Read Lelemi Ala Kalɔ Buse 32 Bible Online

Ala Kalɔ Buse 32 - Lelemi bible

Ala Kalɔ Buse 32

¹Ɔmmɔ kama ni, Yakob lɛnɔ ɔ́sɔ úti nwuna ulu na ɔ́tɔlɔ. Na ulu lɛlɔ mmɔ ni, útásiaku Katɔti batu badi.

²Uwi ɔni na ɔ́nu-ma kani na ɔ́su ɔnini, “Mɛni ndi Unwoti Katɔti kakyakɔ.” Ɔmmɔ ɔsu na ɔ́sia mmɔ lɛnyi ɔnii Mahanaim.

³Yakob ɔ́tala batu badi ɔnii bagyu batɔ-nwu. Na ɔ́tala-ma ɔ́kya ɔnwani Esau na kalɛkɛ kani baalɔ Seir na Edom kalɔ kemmo.

⁴Na ɔ́kya-ma litemi kenye ɔnini, “Bisie na bitásu mina ati Esau bɛnini, ‘Ami, ƒula kabla ɔblane Yakob, mɔɔyá na ati ka Laban kudɔ na lísie ńtákya uwi ɔni návi mɛni ƒui.

⁵Na mbo ɔmantɛ bakɔ ku bebuo ala betine ku baƒonu ku bese ku kabla bablane bananabi ku belekubi. Na ɔƒaani ni, mina Ati, mɔɔsia-a kenye kamɛni kalɛ na mina lɛlɔ lɛda-a ebiti.’ ”

⁶Ka batu bammɔ bénwini bébo ni, bábasu Yakob banini, “Búsie ƒula ɔnwani Esau kudɔ. Na anwu ɔlati ɔsia ulu ɔdubo ubasiaku-ɔ. Na ɔdanku nkyuli eti maane ubunku lɛlɔ.”

⁷Ka únu lɛni ni, kayi kékpoku-nwu, na liƒu lɛnɔ lɛ́da-nwu geen. Ɔmmɔ ɔsu ni, Yakob úle nwuna basiakune bammɔ akpa anyɔ. Lɛni kani na úle bebuo bammɔ ku bebuo ala betine bani mbo keƒu mmɔ kemmo akpa anyɔ.

⁸Na ɔbla kasusu ɔnini, “Ɔƒɛni kalɛ si kekpo ɔsu na Esau ɔ́ta ni, si úkpo lɛkpa linwi ni, na lɛkpa lɛkladi ani lɛdubo kekpo kammɔ bukeli.”

⁹Ɔmmɔ kama ni, Yakob ɔ́kpali katɔ na úvele ɔnini, “O mina Unwoti, Abraham Katɔti ku Isak Katɔti, awɔ ɔni násu-mi anini, ‘Nwini na eteesie ƒula kalɔ lɛlɔ ku ƒula lɛlɔ bekyuli kudɔ na ndubɔya na enu ku akɔkɔ eyi-ɔ.’

¹⁰Ńtamanku ƒula lɛƒɔndia lɛni na aabla-mi ku kalɛ na aadi ƒula etemila lɛlɔ teete ami ƒula kabla ɔblane. Mina ugyii ɔdadi kani nkya-mi kɔnu uwi ɔni na lɛ́via Yordan Ketu kamɛni. Na ɔƒaani ni, mina kaduli bekyuli lɛti pɛ bubo esu akpa anyɔ.

¹¹Muuvele-ɔ nnii die-mi na lɛlɛ sɛɛn na mina ɔnwani Esau enu kemmo. Ɔsika mɔɔyia ka ɔdubo bɔta na ubekpoku-mi ku mina beleku ku bana bebi.

¹²Nsu awɔ násu-mi anini, ‘Ndubɔnu ka enu ku akɔkɔ éyi-ɔ. Na ndubɔya na ƒula bebi ku bawɔ bemomo aani ɛpu kɔnwinimi. Na ukyuli ɔdi ulakana-ma bɔka.’ ”

¹³Yakob ɔ́tɛ mmɔ usien ɔmmɔ. Na ala ani na ɔda ɔkɛ ni, ɔ́ƒuna etela adi ka uti ute ɔnwani Esau.

¹⁴Etela ammɔ ndi bese beledi eti ene (200) ku betukpa aavlanyɔ. Baƒonu beledi eti ene ku bagyani aavlanyɔ.

¹⁵Bebuo ala betine bani mbo keƒu avlaatɛ ku bana bebi. Ɔmantɛ bakɔ aavlene ku bagyani leevu. Bebuo ala betine bamba beledi aavlanyɔ ku bagyani leevu.

¹⁶Bebuo bamɛni ƒui na Yakob úti ɔ́kya nwuna kabla bablane lɛkɔkɔ ka bataanu-ma lɛlɔ bana esu esu ammɔ na ɔ́su-ma ɔnini, “Bɛgyu bataatɔ-mi na bɛya na kuƒi kɔkya bebuo bammɔ ntɛ na bana esu ammɔ kenye.”

