Read Lelemi Ala Kalɔ Buse 33 Bible Online

Ala Kalɔ Buse 33 - Lelemi bible

Ala Kalɔ Buse 33

¹Ka Yakob úti úsela na ɔ́talaku anumi katɔ ni, ɔ́nu ka ɔnwani Esau ɔ́si ɔdubo na ɔdanku nkyuli eti maane (400). Ɔmmɔ ɔsu úle bebi bammɔ kemmo na basiaku nwuna beleku bammɔ ku nwuna kaduli kabla bablane belekubi inyɔ bammɔ bun bun.

²Ɔ́ya na belekubi kabla bablane bammɔ ku bebi badi batɔ. Na Lea ku bebi bamba basia. Na Rahel ku Yoseƒ bakpɛ kama ƒui.

³Ɔƒɛni anwu ɔlati ɔ́gyu ɔ́tɔ-ma ƒui na uuboku lɛlɔ kalɔ taatina ɔnwani Esau laa maatɛ na ulu lɛlɔ asa na badubɔsa geen.

⁴Nsu Esau úkeli útásiaku Yakob na ɔ́kya-nwu kɔgbu na úbo enu ɔ́bala-nwu na anumi énye-ma ntu na lɛlɔyɔ ɔsu.

⁵Na ka Esau ɔ́talaku anumi katɔ ni, ɔ́nu beleku bammɔ ku banamu bammɔ na úye Yakob ɔnini, “Ɔma bene nsiaku-ɔ mɛni?” Amu na údie kenye ɔnini, “Bebi bani na Unwoti Katɔti úte ami ƒula kabla ɔblane na lɛ́wɔ na nwuna lɛƒɔndia ɔsu na badi.”

⁶Ɔmmɔ kama ni, kabla bablane belekubi bammɔ ku bana bebi báni béde na béboku eli kalɔ.

⁷Na Lea ku nwuna bebi basia na ama lɛnɔ béboku eli kalɔ. Na kawɔlɔkɔ ni, Rahel ku Yoseƒ lɛnɔ bébeduo na ama lɛnɔ bákya eli kalɔ.

⁸Ka báwɔlɔ lɛni ni, Esau úye Yakob ɔnini, “Bebuo esu esu pii ani na lɛsiaku mɛni ni, bi na adanku?” Mmɔ ni, Yakob údie kenye ɔnini, “Ati, buti na líti-ma muute-ɔ kalɛ na mina lɛlɔ lɛda-a ebiti.”

⁹Amu na Esau ɔ́su Yakob ɔnini, “Mbo ala pii kukuuku, anwuɔsu ya na awɔ adi lɛnɔ eteese-ɔ.”

¹⁰Nsu Yakob údie kenye ɔnini, “Buvele na nda-a, oowo! Si mina lɛlɔ lɛ́da-a ebiti bɔdi ni, amu ƒɔ mina etela ani na líti muute-ɔ. Ɔsika kalɛ na lɛda lɛlɛ-ɔ anumi na lɛnu-ɔ ni, use-mi aani kalɛ na lɛnu mina Unwoti Katɔti anumi. Anwuɔsu kalɛ na égyingya enu na áƒɔ-mi ku kayi ƒaa mɛni ni,

¹¹muuvele-ɔ nnii ƒɔ mina etela ani na lɛ́ya na béti béboku-ɔ. Ɔsika Unwoti Katɔti ɔ́bla-mi lɛƒɔndia na lɛla biala na mɔɔwia ni, mbo-ni.” Na ka Yakob unye kpakplaa lɛni ɔsu ni, Esau ɔ́ƒɔ etela ammɔ.

¹²Ɔmmɔ kama ni, Esau ɔ́su Yakob ɔnini, “Ɔƒaani ni, ya na buteesie na lɛsiaku-ɔ kama.”

¹³Nsu Yakob ɔ́su Esau ɔnini, “Mina Ati, agyi ka bebi bammɔ bátabi tɔ lɛlɔ. Na ɔƒɛni lɛnɔ ɔlɛka lɛnu baƒonu ku ɔmantɛ bakɔ benidi bani nda bebi mmɔ lɛlɔ kaduɛ. Na si búkeliku-ma usi na búsie ulu umodi ɔmmɔ limeyi linwi ni, badubo bukpi ƒui.

¹⁴Ɔmmɔ ɔsu, mina ati, mɔɔyɔ́ si awɔ ágyu atɔ. Na lɛkpanku-ma nteeboku buɛɛ buɛɛ kalɛ na bebuo lisu lɛmmɔ badubɔkana busie kenye. Na lɛnu banamu bammɔ lɛnɔ na mbasiaku-ɔ na Seir kalɔ lɛlɔ.”

¹⁵Mmɔ na Esau ɔ́su ɔnini, “Amu ya na lɛnyonu mina bekyuli badi lite-ɔ.” Amu na Yakob ɔnini, “Ati, bi ɔsu na ɔlɛka asɔ abla ɔmmɔ udu? Awɔ, si mina lɛlɔ lɛ́da-a kubiti kani ni, ɔ́bɔ.”

¹⁶Ɔmmɔ ɔsu ni, Esau ɔ́yu ulu limeyi lɛmmɔ na úti úsela Seir.

¹⁷Na Yakob anwu ka bégyingyaku lɛlɔ ni, ɔ́tɔlɔ úsie kesii kani baalɔ Sukot na ɔ́tu nvo bɔni kemmo na anwu ku nwuna badi badubɔkya. Na ɔ́bla ayu úte nwuna bebuo lɛnɔ. Na ayu ani na ɔ́tu mmɔ ɔsu na baalɔ mmɔ ku ɔmwi ɔmɛni banii Sukot.

¹⁸Ka Yakob ɔ́tɔlɔ Mesopotamia kalɔ lɛlɔ mmɔ ni, úbeduo Sekem na Kanaan kalɔ lɛlɔ buɛɛ. Mmɔ ni, ɔ́sɔ ɔ́lɛ kevo bamba. Na si enye mmɔ ni, aanu Sekem ɔma unengudi ɔmmɔ teemene.

¹⁹Na mmɔ ni, Yakob úti sika ɔƒualadi ebi eti anyɔ na úye kalɔ kadi. Mmɔ na ɔ́da keliekɔ. Na kalɔ kammɔ ni, úye-ka ɔ́siku Sekem ubidi Hamor bebi kudɔ.

²⁰Na kalɔ kammɔ kemmo ni, ɔ́tu lɛkpabi na ɔ́sia-ni lɛnyi ɔnii El Elohe Israel.