɔwɔ kama ni, Peleg úlie ngba akwa eti ene ku yaalenwi (209) na ɔ́wɔ bananabi ku belekubi bamba asa na úkpi.

²⁰Uwi ɔni na Reu ɔ́ƒɔ akwa avlaatɛ-inyɔ ni, ɔ́wɔ Serug.

²¹Na Serug bɔwɔ kama ni, Reu úlie ngba akwa eti ene ku maatɛ (207) na ɔ́wɔ bananabi ku belekubi bamba asa na úkpi.

²²Ka Serug ɔ́ƒɔ akwa avlaatɛ ni, ɔ́wɔ Nahor.

²³Na Nahor bɔwɔ kama ni, Serug úlie ngba akwa eti ene (200) na ɔ́wɔ bananabi ku belekubi bamba asa na úkpi.

²⁴Ɔmmɔ kama ka Nahor ɔ́ƒɔ akwa aavlanyɔ-yaalenwi ni, ɔ́wɔ Tera.

²⁵Na Tera bɔwɔ kama ni, Nahor ulie ngba akwa eti anyɔ ku leevu-yaalenwi (119) na ɔ́wɔ bananabi ku belekubi bamba asa na úkpi.

²⁶Ka Tera ɔ́ƒɔ akwa liti ku aavlanyɔ ni, ɔ́wɔ Abram ku Nahor ku Haran.

²⁷Tera ngba etemila na bɔdubo bunu mɛni. Tera ɔ́wɔ Abram ku Nahor ku Haran. Na Haran ɔ́ta ɔ́wɔ Lot.

²⁸Haran ɔmɛni úbekpi na ɔma ɔni baalɔ banii Ur na Kaldea kalɔ lɛlɔ kesii kani na báwɔ-nwu uwi na ɔti ɔ́mu ulie ngba.

²⁹Abram ku Nahor ƒui bébeti beleku. Na Abram ulekudi baalɔ banii Sarai, na Nahor ulekudi baalɔ Milka ɔni ndi Haran ubidi ulekubi. Haran ɔmɛni náwɔ Milka ku Iska.

³⁰Ɔƒɛni Sarai ni, ɔdi udinkɔ na útawɔ kudii.

³¹Tera ɔ́kpanku ubidi Abram ku Haran ubidi Lot ɔni ndi Tera uwɔ, ku Abram ulekudi Sarai ɔni ndi Tera ɔmɛni ubi ulekubi. Na bana ƒui báyu ulu bási Ur mmɔ na Kaldea kalɔ lɛlɔ ka beteesie Kanaan kalɔ lɛlɔ. Nsu ka bébedu kalɔ kani baalɔ banii Haran ni, báda keliekɔ mmɔ na bélie mmɔ.

³²Tera úlie ngba akwa eti ene ku alɔ (205) na úkpi na Haran kalɔ kammɔ lɛlɔ.