Read Lelemi Ala Kalɔ Buse 37 Bible Online

Ala Kalɔ Buse 37 - Lelemi bible

Ala Kalɔ Buse 37

¹Kanaan kalɔ kani kemmo na Yakob ɔti ɔ́kya ni, mmɔ kani na Yakob lɛnɔ úlie.

²Yakob lɛlɔ kɔtɛ na bɔdubo bunu mɛni. Uwi ɔmmɔ kemmo ni, Yoseƒ ɔdi okloƒu ɔni náƒɔ akwa leevu-maatɛ. Na bebuo lɛlɔ na útaanu anwu ku nwuna banwani. Na bana ƒui bási beleku inyɔ bani na ɔti úti kaƒɔ kemmo. Beleku bammɔ ndi Bilha ku Silpa. Nwuna banwani bamɛni ɔbladu ɔɔɔdia ɔsu ni, úbasu ɔti ngba bɔni na belie.

³Ɔƒɛni ni, Yoseƒ ɔti Israel ni, ɔ́ɔbi lɛlɔ geen asa na ɔ́wɔ Yoseƒ ɔsu ni, ɔɔyɔ́ Yoseƒ geen. Ɔmmɔ ɔsu ni, ɔ́ya na bédi awu gyɔlɔɔ ɔdi ɔni mɔɔdia bɔnu geen béte Yoseƒ.

⁴Ka nwuna banwani bánu báti ka bana ɔti ɔɔyɔ́ Yoseƒ teetulo-ma ɔsu ni, balátɛmiku-nwu ku lɛdi buɛɛ munu munu. Na beekisi-nwu.

⁵Yoseƒ úgye kɔna kɔdi. Na ka ɔ́su nwuna banwani kɔna kɔmɛni ni, ɔ́ya na basɔ beekisi-nwu teebu.

⁶Limeyi lɛdi ni, ɔ́su nwuna banwani ɔnini, “Bise atu na binu kɔna kɔni na lígye.

⁷Lígye kɔna ka bunye bɔɔnwa kamu teenyimi esu esu teewi. Kɔnakunwi ni, mina lisu lɛ́ta línye ligeen. Na amii adi ébo ábaka ámana ami ɔdi. Na áyɔlɔ eli ákya ami ɔdi kalɔ.”

⁸Mmɔ ni, nwuna banwani béye-nwu banini, “Bɔkali na ada anii awɔ ndubo-bu lɛlɔ butaadi?” Ɔmɛni ɔsu bukisi bɔmmɔ bɔ́kɔ katɔ búbu na kɔna kɔni na úti ɔ́su-ma ɔsu.

⁹Na ɔmmɔ kama ni, ɔ́sɔ úgye kɔna kɔdi na ɔ́sɔ ɔ́su nwuna banwani ɔnini, “Bɛsɔ binu kɔna bamba kɔni na lígye. Lɛ́nu ka ɔƒɛ ku kɔbuli ku ayabi leevu-unwi eeboku lɛlɔ kalɔ teete-mi.”

¹⁰Ka útásu ɔti lɛnɔ kɔna kɔni na úgye na nwuna banwani anumi ni, ɔti ɔ́dɔnku-nwu na ɔ́su-nwu ɔnini, “Bi kɔna na égye mɛni. Litemi geen na lɛdi mɛni ka ƒ'ini ku ƒula banwani ku ami ɔlati bɔdubo lili kalɔ bɔkya bute-ɔ?”

¹¹Ɔmmɔ ɔsu nwuna lɛlɔ líbo liigyie nwuna banwani anumi, nsu ɔti úti litemi lɛmɛni ɔ́kya kasusu kemmo.

¹²Na uwi ɔmmɔ kemmo ni, Yoseƒ banwani bákpanku bana ɔti bebuo bésienku kadikɔ na alakpi akɔ na Sekem kudɔ.

¹³Na Israel ɔ́su Yoseƒ ɔnini, “Agyi kesii kani na ƒula banwani bákpanku bebuo bésienku kadikɔ na alakpi akɔ na Sekem kudɔ. Bo, na lɛtala-a bana kudɔ.” Amu na údie kenye ɔnini, “Ati, ngyi mmɔ kaduɛ.”

¹⁴Mmɔ na ɔ́su-nwu ɔnini, “Sie na atánu si ƒula banwani ku bebuo bammɔ ƒui bakya kaduɛ na lɛla lɛdi lítabla ɔdi. Na asɔ enwini ebo abasu-mi.” Amu na údie-nwu ulu ɔ́si Hebron Ɔkwalɛ mmɔ. Ka Yoseƒ údu Sekem mmɔ ni, ɔkya ɔɔka taamana alakpi akɔ mmɔ,

¹⁵na ukyuli ɔdi úbanu-nwu. Mmɔ na ukyuli ɔmmɔ úye-nwu ɔnini, “Bi na aawia?”

¹⁶Yoseƒ údie kenye ɔnini, “Mina banwani na mɔɔwia. Buvele, ánu kesii kani na béti bebuo bésienku kadikɔ?”

¹⁷Mmɔ na ɔnana ɔmmɔ ɔ́su-nwu ɔnini, “Báatɔlɔ mɛni. Na línu lɛnɔ ka baasu banini, ‘Bɛya na buteesie Dotan kalɔ kemmo.’ ” Ɔmmɔ ɔ́su ni, Yoseƒ ɔ́sia nwuna banwani kama na útánu-ma na Dotan kudɔ mmɔ.