¹⁷Ɔmmɔ kama ni, ɔ́su kabla ɔblane ɔni ntɔ ɔnini, “Si mina ɔnwani Esau úbasiaku-ɔ na úye ɔnini, ‘Ɔma kabla ɔblane na adi, na wɛ na ésela na ɔma mbo bebuo bani ntɔ-ɔ lɛtɔtɔ mmɔ’ ni,

¹⁸na edie kenye anini, ‘Ƒula ɔnwani Yakob ɔni ndi-ɔ kabla ɔblane mbo-ma. Na badi etela ani na ɔnii nti mboku awɔ nwuna ati Esau. Ɔƒɛni ni, anwu ɔlati ɔkpɛ kama ɔdubo.’ ”

¹⁹Ɔmmɔ kama ni, ɔ́su nwuna kabla ɔblane unyɔdi ku ɔtɛdi ku bani ƒui mɔɔkpanku bebuo esu esu ammɔ ɔnini, “Si Esau úbasiaku-mi ni, na bɛsu-nwu lɛla lɛni kani na lɛ́su bina kabla ɔblane ɔkpana ɔni ntɔ mmɔ.

²⁰Na bitayiƒala ka bɛsu-nwu bɛnini, ‘Ƒula kabla ɔblane Yakob ɔkpɛ kama ɔdubo.’ ” Yakob ɔ́su-ma lɛni ɔsika ɔ́bla kasusu ɔnini, “Ndubuti etela ani na líti lɛ́tualaku lɛtɔtɔ mɛni lɛyala-nwu kaƒɔ. Na ɔmmɔ kama si uwi ɔni na ami ku-nwu búbasa anumi ku anumi ni, ɔƒɛni kalɛ ɔdubo enu bugyingya na ɔƒɔ-mi.”

²¹Ɔmmɔ ɔsu Yakob ɔ́ya na etela ammɔ ágyu átɔ. Nsu anwu ɔlati ɔ́ƒɔ lɛlɔ ɔ́tɛ mmɔ usien ɔmmɔ na kesii kani na ɔ́da keliekɔ mmɔ.

²²Usien ɔmmɔ ni, Yakob ɔ́ta na útiku nwuna beleku inyɔ bammɔ ku nwuna kaduli kabla bablane beleku inyɔ. Na útiku nwuna bebi leevu-unwi bammɔ na bávia Yabok Ketu.

²³Ka ɔ́viaku-ma ɔ́wɔlɔ ni, ɔ́viaku nwuna akɛla ammɔ lɛnɔ ƒui.

²⁴Ɔƒɛni Yakob lɛti kani nébu na ketu ɔvi ɔmɛni. Mmɔ na ɔnana ɔdi úbo úbekpoku-nwu laa útédu ka kadi kégye.

²⁵Ka ɔnana ɔmmɔ ɔɔɔdaku tɔ Yakob lɛlɔ bɔkana bɔdi ni, ɔ́wɔ Yakob kasɔma likubi na líkpeli.

²⁶Mmɔ na ɔnana ɔmmɔ ɔ́su Yakob ɔnini, “Ya na nteesie, ɔsika kadi kéegye.” Ka ɔ́su-nwu lɛni ni, Yakob lɛnɔ udie kenye ɔnini, “Lɛɛɛdubo-ɔ kuƒi bute amu ntu éte-mi kusɛ kusɛ.”

²⁷Amu na ɔnana ɔmmɔ úye-nwu ɔnini, “Dɛ na baalɔ-ɔ?” Mmɔ na Yakob údie kenye ɔnini, “Ami baalɔ Yakob.”

²⁸Amu na ɔnana ɔmmɔ ɔ́su Yakob ɔnini, “Asɔ aladi lɛnyi anii Yakob. Mmomu bekyuli badubɔlɔ-ɔ banii Israel, ɔsika énye asiaku Unwoti Katɔti ku bekyuli na ádi lɛlɔ.”

²⁹Mmɔ ni, Yakob ɔ́su ɔnini, “Buvele, lɔ ƒula lɛnyi te-mi.” Nsu ɔnana ɔmmɔ úye-nwu ɔnini, “Bɔsu na ada anii aaagyi ukyuli ɔni mɔɔtɛmiku-ɔ?” Na mmɔ ni, úte-nwu kusɛ kusɛ na kesii kani na benye mmɔ.

³⁰Ɔmmɔ ɔsu ni, Yakob ɔ́sia mmɔ lɛnyi ɔnii Peniel, na ɔ́su ɔnini, “Lɛ́sia mɛni lɛnyi lɛni, ɔsika lɛ́nu Unwoti Katɔti anumi ku anumi na útayila-mi ngba.”

³¹Uwi ɔni na ɔkɛ Paniel mmɔ ni, kadi káata, na ɔkɛ ɔɔtu ɔgba taakya ka nwuna kasɔma likubi líkpeli ɔsu.

³²Ɔmmɔ ɔsu ni, Israel kadi bekyuli balákun bebuo kasɔma likubi lɛna kpɛtɛ kpɛtɛ lɛni mma-nwu lɛlɔ mmɔ. Ɔsika mmɔ geen nékpeli Yakob mmɔ.