Read Lelemi Ala Kalɔ Buse 17 Bible Online

Ala Kalɔ Buse 17 - Lelemi bible

Ala Kalɔ Buse 17

¹Uwi ɔni na Abram ɔ́ƒɔ akwa liti ku aavlene-yaalenwi ni, Unwoti údie lɛlɔ ɔ́tina-nwu na ɔ́su-nwu ɔnini, “Ami ndi Katɔti Ɔyikune Ƒui. Mɔɔwia ka elie ngba sɛɛn ɔni na aláƒiɔ-mi.

²Na lɛla lɛni na muunyimiku-ɔ mɛni ni, ndubɔlɛ-ni ugyii lite-ɔ na adubɔwɔ bebi na bemomo kaduɛ.”

³Mmɔ ni, Abram ɔ́yu úbi kalɔ na Katɔti ɔ́su-nwu ɔnini,

⁴“Ami ni, lɛla lɛni na muunyimiku-ɔ ndi ka awɔ ndubɔbla kadi bekyuli pii ɔti.

⁵Ɔmɛni ɔsu ni, basɔ baaadubo-ɔ bɔlɔ banii Abram, ɔni kalɔ ndi Ati ɔni náƒɔ lɛnyi. Mmomu badubɔlɔ-ɔ banii Abraham, ɔsika líti-ɔ lɛ́bla kadi bekyuli pii ɔti.

⁶Na ndubɔya na ƒula bawɔ bemomo na benwini kadi pii bekyuli na badi benwini baga muedi.

⁷Ndubɔlɛ bunyimi bɔmɛni ugyii. Na amu ndubɔkya ami ku-ɔ ntɛ ku ƒula bawɔ ku kaba bekyuli bani ƒui masia-a kama uwi ƒui. Na ami ndi ƒula Katɔti na madi ama lɛnɔ Katɔti.

⁸Kanaan kalɔ kani lɛlɔ na adi ɔƒɔ mɛni ni, ndubuti-ka lite awɔ ku ƒula bawɔ na ami ndubɔbla bana Katɔti.”

⁹Ɔmmɔ kama ni, Katɔti ɔ́su Abraham ɔnini, “Awɔ ni, ɔlɛka adi mina bunyimi lɛlɔ, awɔ ku ƒula bawɔ ku kaba bekyuli bani ƒui masia-a kama.

¹⁰Ɔmɛni ndi bunyimi bɔni muute awɔ ku ƒula bawɔ bani masia-a kama na ɔdi ka bɛdi-mu lɛlɔ. Ɔnanabi biala na bina akɔ ni, ɔlɛka bekulo-nwu lego.

¹¹Ago bukulo bɔmmɔ ndubɔtina bunyimi bɔni nkya ami ku-mii ntɛ.

¹²Na ƒula kaba bekyuli bani ƒui mebo ni, ɔnanabi biala na bana akɔ ɔni náƒɔ emeyi maane ni, ɔlɛka bekulo-nwu lego. Bananabi bani na báwɔ bákya bina kɔduli iye bani na bíye ku egulabi bɛ́siku baƒɔ kudɔ na baaadi bina bebi geen muedi ɔlɛka bikulo-ma ago.

¹³Bina kɔduli bebi badi o-o buye na biye-ma ku egulabi o-o ni, ɔlɛka bekulo-ma ago. Mina lɛla lɛni na línyimi ka bɛbla bina ɔlɔna ni, ɔdi bunyimi bɔni ndubɔkya uwi ƒui.

¹⁴Ɔnana biala na útekulo tɔ lego ni, ɔdubukulo kɔna kɔni nkya anwu ku mina bekyuli ntɛ, ɔsika útadi mina bunyimi lɛlɔ.”

¹⁵Katɔti ɔ́sɔ ɔ́su Abraham ɔnini, “Ƒ'ulekudi Sarai ni, ɔƒaamu badubɔlɔ-nwu Sara.

¹⁶Ndubute-nwu kusɛ kusɛ. Na ɔdi litemi geen ka anwu ɔlati ɔdubɔwɔ ɔnanabi ute-ɔ. Ndubute-nwu kusɛ kusɛ ɔni na ɔdubɔya na unwini kaba bekyuli pii uni. Na baga bani madi bekyuli lɛlɔ badubɔlɛ basiku-nwu lɛlɔ kemmo.”

¹⁷Mmɔ ni, Abraham ɔ́yu úbi kalɔ na úye lɛlɔ ɔnii, “Ami ɔnana ɔni náaƒɔ akwa eti anyɔ mɛni ku ukyuli ɔdi bɔdubɔkana ubi ɔdi bɔwɔ? Na Sara lɛnɔ ɔ́ɔƒɔ akwa liti ku aavlene. Ɔdubɔkana kaƒɔ bɔda?” Litemi lɛmɛni lɛ́da-nwu lɛma, na ɔ́ma.

¹⁸Amu na Abraham ɔ́su Katɔti ɔnini, “Si adubute Ismael kusɛ kusɛ na ulie ngba ni, nka ɔdia!”

¹⁹Mmɔ na Katɔti ɔ́su ɔnini, “Ɛɛn! Nsu ƒ'ulekudi Sara ɔdubɔwɔ ɔnanabi ute-ɔ. Na adubɔsia-nwu lɛnyi anii Isak. Ndubɔlɛ mina bunyimi ugyii ku anwu ɔmmɔ aani bunyimi bɔni makya ami ku-nwu ntɛ usela uwi ƒui ku nwuna bawɔ lɛnɔ ntɛ.

²⁰Na Ismael anwu ni, línu lɛla lɛni na éye-mi. Sɔsɔ ni, ndubute-nwu kusɛ kusɛ na lɛya na ɔwɔ bebi pii na bemomo geen. Anwu ndubɔdi lɛlɔ badine leevu-inyɔ ɔti. Na ndubɔya na nwuna kadi bekyuli bakɛ ɔyikun geen.

²¹Nsu mina bunyimi ni, ami ku Isak bawɔ ntɛ na ndubɔlɛ-mu ugyii. Na anwu ndi ubi ɔni na Sara ɔdubɔwɔ ute-ɔ na lɛkwa lɛni ndubo aani uwi ɔmɛni kalɛ.”

²²Na ka Katɔti ɔ́wɔlɔ Abraham bɔtɛmiku ni, ɔ́tɔlɔ úsie katɔ.

²³Limeyi lɛmmɔ kani lɛlɔ ni, Abraham úkulo lego. Na ubidi Ismael ku bananabi bani nkya nwuna kaduli mmɔ ku bani mɔɔbla-nwu kabla ƒui lɛnɔ ni, békulo-ma ago aani kalɛ na Katɔti ɔ́su-nwu.

²⁴Abraham ɔ́ƒɔ akwa liti ku aavlene-yaalenwi asa na úkulo lego.

²⁵Na ubidi Ismael ɔ́ƒɔ akwa leevu-atɛ.

²⁶Ɔmɛni ɔsu Abraham ku ubidi Ismael ƒui békulo ago limeyi linwi lɛmmɔ lɛlɔ.

²⁷Na lɛni kani na bananabi bani ƒui nkya Abraham kaduli ku bani mɔɔbla-nwu kabla, anwu ku ama ƒui békulo ago.