¹⁸Nsu ama báka-nwu bɔnu ka ɔkɛ ɔgyu ɔdubo. Na asa na webedu-ma kudɔ ni, báasa lili ka badu-nwu.

¹⁹Ka ɔ́ni úde-ma ni, básu lɛlɔ banini, “Bɛɛnu ukyuli ɔni muugyé ana mmɔ.”

²⁰Na básu lɛnɔ banini, “Bibo na bɔdu-nwu na bubo-nwu bɔkya abiɔ amɛni ɔdi kemmo. Na bɔsu ka eƒiebuo ɔdi néƒie-nwu ɔ́kun. Na bɔsɔ bɔnu kalɛ na nwuna ana ani na úgye mmɔ adubɔbla kabla.”

²¹Ka Ruben únu kenye kamɛni ni, ɔ́sia ulu biala lɛlɔ ka údie-nwu ngba na bana enu kemmo. Ɔmmɔ ɔsu ɔ́su-ma ɔnini, “Bitaya na bubile-nwu ngba.

²²Na bitaya na buwi ubugya kalɔ. Bibo-nwu bɛkya abiɔ amɛni ɔdi kemmo na ketele mɛni. Nsu bitetuku-nwu ulu bamba ɔdi lɛlɔ munu munu.” Ruben kasusu ndi ka ɔɔsu-ma lɛni na kama na udie-nwu ɔsɔku usienku bana ɔti.

²³Ɔmmɔ ɔsu ka Yoseƒ úbedu-ma kudɔ ni, ɔkya nwuna awu gyɔlɔɔ ɔni náƒɔ kuye. Amu na bédie-nwu awu ɔmmɔ.

²⁴Na béti-nwu bébo bákya libiɔ lɛni kemmo na ntu buuuwi mmɔ kemmo.

²⁵Uwi ɔni na bélie kalɔ banii baadi ni, bánu ka bebuo ala betine beti ala pii adi badubo. Na badi Ismael kadi bekyuli bani nási Gilead. Bebuo bamɛni béti kutu akyala lidu pii ku ala awɛɛdi ƒɛƒɛɛ bésela Egyipte kalɔ lɛlɔ.

²⁶Mmɔ ni, Yuda ɔ́su nwuna banwani ɔnini, “Bi na bɔdubo bɔkɛ si bɔ́du bula ɔnwani na búti ala búbi nwuna ubugya?

²⁷Bɛya na buti-nwu buye bute Ismael kadi bekyuli bamɛni na abu buleti bula enu bulabla-nwu lɛla lɛdi. Kavumana kadi keeebo abu ku-nwu ntɛ, bula ɔnwani kani na ɔdi.” Amu na nwuna banwani bammɔ lɛnɔ bénu kalɔ.

²⁸Ɔmmɔ ɔsu ka Midianƒuɔ beyedine bamɛni badaku bana kudɔ budu ni, báni Yoseƒ bálɛku ubu ɔmmɔ kemmo. Na béti-nwu béye béte-ma. Na bádi-nwu kuye sika ɔƒualadi ebi aavlanyɔ. Na Midianƒuɔ bammɔ béti-nwu bésienku Egyipte.

²⁹Ka Ruben únwini úsie libiɔ lɛmmɔ kɔtu na ɔ́nu ka Yoseƒ ɔsɔ uuubo ubu ɔmmɔ kemmo ni, ɔdi lɛla lɛni nékpoku-nwu geen ɔsu ɔ́ni awu ɔni na ɔkya ɔ́bwɛ kalɛ na ama baabla.

³⁰Na úsie nwuna banwani kudɔ útasu-ma ɔnini, “Ɔnamu ɔmmɔ ɔsɔ uuubo mmɔ! Dɛ mabla?”

³¹Ɔmmɔ kama ni, nwuna banwani bammɔ bádu ese ɔdi. Na béti Yoseƒ awu ɔmmɔ bákya ubugya ɔmmɔ kemmo.

³²Béti awu ɔbuni ɔmmɔ bésienku bana ɔti na bátásu-nwu banini, “Awu ɔmɛni na bɔ́kɛ ka bɔ́si bɔdubo. Sia-nwu anumi kaduɛ na anu si ƒ'ubidi awu na ɔdi.”

³³Amu ka bana ɔti ɔ́nu awu ɔmmɔ ni, ɔ́su ɔnini, “Mina ubi awu na ɔdi! Eƒiebuo ɔdi nádu Yoseƒ na ɔ́duli-nwu ɔ́kun lɛni!”

³⁴Na litemi lɛmmɔ líkpoku-nwu geen, anwuɔsu ɔ́ni nwuna awu ɔ́bwɛ. Na úti adikpi únyimi na úwulo ubidi emeyi pii.

³⁵Yakob bebi bananabi ku belekubi ƒui bébo bábasia-nwu kɔnu, nsu útada buwulo útaya. Na ɔ́su ɔnini, “Lɛla lɛmɛni lilása-mi buduo. Na ndubo buwulo laa ntéduo kaƒiɔtɔ kemmo na mina ubi kudɔ.” Ɔmmɔ ɔsu úwulo ubidi ɔmmɔ geen.

³⁶Na uwi ɔni kemmo na Yakob ɔɔbla ɔmɛni ƒui ni, Midianƒuɔ bamɛni béeti Yoseƒ béye bete Egyipteni ɔni baalɔ Potiƒar na ɔdi Ɔga Ƒarao benengu akɔ unwi ɔni mɔɔnu bekyuli bani mɔɔgyumana ɔga unengudi lɛlɔ.