Read Lelemi Ala Kalɔ Buse 40 Bible Online

Ala Kalɔ Buse 40 - Lelemi bible

Ala Kalɔ Buse 40

¹Uwi ɔdi kemmo na Yoseƒ ɔtɔ bɔkya kama ni, Egyipteƒuɔ ɔga ɔmɛni benengu akɔ inyɔ badi lɛnɔ bábakya-ma ɔtɔ, ɔsika báƒiɔ Ɔga Ƒarao. Unwi ɔdi ukyuli ɔni mɔɔda ɔga ɔmɛni ntɛ bɔni na ɔɔní teesienku-nwu. Na unyɔdi ɔdi ukyuli ɔni muuƒí nwuna bodobodo.

²Bɔƒiɔ bɔni na báƒiɔ mmɔ ni, bɔ́ya na Ɔga Ƒarao úti kɔnyi geen na bana lɛlɔ.

³Ɔmmɔ ɔ́su ɔ́ya na bákya-ma ɔtɔ na bagyumanane bammɔ ƒui unengu kesii. Na mmɔ kani na bákya Yoseƒ lɛnɔ ɔtɛ.

⁴Ɔgyumanane unengu ɔmɛni úti-ma ɔ́kya Yoseƒ kalɔ ka utaanu-ma lɛlɔ. Ka bákya ɔtɔ mmɔ emeyi adi kama ni,

⁵Ɔga Ƒarao ntɛ lɛlɔ ɔnune ku bodobodo lɛlɔ ɔnune bani na bákya ɔtɔ mɛni bégye ana adi na limeyi linwi lɛlɔ. Na ɔdi biala kɔna kɔni na úgye kɔdanku kalɔ budie bamba.

⁶Ka kadi kégye na Yoseƒ úbo ɔnii ubanu-ma ni, ɔ́nu ɔ́ti ka lɛla lɛdi liikpóku-ma.

⁷Ɔmmɔ ɔsu úye benengu bani na anwu ku-ma ƒui ntɛ ɔtɔ mmɔ na bana ɔtɔlati kesii mmɔ ɔnini, “Bi ɔsu mɔɔnu aani si lɛlɔ lilayɔ-mii ɔmwi kaduɛ tɔ?”

⁸Amu na bédie kenye banini, “Bula inyɔ ƒui búgye ana ani na bútakɛ ukyuli ɔni nedie-nya kalɔ ute-bu.” Mmɔ na Yoseƒ úye-ma ɔnini, “Bɛɛɛgyi ka Unwoti Katɔti muudie ala kalɔ? Bɛsu-mi bina ana ani na bígye.”

⁹Ka ɔ́su lɛni ni, ukyuli ɔni mɔɔnu ɔga ntɛ lɛlɔ mmɔ ɔ́sɔku kɔna kɔni na úgye mmɔ ɔ́su Yoseƒ ɔnini, “Lígye kɔna ka ni, kɔdingyii kɔdi kunye-mi anumi.

¹⁰Na kugyii kɔmmɔ kubo kɔgba ɛtɛ. Ka kɔgba kɔmɛni kúdie anumi kani na evete ammɔ ábi lɛlɔ, na kugyii kɔmmɔ kɔ́tu yuu, na kúwi anwula, na anwula ammɔ ábla ebi ku aboyo aboyo.

¹¹Na ɔƒɛni ni, Ƒarao ɔɔƒɛɛ ɔni kemmo na ɔɔní ntɛ ɔkya-mi lɛkɔkɔ. Na lídie ebi ammɔ na lɛ́mana ntu bɔmmɔ líwi ɔɔƒɛɛ ɔmmɔ kemmo na líti lite-nwu.”

¹²Ka ɔ́wɔlɔ ni, Yoseƒ ɔ́su-nwu ɔnini, “Kɔna kɔni na égye kalɔ ndi ka kugyii kɔmmɔ kɔgba ɛtɛ kɔni na ánu ni, kunye kúte emeyi atɛ.

¹³Ɔƒɛni na emeyi atɛ kemmo ni, Ƒarao ɔdubɔtala kɔƒa ƒula anumi na ɔsɔku-ɔ unyene ƒula kabla kenye. Na adubuti ɔɔƒɛɛ akya Ƒarao kɔnu aani kalɛ kani na átaabla uwi ɔni na átaanu-nwu ntɛ lɛlɔ.

¹⁴Nsu si ala asɔ ábatɛ éte-ɔ kalɛ mɔɔsu mɛni ni, na enyimo na abla ami lɛnɔ lɛƒɔndia lɛdi. Mɔɔyɔ́ ka alɔ-mi lɛnyi buni ete Ƒarao na bada-mi bedie ɔtɔ ɔni na bákya-mi mɛni kemmo.

¹⁵Bunye na bénye-mi lɛlɔ bákpanku-mi básiku bula Hebri kadi kalɔ lɛlɔ béboku mɛni. Na mɛni lɛnɔ ńtabla lɛla lɛni naya na beti-mi babakya kesii kani na ntɛ mɛni.”

¹⁶Ɔmmɔ kama ka bodobodo uƒine ɔmmɔ únu kalɛ na Yoseƒ údie ɔnwani kɔna kalɔ na kɔdanku ala abuni ni, anwu lɛnɔ ɔ́su Yoseƒ ɔnini, “Ami lɛnɔ lígye kɔna ka nti kɔgyigyɛ ɛtɛ.

¹⁷Na kuna kemmo ni, bodobodo ɔni béƒi bákya kɔgyigyɛ kemmo béselaku Ƒarao ɔkya, nsu baasɛ bádi-nya bédie kɔgyigyɛ kɔmmɔ kemmo na mina lili.”

¹⁸Amu na Yoseƒ ɔ́su-nwu ɔnini, “Kɔna kɔni na égye ni, aku lɛnɔ kɔɔtina ka kɔgyigyɛ ɛtɛ kɔmmɔ kunye kute emeyi atɛ.

¹⁹Na emeyi atɛ ammɔ kemmo ni, Ƒarao ɔdubɔya na badu-ɔ. Na badubuti-ɔ baƒala kugyii lɛlɔ na baasɛ baduli ƒula lɛna bebweli kede kede.”

²⁰Ɔƒɛni limeyi lɛtɛdi lɛmmɔ ni, lɛdi Ƒarao lɛwɔmeyi. Anwuɔsu ɔ́ya na bánwa adila na ɔ́lɔ nwuna benengu ƒui ka babadi limeyi bete-nwu. Na kasakɔ mmɔ ni, Ƒarao ɔ́ya na bákpanku ntɛ ku bodobodo lɛlɔ banune bammɔ bébenyene bana benengu bakladi bammɔ ƒui anumi.

²¹Na ɔ́ya na ukyuli ɔni mɔɔnu-nwu ntɛ lɛlɔ ɔ́sɔ úsie úténye nwuna kabla kenye.

²²Na bodobodo lɛlɔ ɔnune anwu ni, ɔ́ya na bákya-nwu ɔbuli ɔkwɛ báƒala ugyii lɛlɔ kalɛ kani na Yoseƒ údie ana ammɔ kalɔ úte-ma.

²³Ka ala amɛni ƒui ébo ábavi lɛni ni, ntɛ lɛlɔ ɔnune ɔmɛni útenyimo Yoseƒ aani kalɛ na ɔ́su-nwu. Mmomu ɔ́yiƒala-nwu.