Read Lelemi Ala Kalɔ Buse 39 Bible Online

Ala Kalɔ Buse 39 - Lelemi bible

Ala Kalɔ Buse 39

¹Na uwi ɔmmɔ kemmo ni, báakpanku Yoseƒ béboku Egyipte na béye-nwu béte unengu ɔni baalɔ Potiƒar. Na Potiƒar ɔmɛni ɔdi Ɔga Ƒarao benengu akɔ unwi. Na anwu ndi bani ƒui mɔɔgyumana ɔga ɔmmɔ unengu.

²Ɔƒɛni Yoseƒ ɔmɛni ni, ɔdi ukyuli ɔni na Unwoti Katɔti uliku-nwu kaduɛ. Na nwuna ablala ƒui álɛ-nwu kɔsia geen na nwuna Egyipteni ɔtɔlati ɔmmɔ kesii kani na ɔkya mmɔ.

³Ka nwuna ɔtɔlati ɔ́nu ɔ́ti kalɛ na Unwoti Katɔti uliku Yoseƒ ku kalɛ na nwuna ablala aatɛ-nwu ɔsu ni,

⁴Yoseƒ lɛlɔ lɛ́da-nwu kubiti geen. Anwuɔsu úti Yoseƒ únwini ukyuli ɔni na ɔɔtala na ɔɔbla nwuna kaduli ala teete-nwu ɔni na Potiƒar lɛla biala lɛkya-nwu enu kemmo.

⁵Na ɔ́si uwi ɔni na Potiƒar úti-nwu únyene ka utaanu nwuna kaduli ala lɛlɔ na úti nwuna lɛla biala lɛni na ubo ɔ́kya Yoseƒ enu kemmo ni, lɛla biala liisié anumi kaduɛ na kaduli kammɔ kemmo na Yoseƒ ɔsu. Unwoti Katɔti kusɛ kusɛ ɔsiaku Potiƒar ala ƒui ani na mmo ku ɔmantɛ.

⁶Ɔmmɔ ɔsu geen na Potiƒar ɔ́nyonu lɛla biala ɔ́kya Yoseƒ enu kemmo. Na údie lɛla biala atu na lɛla lɛdi lɛsɔ lɛɛɛkɛ-nwu ntu adila ani kani na badubuti beboku-nwu na ɔdi kani. Ɔƒɛni Yoseƒ ɔmɛni ni, ɔ́lɛ lɛkloƒu na ɔɔdia bɔnu geen.

⁷Yoseƒ ɔtɔlati ulekudi ɔkya ɔɔsia okloƒu ɔmɛni anu, ɔsika nwuna ala áda-nwu kayi. Ɔmmɔ ɔsu ɔ́lɔ-nwu na ɔ́su-nwu ɔnini, “Bo na aya na bɔtɛ!”

⁸Nsu Yoseƒ úbulo na ɔ́su-nwu ɔnini, “Ɔni na mina ɔtɔlati úti-mi únyene nwuna ala ƒui kenye ni, údie lɛla biala atu. Na ukyuli ɔdi lɛnɔ uuutulo-mi na kaduli kamɛni, ɔsika mina enu kemmo na lɛla biala lɛkya. Mina ɔtɔlati útebu lɛla lɛdi útese ɔni na úteti-ni útakya-mi enu kemmo ntu awɔ kani. Ɔsika awɔ ndi-nwu ulekudi. Na bi ɔsu na ndubɔkana na lɛbla kɔƒa lɛla lɛmɛni udu na lɛbla likpidi lɛƒiɔ Unwoti Katɔti?”

¹⁰Na ina ka uleku ɔmɛni ɔɔsu Yoseƒ lɛlɔ kudɔ bɔtɛ litemi lɛmɛni limeyi ndi limeyi ni, Yoseƒ útenuku-nwu kalɔ iye ɔni ude-nwu muedi.

¹¹Limeyi lɛdi ni, Yoseƒ úsie útátaabla nwuna kaduli kabla na ɔtɔ kemmo ɔni na kabla ɔblane bamba ɔdi uuubo mmɔ.

¹²Amu na uleku ɔmɛni útéduo-nwu kudɔ mmɔ na úbo ɔ́da Yoseƒ na ɔ́su-nwu ɔnini, “Bo na aya na bɔtɛ!” Mmɔ na Yoseƒ ɔ́nwanɛ lɛlɔ ɔ́lɛ, na nwuna awu gyɔlɔɔ ɔmmɔ ɔkya uleku ɔmmɔ enu kemmo.

¹³Ka uleku ɔmmɔ ɔ́nu ka Yoseƒ úkeli ɔ́tɔlɔ-nwu kudɔ na ɔ́da nwuna awu gyɔlɔɔ ɔmmɔ ɔ́kya-nwu enu kemmo ni,

¹⁴ɔ́lɔ nwuna kaduli kabla bablane. Mmɔ na ɔ́su-ma ɔnini, “Bɛnu ka Hebrini ɔni na bákpanku béboku mɛni úbo úbanu-bu ɔ́wɔlɔ. Úbo ɔnii ubatɛ-mi kudɔ.

¹⁵Amu na lɛ́va momoomo na úkeli ɔ́lɛ na nwuna awu nkya-mi enu kemmo mɛni.”

¹⁶Uleku ɔmɛni ɔ́da awu ɔmmɔ ɔ́va nwuna ɔƒɛnyi útédu ka ɔgyani úbo kaduli.

¹⁷Amu na ɔ́nwi kɔtɛ kɔmɛni ɔ́su ɔgyani ɔnini, “Hebrini kabla ɔblane ɔni na áƒɔ ábakya kaduli mmɔ ni, úbo-mi kudɔ ɔnii ubeƒie-mi ɔyɔ.

¹⁸Na ka lɛ́va momoomo nnii, ‘Bibebunku-mi o-o’ ni, anwu kani na úkeli ɔ́tɔlɔ na nwuna awu gyɔlɔɔ ɔtɛ-mi ɔƒɛnyi mɛni.”

¹⁹Mmɔ ka nwuna ɔtɔlati únu kenye kani na ulekudi ɔ́su-nwu mɛni ni, lɛla lɛmmɔ lítakɔsi na líkpoku-nwu. Anwuɔsu úti kɔnyi geen.

²⁰Ɔmmɔ ɔsu úti Yoseƒ útákya ɔtɔ ɔni kemmo na baakya bekyuli bani mɔɔƒiɔ́ Ɔga Ƒarao. Nsu na ɔtɔ katɛnkɔ mmɔ lɛnɔ ni,

²¹Unwoti Katɔti ɔsiaku Yoseƒ geen na ɔ́bla-nwu lɛƒɔndia ɔni na nwuna lɛlɔ lɛ́da ɔgyumanane unengu ɔmmɔ kubiti.

²²Ɔmmɔ ɔsu ni, ɔgyumanane ɔmmɔ lɛnɔ ɔ́ya na Yoseƒ únwini ɔɔnu bekyuli bani ƒui na batɛ ɔtɔ mmɔ lɛlɔ. Na ala ani ƒui na baabla mmɔ ni, anwu báya na unye kenye.

²³Na bédie lɛla biala atu na bányonu ana ƒui bákya Yoseƒ enu kemmo, ɔsika Unwoti Katɔti ɔsiaku Yoseƒ ɔni na lɛla biala na ɔɔbla ni, lɛɛtɛ kaduɛ.