Read Lelemi Ala Kalɔ Buse 46 Bible Online

Ala Kalɔ Buse 46 - Lelemi bible

Ala Kalɔ Buse 46

¹Ɔmmɔ kama ni, Israel úti ala ani na ubo ƒui na ɔ́yu Egyipte ulu. Na ka útédu Beer-Seba ni, ɔ́bla akpala adi na mmɔ úte Unwoti Katɔti ɔni na ɔti Isak lɛnɔ útaakpa.

²Na mmɔ ni, Unwoti Katɔti útemiku Israel na kɔna kemmo usien na ɔ́kpali-nwu ɔnini, “Yakob! Yakob!” Na Yakob lɛnɔ údie kenye ɔnini, “Ati, aanu-mi mɛni.”

³Mmɔ ni, Unwoti Katɔti ɔ́su-nwu ɔnini, “Ami ndi ƒula Unwoti Katɔti, na ndi ƒ'ɔti lɛnɔ Unwoti Katɔti. Tayia ka esie Egyipte, ɔsika ndubɔya na bimomo na bɛbla kadi bekyuli bani mbo ɔyikun geen na mmɔ.

⁴Ndubuliku-ɔ ɔni na ésela Egyipte mɛni. Na ndubutiku-ɔ na asɔ enwini ebo ɔni na kavumana kadi kelebo-nwu kemmo. Na Yoseƒ enu kemmo na adubo bɔyula.”

⁵Ɔmmɔ kama ni, Yakob ɔ́tɔlɔ Beer-Seba. Israel ɔmɛni bebi bétiku bana ɔti Yakob ku ama alati bebi ku bana beleku na kɛɛkɛ ɔni kemmo na Ƒarao úti úmene ka ubeti-ma mmɔ.

⁶Béti bana bebuo ku bana akɛla ƒui ani na bebo na Kanaan mmɔ báda.

⁷Ɔmmɔ ɔsu ni, Israel útiku nwuna bebi ku bawɔ ku kaba kemmo bebi ƒui na bátɔlɔ bésie Egyipte.

⁸Bɛya bunu Israel iye Yakob bebi ku nwuna kaba kemmo bebi bani nátɔlɔ bésie Egyipte anyi. Ruben ndi Yakob ubidi udeedi.

⁹Na nwuna bebi ndi Hanok ku Palu ku Hesron ku Karmi.

¹⁰Na Simeon bebi ndi Yemuel ku Yamin ku Ohad ku Yakin ku Sohar ku Saul ɔni na Kanaanni uleku ɔ́wɔ úte-nwu.

¹¹Na Lewi bebi ndi Gerson ku Kahat ku Merari.

¹²Na Yuda bebi ndi Er ku Onan ku Sela ku Peres ku Serah. Nsu Er ku Onan ama békpi na Kanaan kalɔ lɛlɔ. Na bana ɔnwani Peres bebi ndi Hesron ku Hamul.

¹³Ɔƒɛni Isakar bebi ndi Tola ku Puwa ku Yasub ku Simron.

¹⁴Na Sebulon bebi ndi Sered ku Elon ku Yakleel.

¹⁵Bebi bammɔ na Lea ɔ́wɔ úte Yakob ɔni bákya Mesopotamia kalɔ lɛlɔ na bana ɔnwani ulekubi Dina kama. Na nwuna bebi bananabi ku belekubi bammɔ bumomo bɔdi nkyuli avlaatɛ-ɛtɛ.

¹⁶Ɔƒɛni Gad bebi ndi Siƒion ku Hagi ku Suni ku Esbon ku Eri ku Arodi ku Areli.

¹⁷Na Aser bebi ndi Yimna ku Isua ku Isui ku Beria. Na bana ɔnwani ulekubi ndi Sera. Ɔƒɛni bana ɔnwani Beria bebi ndi Heber ku Malkiel.

¹⁸Bebi leevu-ɛku bani anyi na búnu mmɔ ni, Silpa náwɔ-ma úte Yakob. Na Silpa ɔdi Lea kaduli ulekubi kabla ɔblane ɔni na ɔti Laban úte-nwu.

