Read Lelemi Ala Kalɔ Buse 12 Bible Online

Ala Kalɔ Buse 12 - Lelemi bible

Ala Kalɔ Buse 12

¹Na uwi ɔmmɔ kemmo ni, Unwoti ɔ́su Abram ɔnini, “Tɔlɔ ƒula kalɔ lɛlɔ, ku ƒula bekyuli kudɔ ku ƒ'ɔti kaduli na eteesie kalɔ kani na matina-a lɛlɔ.”

²“Ndubɔya na kadi bekyuli pii balɛ basiku-ɔ lɛlɔ. Na ndubute-ɔ kusɛ kusɛ. Ndubɔya na aƒɔ lɛnyi geen, na bekyuli badubɔsia-a lɛlɔ na bakɛ kusɛ kusɛ

³Bekyuli bani mete-ɔ kusɛ kusɛ ni, ami lɛnɔ ndubute-ma kusɛ kusɛ. Na ukyuli biala ɔni mewida-a ni, ami lɛnɔ ndubo-nwu buwida. Ndubute kalɔ lɛlɔ bekyuli ƒui kusɛ kusɛ ɔkɛnku awɔ lɛlɔ.”

⁴Anwuɔsu Abram ɔ́tɔlɔ mmɔ aani kalɛ na Unwoti ɔ́su-nwu kalɛ, na Lot lɛnɔ ɔkɛ ɔsiaku-nwu. Na uwi ɔni na Abram ɔ́yu ulu ɔ́si Haraan ni, ɔ́ƒɔ akwa liti ku aavlanyɔ-ɛlɔ.

⁵Na útiku ulekudi ku ɔnwani ubidi Lot ku bana ala ani ƒui na bebo ku bana bebi ku kabla bablane bani ƒui na bákɛ básiku Haraan mmɔ badanku béselaku Kanaan, na bétéduo mmɔ sɔsɔ.

⁶Abram úsie ɔ́vi kalɔ kammɔ ƒui kemmo útédu kesii kani na More kugyii kunengudi kunye na Sekem. Na uwi ɔmmɔ kemmo ni, na Kanaan kadi bekyuli nli mmɔ.

⁷Unwoti údie lɛlɔ ɔ́tina Abram na mmɔ na ɔ́su-nwu ɔnini, “Ƒula uwɔ na ndubo kalɔ kamɛni buti bute.” Anwuɔsu ɔ́tu lɛkpabi lɛdi na mmɔ úte Unwoti ɔni nédie lɛlɔ ɔ́tina-nwu.

⁸Ka ɔ́si mmɔ ni, údi úsie abi ammɔ kudɔ na Betel ɔƒɛ katukɔ kakɛ na ɔ́lɛ nwuna adi kevo na mmɔ na Betel ku Ai lɛma ntɛ. Anwuɔsu Betel ɔkya ɔƒɛ kanukɔ na Ai ɔkya ɔƒɛ katukɔ. Mmɔ lɛnɔ ɔ́lɛ lɛkpabi na ɔ́kpali Unwoti.

⁹Ka Abram ɔ́ta mmɔ ni, úti anumi ɔ́tina Negev kalɔ kakwiidi.

¹⁰Na uwi ɔmmɔ kemmo ni, kɔka bonwu kɔdi kúbo kalɔ kammɔ ƒui lɛlɔ, anwuɔsu Abram úsie Egyipte na útákya mmɔ uwi ɔdi na kɔka kpakplaa kɔmmɔ ɔsu.

¹¹Asa na badubuduo Egyipte ni, Abram ɔ́su ulekudi Sarai ɔnini, “Ngyi kalɛ na aadia bɔnu.

¹²Na si Egyipteƒuɔ bánu-ɔ ni, badubo bɔsu banii, ‘Ulekudi na ɔdi mɛni.’ Na badubo-mi bɔdu na baya na awɔ elie ngba.

¹³Anwuɔsu su-ma ka mina ɔnwani ulekubi na adi. Na ɔkɛnku awɔ ɔsu badubo-mi bɔda kaduɛ na basɔ baládu-mi.”

¹⁴Ka Abram úbeduo Egyipte kalɔ lɛlɔ ni, Egyipteƒuɔ bánu ka uleku ɔmmɔ ɔdia sɔsɔ.

¹⁵Na ka Ƒarao benengu bammɔ bánu-nwu ni, bémwi-nwu bátina Ƒarao na bákpanku-nwu bésienku nwuna ɔga kaduli mmɔ.

¹⁶Ɔ́da Abram kaduɛ na Sarai ɔsu na béte-nwu baƒonu ku ɔmantɛ bakɔ ku bebuo ala betine bagyani ku beledi ku bananabi kabla bablane ku belekubi kabla bablane ku baƒlumu lɛnɔ.

¹⁷Nsu Unwoti ɔ́ya na ɔlɛ kpakplaa ɔdi úbo Ƒarao ku nwuna kaduli bekyuli na Abram ulekudi Sarai ɔsu.

¹⁸Ɔmmɔ ɔsu Ƒarao ɔ́tala na bátálɔ Abram béboku-nwu na úye-nwu ɔnini, “Bi na ɔdi na ábla-bu mɛni, na átasu-mi ka ƒ'ulekudi na ɔdi?

¹⁹Na bi ɔsu na ásu-mi anii, ‘Mina ɔnwani ulekubi na ɔdi.’ Ɔmmɔ ɔsu na líti-nwu lísienku mina kaduli ka unwini-mi uleku. Aanu ƒ'ulekudi, ɔƒaani tiku-nwu na biteesie!”

²⁰Amu na Ƒarao úbo nwuna benengu bammɔ ɔda na Abram lɛlɔ na bédie-nwu ulu ku ulekudi ku ala ani ƒui na ubo na bátɔlɔ.