Read Lelemi Ala Kalɔ Buse 4 Bible Online

Ala Kalɔ Buse 4 - Lelemi bible

Ala Kalɔ Buse 4

¹Ɔmmɔ kama ni, Adam ku Hawa bélie aani ɔgya ku ule kalɛ. Na Hawa ɔ́da kaƒɔ na ɔ́wɔ Kain. Na ɔ́su ɔnini, “Katɔti úbunku-mi na lɛ́wɔ ɔnanabi.”

²Na ɔmmɔ kama ɔ́sɔ ɔ́wɔ ɔnwani Abel. Na Abel ɔmɛni ɔdi bebuo ɔnyuɛne. Na Kain ɔdi umonsene.

³Na uwi ɔdi kama ni, Kain úti nwuna kemo edula adi úboku úbete Unwoti Katɔti.

⁴Na Abel lɛnɔ útáƒuna nwuna baƒonu bedeedi bani na báka bɔwɔ akɔ unwi na úti kakɛ kani nélie lɛmwi kaduɛ úboku úbete Unwoti Katɔti. Na Abel lɛlɔ lɛ́da Unwoti Katɔti kubiti geen ku nwuna etela.

⁵Nsu Kain ku nwuna etela átada Unwoti Katɔti kubiti. Ɔmɛni ɔsu Kain úti kɔnyi kati kati na nwuna anumi ávumana.

⁶Na Unwoti úye Kain ɔnini, “Bi ɔsu na éti kɔnyi kati kati na ƒula anumi ávumana lɛni?

⁷Si ábla lɛla lɛni na mɔɔyɔ́ ni, nka ƒula kayi kemmo kadubɔbla ƒaa. Nsu likpidi lɛɛtú-ɔ na lɛɛyɔ́ ka lɛdi-ɔ lɛlɔ. Anwuɔsu nye kagyumana na adi likpidi lɛmmɔ lɛlɔ.”

⁸Amu na Kain ɔ́su ɔnwani Abel ɔnini, “Ya na busie lɛku kemmo.” Na ka bésela ni, Kain úbo ɔnwani ɔ́du.

⁹Amu na Unwoti Katɔti úye Kain ɔnini, “Wɛ na ƒ'ɔnwani Abel ɔ́vi?” Mmɔ na Kain údie kenye ɔnini, “Lɛɛɛgyi. Ɔɔɔdi mina kudɔ na uli.”

¹⁰Amu na Unwoti úye Kain ɔnini, “Bi ɔsu na ábla likpidi bonwu lɛmɛni udu? Nu! Mɔɔnu ƒ'ɔwani ubugya ɔni nwi kalɔ. Use aani ukyuli mɔɔkpali ɔnii nkpo nte-nwu.

¹¹Ɔƒɛni ni, ewida asiaku-ɔ. Na kalɔ kammɔ kéni-ɔ ka ádu ƒ'ɔnwani na nwuna ubugya úwi kalɔ kammɔ lɛlɔ ɔsu.

¹²Si átuma-ka lɛlɔ ni, kasɔ kaladia-a edula. Na adubo ukeline bunwini na aaadubo keliekɔ kadi bɔkɛ na kayawi kammɔ ƒui lɛlɔ.”

¹³Mmɔ na Kain ɔ́su Unwoti Katɔti ɔnini, “Mina kɔtu bɔni bútulo-mi buti.

¹⁴Ɔmwi ni, aagyá-mi na kayawi kamɛni lɛlɔ na nsɔ naaakana na mada malɛ-ɔ anumi lɛnɔ. Bɔkɛ kani na ndubɔkɛ ntaavi, na lɛɛɛdubo keliekɔ kadi bɔkɛ na kayawi kamɛni lɛlɔ. Ukyuli biala ɔni manu-mi ni, ɔdubo-mi bubo bɔdu.”

¹⁵Nsu Unwoti Katɔti ɔ́su-nwu ɔnini, “Kudi kudii! Ukyuli ɔni madu Kain ni, ami Katɔti ndubo-nwu kasi budie akpa maatɛ.” Anwuɔsu Unwoti Katɔti ɔ́bla likposela ɔ́sia Kain lɛlɔ kalɛ na ukyuli biala ɔni manu-nwu uládu-nwu.

¹⁶Ɔmmɔ ɔsu Kain ɔ́tɔlɔ Unwoti Katɔti anumi mmɔ na útélie kalɔ kani baalɔ Nod si álɛ Eden ésela ɔƒɛ katukɔ kakɛ.

¹⁷Ɔmmɔ kama ni, Kain úti uleku na báwɔ ubi ɔni baalɔ Hanok. Uwi ɔmmɔ kemmo ni, Kain ɔ́da ɔma ɔdi na úti ubidi Hanok lɛnyi ɔ́sia ɔma ɔmmɔ.

¹⁸Hanok ɔ́wɔ Irad, na Irad ɔ́ta ɔ́wɔ Mehuyael. Na Mehuyael ɔ́wɔ Metusala ɔni náwɔ Lamek.

¹⁹Lamek úti beleku inyɔ. Unwi baalɔ Ada, na unyɔdi baalɔ Sila.

²⁰Na Ada ɔ́wɔ Yabal. Na Yabal ɔmɛni náwɔ kaba bekyuli bani muulie kevo ɔtɔ kemmo na baanyuɛ bebuo.

²¹Ɔnwani ɔnanabi baalɔ Yubal. Na Yubal ɔmɛni kaba bekyuli mɔɔgyá lɛbentaa na baavwi kɔkpɛɛ.

²²Sila lɛnɔ ɔ́wɔ ɔnanabi ɔni baalɔ Tubal-Kain ɔni muuti abuala taakyuɛ ala. Na Tubal-Kain ɔnwani ulekubi ndi Naama.

²³Limeyi lɛdi ni, Lamek ɔ́su nwuna beleku ɔnini, “Ada ku Sila, bise atu! Mina beleku, binu lɛla lɛni na ndubo-mii bɔsu! Lɛ́du ukyuli ɔdi ka ɔ́wia ka ɔdu-mi ɔsu. Okloƒu na ɔdi na lɛ́du, ka ɔ́ƒiɔ-mi ɔsu.

²⁴Si Kain ɔdune ɔdubɔƒɔ nkyuli maatɛ kayu ni, amu ami Lamek ɔdune ɔdubɔƒɔ nkyuli liti ku aavlanyɔ-maatɛ kayu!”

²⁵Amu na Adam ku ulekudi básɔ báwɔ ɔnanabi bamba na ɔ́sia-nwu lɛnyi ɔnii Set. Na ɔ́su ɔnini, “Katɔti úte-mi ubi ɔbambadi na Abel ɔni na Kain ɔ́du kenye.”

²⁶Set lɛnɔ úbawɔ ubi ɔnanabi na ɔ́sia-nwu lɛnyi ɔnii Enos. Na uwi ɔmmɔ kemmo ni, bekyuli bése kalɔ ku Unwoti lɛnyi bɔkpali.