¹⁹Ɔƒɛni Yakob ulekudi Rahel bebi ndi Yoseƒ ku Benyamin.

²⁰Na uwi ɔni na Yoseƒ ɔkya Egyipte ni, Potiƒera ɔni ndi Ɔkpane na On ɔma kemmo ni, ubidi ulekubi ɔni baalɔ Asnat ɔ́wɔ Manase ku Eƒraim úte Yoseƒ.

²¹Na Benyamin bebi ndi Bela ku Beker ku Asbel ku Gera ku Naaman ku Ehi ku Ros ku Mupim ku Hupim ku Ard.

²²Na bebi bani na Rahel ɔ́wɔ úte Yakob ni, bana anyi na bínu mmɔ. Bana ƒui bumomo ndi leevu-ine.

²³Dan ubidi ndi Husim.

²⁴Na Naƒtali bebi ndi Yahseel ku Guni ku Yeser ku Silem.

²⁵Bebi maatɛ bani anyi na búnu mmɔ ni, Bilha náwɔ-ma úte Yakob. Na Bilha ɔdi Rahel kaduli ulekubi kabla ɔblane ɔni na ɔti Laban úte-nwu.

²⁶Yakob ku anwu badi bani ƒui nésie Egyipte kalɔ lɛlɔ bebo nkyuli liti ku ɛku. Na nwuna bebi beleku ama baaakɛ.

²⁷Na si bɔ́ka Yoseƒ bebi inyɔ bani na báwɔ béte-nwu na Egyipte mmɔ búbunku ama ku bana bati ƒui lɛlɔ ni, bana bumomo bɔdi nkyuli liti ku aavlanyɔ.

²⁸Na uwi ɔmmɔ kemmo ni, Yakob ɔ́tala Yuda ɔnii ɔgyu ɔtɔ na Yoseƒ kudɔ. Na utéye-nwu na ɔtina-nwu ulu ɔni néti úsie Gosen mmɔ. Na uwi ɔni na Yakob ku anwu badi bédu Gosen mmɔ ni,

²⁹Yoseƒ ɔ́ya na béti nwuna kɛɛkɛ béboku-nwu, na ɔ́klibi lɛlɔ na ɔ́tɔlɔ úsie Gosen mmɔ útásiaku ɔti Israel. Uwi ɔni na Yoseƒ ɔ́nu ɔ́ti kani na ɔ́tu ɔ́bali-nwu na úwulo keku na uwi útu.

³⁰Mmɔ kani na Israel ɔ́su Yoseƒ ɔnini, “Ɔƒɛni amu uwi údu ka likpi, ɔsika ami ɔlati lɛ́nu ku mina anumi ka akya ngba sɔsɔ.”

³¹Amu na Yoseƒ ɔ́su nwuna banwani ku ɔti kaduli bekyuli bammɔ ƒui ɔnini, “Lísela na ntánu Ƒarao na ami ku-nwu bɔtɛmi na lɛsu-nwu nnini, ‘Mina banwani ku mina ɔti kaduli bekyuli bani ƒui nli Kanaan kalɔ lɛlɔ bátɔlɔ bébo-mi kudɔ mɛni.

³²Na bekyuli bammɔ badi baƒonu badane. Na baanyuɛ bebuo ɔsu badanku bana bebuo lidu lidu ku ala ani ƒui na bebo na mmɔ béboku mɛni.’

³³Na si Ƒarao ɔ́lɔ-mii na úye-mii ɔnini, ‘Bi kabla na bɛɛbla?’ ni,

³⁴na bidie kenye bɛnini, ‘Ati, abu ƒula kabla bablane ni, bebuo kani na bɔɔnyuɛ ɔ́si-bu lɛnamu uwi ƒui aani bula bati kalɛ.’ Na ɔmmɔ ɔdubɔya na bete-mii kuƒi ka bilie kalɔ kammɔ kemmo na Gosen kalɛkɛ lɛlɔ. Ɔsika bebuo banyuɛne ƒui beesé Egyipte kadi bekyuli ƒui lɛlɔ.”