Read Lelemi Ala Kalɔ Buse 35 Bible Online

Ala Kalɔ Buse 35 - Lelemi bible

Ala Kalɔ Buse 35

¹Ɔmmɔ kama ni, Unwoti Katɔti ɔ́su Yakob ɔnini, “Teesie Betel na etélie mmɔ. Na atu lɛkpabi na mmɔ ete Unwoti Katɔti ɔni nédie lɛlɔ ɔ́tina-a uwi ɔni na eekeli ƒ'ɔnwani Esau.”

²Anwuɔsu Yakob ɔ́su nwuna kaduli bekyuli ku bani ƒui nkya-nwu kudɔ ɔnini, “Biti baƒiɔ udu biala nse ɔdi kudɔ ƒui bivaakun. Na bɛbla lɛlɔ kedee na bɛvumana bina adala.

³Ɔmmɔ kama na bibo na buteesie Betel kesii kani na ndubɔtu lɛkpabi lite Unwoti Katɔti. Anwu nénu-mi bɔkpali uwi ɔni na ala eekpóku-mi, na ɔ́gyumana-mi kesi kesii na lɛ́vi.”

⁴Ka ɔ́su-ma lɛni ni, bálɛku baƒiɔ lidu ƒui béboku-nwu na Yakob úku-ma ɔ́kya kugyii bonwu kɔdi nnye mmɔ kalɔ na Sekem mmɔ.

⁵Nwuna kama ni, báyu ulu na bátɔlɔ. Na Unwoti Katɔti ɔyikun ɔni na kadi kammɔ bekyuli bánu ɔsu ni, liƒu lɛ́da-ma na Yakob ku anwu badi lɛlɔ ɔsu ni, bátakana na basia-ma kama.

⁶Yakob ku anwu badi bébedu Betel kesii kani basɔ baalɔ banii Lus.

⁷Mmɔ na ɔ́tu lɛkpabi na ɔ́sia-ni lɛnyi ɔnii El Betel, ɔsika mmɔ na Unwoti Katɔti údie lɛlɔ ɔ́tina-nwu uwi ɔni na uukeli ɔnwani Esau.

⁸Na uwi ɔmmɔ kemmo Yakob ulekudi Rebeka ubo ulekubi ɔni nátaanu-nwu kaduli lɛlɔ. Ulekubi ɔmɛni baalɔ Debora, úbekpi na báva-nwu na kugyii bonwu kɔmmɔ kani kalɔ si ási Betel áyu ésela kada kakɛ. Ɔmmɔ ɔsu baalɔ kugyii kammɔ Keku Kugyii iye Alon Bakut na bana butemi kemmo.

⁹Uwi ɔni na Yakob únwini ɔ́si Mesopotamia kalɔ lɛlɔ kama ƒui ni, Unwoti Katɔti ɔ́sɔ údie lɛlɔ ɔ́tina-nwu na úte-nwu kusɛ kusɛ.

¹⁰Mmɔ na Unwoti Katɔti ɔ́su-nwu ɔnini, “Ƒula lɛnyi ndi Yakob, nsu bekyuli basɔ baaadubo-ɔ bɔlɔ banii Yakob, mmomu badubɔlɔ-ɔ banii Israel.” Anwuɔsu ɔ́sia-nwu lɛnyi ɔnii Israel.

¹¹Amu na Katɔti ɔ́su-nwu ɔnini, “Ami ndi Unwoti Ɔyikune Ƒui. Wɔ na bimomo! Kadi kadi bekyuli badubɔlɛ basi ƒula kadi bekyuli akɔ. Na baga baga badubɔlɛ basi-ɔ lɛlɔ kemmo.

¹²Na kalɔ kani na líti líte Abraham ku Isak ni, aka kani na líti muute-ɔ. Na kalɔ kamɛni na ndubuti lite ƒula kaba kemmo bebi.”

¹³Ka Katɔti ɔ́su-nwu ɔmɛni ɔ́wɔlɔ ni, ɔ́tɔlɔ mmɔ na ɔ́sɔ únwini úsie katɔ.

