Read Lelemi Ala Kalɔ Buse 20 Bible Online

Ala Kalɔ Buse 20 - Lelemi bible

Ala Kalɔ Buse 20

¹Na uwi ɔmmɔ kemmo ni, Abraham ɔ́ta kesii kani na úlie mmɔ na úsie Negev kalɛkɛ lɛlɔ. Na útélie Kades ku Sur lɛma ntɛ. Na ɔ́ƒɔ lɛlɔ ɔ́kya Gerar ɔma kemmo uwi blii ɔdi.

²Mmɔ ka Abraham údie ulekudi Sara ɔ́tina bekyuli bammɔ ni, ɔ́su-ma ɔnini, “Mina ɔnwani ulekubi na ɔdi.” Ɔmmɔ ɔsu Abimelek ɔni ndi Gerar ɔma ɔga ɔ́tala na bátákpanku Sara béboku-nwu.

³Nsu Katɔti údie lɛlɔ ɔtina-nwu na kɔna kemmo limeyi lɛdi usien na ɔ́su-nwu ɔnini, “Uleku ɔni na áƒɔ eenwíni awɔ ɔdi mɛni ɔsu ni, si ékpi muedi ɔdia-a utulo. Ɔsika uleku ɔni nli kɔgya na ɔdi.”

⁴Na uwi ɔmmɔ kemmo ƒui ni, Ɔga Abimelek útesie tɔ Sara kudɔ. Anwuɔsu úye Katɔti ɔnini, “Unwoti, bɔkyula na adubo kadi kani nátabla likpidi lɛdi?

⁵Ɔɔɔdi Abraham ɔlati násu-mi ɔnini, ‘Mina ɔnwani ulekubi na ɔdi’? Lɛla lɛni na lɛ́bla ni, mina kayi kaladu-mi kɔtɔ. Na aanu-mi enu na katɔ.”

⁶Amu na Katɔti ɔ́su-nwu na kɔna kemmo ɔnini, “Sɔsɔ na ɔdi, ngyi ka lɛla lɛni na ábla ni, ƒula kayi kaladu-ɔ kɔtɔ. Ɔmmɔ ɔsu na ńtaya na ablaku-nwu likpidi lɛdi iye etuku-nwu na aƒiɔ-mi.

⁷Anwuɔsu ni, ya na uleku ɔmmɔ ɔsɔ unwini usie ɔgyani kudɔ, ɔsika Katɔti Kenye Udiene na ɔdi. Na ɔdubɔkpali katɔ na ƒula lili na elie ngba. Nsu si átaya na ulekudi ɔmmɔ ɔsɔ unwini ni, na ati ka awɔ ku ƒula badi ƒui bɛdubo bukpi.”

⁸Limeyi lɛni nsia ɔtanta tutuutu ni, Abimelek ɔ́lɔ nwuna benengu ƒui ɔ́sala. Na ka údie kenye na ɔ́su-ma ala ani ƒui nálɛ ni, báyia geen.

⁹Amu na Abimelek ɔ́lɔ Abraham úboku na ɔ́su-nwu ɔnini, “Bi ndi lɛla lɛni na ábla-bu mɛni? Munuu lɛla lɛdi na lɛ́bla lɛ́ƒiɔ-ɔ ɔsu na áyɔ ka likpidi bonwu lɛmɛni udu libo ami ku mina kadi bekyuli lɛlɔ? Ábla-mi lɛla lɛni na balabla ukyuli.”

¹⁰Na Abimelek úye Abraham ɔnini, “Bi ndi-ɔ kasusu kani ɔsu na ábla lɛla lɛmɛni udu?”

¹¹Mmɔ na Abraham údie kenye ɔnini, “Na mina bɔnu kemmo ni, lɛ́su nnii, ‘Kadi kamɛni bekyuli balayia Katɔti, na ɔƒɛni kalɛ badubo-mi bɔdu na mina uleku ɔsu.’

¹²Na ɔmmɔ kama lɛnɔ ni, mina ɔnwani na ɔdi sɔsɔ na kalɛ na báwɔ-bu kenye. Ɔsika mina ɔti ubi ulekubi na ɔdi, ina ka ɔɔɔdi mina uni náwɔ-nwu.

¹³Ɔƒɛni uwi ɔni na Katɔti ɔ́ya na lɛ́tɔlɔ mina ɔti kaduli na línwini ukyuli ɔni nkɛ mɔɔví ni, lɛni na lɛ́su mina uleku nnii, ‘Ƒula bɔyɔ bɔni na mɔɔwia ka edie atina-mi ni, amu ndi ka kesii biala na búsie ni, na asu anini, “Ɔnana ɔmɛni ni, mina ɔnwani ɔnanabi na ɔdi.” ’ ”

¹⁴Amu na Abimelek úti baƒonu ku ɔmantɛ bakɔ ku bananabi ku belekubi kabla bablane na uti-ma úte Abraham, na ɔ́sɔku ulekudi Sara lɛnɔ úte-nwu.

¹⁵Ɔmmɔ kama ni, Abimelek ɔ́su Abraham ɔnini, “Aanu mina kalɔ nwi késela. Teesie na etélie kesii biala na aayɔ́.”

¹⁶Amu na ɔ́su Sara ɔnini, “Líti sika ɔƒualadi nwuna bɔkɔku kenye apim unwi muute ƒ'ɔnwani ɔnanabi na bɔƒiɔ bɔni na lɛ́ƒiɔ-ɔ ɔsu. Na ɔmɛni ɔɔtina na bekyuli bamɛni ƒui anumi ka álɛ sɛɛn na likpidi biala kudɔ.”

¹⁷Ɔmmɔ kama ni, Abraham ɔ́kpali Katɔti na Abimelek lili na Katɔti ɔ́bwi-nwu ku ulekudi ku nwuna kaduli bekyuli ƒui na ɔ́lɛmi-ma kɔwɔ ulu,

¹⁸ɔsika nka Katɔti útile Abimelek ku nwuna kaduli bekyuli ƒui kɔwɔ kenye, ɔkɛnku Abraham ulekudi Sara litemi lɛmɛni ɔsu.