¹⁴Ɔmmɔ kama ni, Yakob úti lɛtabi lɛdi únyene aani lɛkpa lɛdi ute Unwoti Katɔti na kesii kammɔ kalɛ na utaakali lɛla lɛni nálɛ mmɔ. Na úti ntɛ bɔdi úwi lɛtabi lɛmmɔ lɛlɔ. Lɛni kani na úti nnɔmii bɔdi úwi-ni lɛlɔ.

¹⁵Na kesii kani na Unwoti Katɔti únye ɔ́tɛmiku-nwu mmɔ ni, Yakob ɔ́sia lɛnyi ɔnii Betel.

¹⁶Na mmɔ bulie kama ni, básɔ báta bésela Eƒrata. Na ulu lɛlɔ ni, kawɔƒɔ kébo kaadu Rahel na keekpóku-nwu geen. Na liluku geen lɛnɔ nébu asa na beduo Eƒrata.

¹⁷Ka kɔwɔ kɔmmɔ kɔdaku-nwu bude ɔsu ni, uleku ɔni mɔɔƒɔ́-nwu kɔwɔ ɔ́kya-nwu ɔkplu. Na ɔ́su-nwu ɔnini, “Sɔ tayia. Ubi ɔnanabi na ɔdi.”

¹⁸Na ka ɔdaku bɔyula ni, Rahel ɔ́sia ubi ɔmmɔ lɛnyi ɔnii Ben-Oni. Nsu ubi ɔti anwu ɔ́lɔ-nwu ɔnii Benyamin, na nwuna kalɔ ndi ubi ɔni na naaaƒianku.

¹⁹Ɔmmɔ kama ni, Rahel úkpi na báva-nwu na Eƒrata ulu lɛlɔ mmɔ kesii kani baalɔ Betlehem.

²⁰Yakob úti lɛtabi lɛdi ɔ́lɛ kaƒiɔtɔ kammɔ lɛlɔ aani lɛkpa. Na úbalɛ ɔmwi limeyi lɛmɛni lɛlɔ ni, ɔdi likposela lɛni mɔɔtina Rahel Kaƒiɔtɔ.

²¹Amu ka bésie anumi blii ni, Yakob ɔni lɛnɔ na basɔ baalɔ Israel ni, ɔ́sɔ ɔ́tu nvo bɔdi na kesii kani baalɔ Migdal Eder kama kakɛ blii.

²²Uwi ɔni na Israel ku anwu badi bakya kalɔ kammɔ kemmo ni, ubidi Ruben ku ɔti ulekudi Bilha bátɛ na ɔti úbenu lɛla lɛmɛni. Bebi leevu-inyɔ na Yakob ɔ́wɔ.

²³Lea bebi bani na ɔ́wɔ úte Yakob ndi Ruben ɔni ndi Yakob ubi unengudi. Nwuna kama báwɔ Simeon ku Lewi ku Yuda ku Isakar asa na Sebulon.

²⁴Rahel bebi bani na ɔ́wɔ ndi Yoseƒ ku Benyamin.

²⁵Na Bilha ɔni ndi Rahel ulekubi kabla ɔblane bebi ndi Dan ku Naƒtali.

²⁶Silpa ɔni ndi Lea ulekubi kabla ɔblane bebi ndi Gad ku Aser. Bebi bamɛni na báwɔ béte Yakob ɔni na bákya Mesopotamia kalɔ lɛlɔ.

²⁷Na Yakob ulu busie kemmo ni, úbedu ɔti kudɔ na bana ɔma Mamre ɔni na ude Kiriat Arba ɔni basɔ baalɔ banii Hebron. Mmɔ na Abraham ku Isak bélie dii.

²⁸Akwa ani na Isak ɔ́ƒɔ na nwuna ngba bulie kemmo ndi eti atɛ ku avlaatɛ.

²⁹Ɔmmɔ kama úbekpi na bésie-nwu ulu na ɔ́tɔlɔ úsie ɔti bene kudɔ. Isak úlie útu uwi geen asa na úbenwini kama na Yakob ku Esau báva-nwu.