Read Lelemi Ala Kalɔ Buse 49 Bible Online

Ala Kalɔ Buse 49 - Lelemi bible

Ala Kalɔ Buse 49

¹Ɔmmɔ kama ni, Yakob ɔ́lɔ nwuna bebi ƒui ɔnini, “Bibasala na lɛsu-mii ala ani ndubo-mii bɔlɛku na emeyi ani nkpɛ kama adubo kemmo.

²Bibo lisu na bise atu na binu, amii mina bebi. Binu ami bina ɔti Israel lɛla lɛni na ndubo-mii bɔsu.

³“Ruben, awɔ ndi mina ubi unengudi, mina ɔyikun, awɔ ndi mina lɛkloƒu ɔyikun ɔni na lɛ́ka keyi budie. Awɔ na baabu teetulo ƒui. Awɔ mbo ɔyikun ntulo.

⁴Ƒula udu use aani ntu bɔni mɔɔnwanɛ lɛlɔ. Nsu asɔ eletulo bakladi na lɛla lɛdi kemmo lɛnɔ. Ɔsika ákɔ ƒ'ɔti katɛnkɔ. Na ébile-nwu atɛla.

⁵“Simeon ku Lewi badi banwa. Bana kuwii kɔwia kuwi ubugya kalɔ.

⁶Naaawia ka liduo bana kasusu ketikɔ iye bana kasalakɔ. Ɔsika bana kɔnyi kɔ́ya na bádu bekyuli na békulo bana bebuo kɔgbama nti na basɔ balakana lɛla lɛdi bɔbla.

⁷Badubo bɔnuku-ni. Béyi ku kɔnyi kati kati na bebo kalala. Ndubo-ma bugyingya na Yakob badi akɔ. Na lɛgya-ma lɛkya na Israel badi akɔ.

⁸“Yuda, ƒula banwani badubo-ɔ bumwi. Na adubo ƒula bekisine amɔ bɔda. Na ƒ'ɔti bebi badubo-ɔ lili kalɔ bɔkya.

⁹Yuda, gyata ubi na adi. Ebuo keƒiekɔ na ási ébo. Aabɛ́bɛ taayu teebi kalɔ aani gyata uwele. Na ɔma ndubuse kayi ɔnii utágya-a?

¹⁰Na ɔgagyii ulávi ulálɛ ƒula kaduli kudii. Na lɛlɔ ɔdine ugyii ɔdadi ulávi ulálɛ-ɔ lɛgba akɔ wetédu ka ugyii ɔmmɔ úbedu lɛlɔ ɔdine geen ɔmmɔ. Na kadi bekyuli ƒui badubɔdi ƒula litemi lɛlɔ.

¹¹Adububo ƒula ebuo ala utine ada kɔdingyii lɛlɔ. Na adubɔƒɔ ƒula lɛwu na kɔdingyii kɔmmɔ ebi ntu kemmo. Na adingyii ebi ntu bɔni nse aani ubugya kemmo na badubɔƒɔ ƒula lɛwu gyɔlɔɔ.

¹²Ƒula anumi aatu anumi. Na ƒula anyi eekeye.

¹³“Sebulon ɔdubulie ɛpu kɔtu. Na lɛkɔlɔ libendi lɛdubɔlɛlɛ mmɔ buɛɛ. Na nwuna lɛmii lisie ɔgyu litédu Sidon kakɛ.

¹⁴“Isakar ɔdi ukyuli ɔni nse aani ebuo ala utine ɔni neeebo ɔlɔna, nsu ekubi ebo-nwu ɔkplu. Aayɔ́ ka atɛ anwuna na ƒula etila ntɛ.

¹⁵Na si ánu kalɛ na kesii kani na aatɛ taanwuna kadia ku kalɛ na nwuna kalɔ kadia ni, adububo kalɔ buɛɛ na eti ƒula etila étédu ka ányonu lɛlɔ éte ka átaabla ukyuli bamba kabla muedi.

¹⁶“Dan, adubɔbla ala ulu lɛlɔ siin bute ƒula Israelƒuɔ kaba kemmo bekyuli.

¹⁷Adubɔdu ƒula bekisine aani kalɛ na kɔlakpi kɔni ntɛ kuludɔ kɔɔdu ɔpɔnkɔ lɛgba na ɔya na ukyuli ɔni nli-nwu lɛlɔ ɔlɛ utébo kalɔ.

¹⁸“O Unwoti, nnye mɔɔnu-ɔ anumi ka aƒɔ-bu ngba!

¹⁹“Na Gad ni, beyune bani muuƒie bekyuli ala taaƒɔ badubo-ɔ buyu bɔtu banii beekpóku-ɔ, nsu adubo-ma bukpoku na agya-ma lɛgba lɛgba.

²⁰“Aser adila adubo-ɔ bɔdia geen, na akɛ adila ani náƒɔ kuye na bete baga muedi.

²¹“Neƒtali, ese aani alakpiakɔ ebuo ɔni nédie atu ɔkɛ lɛku kemmo, na ɔɔwɔ bebi babuni.

²²“Yoseƒ, ese aani kɔdingyii kɔni mɔɔnwu ebi pii na libiɔ kɔtu, na ƒula kɔgba kuusé ɔgyu.

²³Bekyuli bani muukisi-ɔ ku ɔdu kati kati badubo-ɔ bukpoku ku atula. Na badubɔtu-nya balɛ-ɔ kalala bɔdi.

²⁴Nsu ƒula kataminta kalatu kaláƒiɔ. Na ƒula enu ani mbo ɔkplu geen alayuɛ. Ɔsika Yakob Unwoti Ɔyikune kɔnu kɔɔgyumana-a. Na Katɔti ndi Israel ɔdane aani baƒonu ɔdane kalɛ, na use aani lɛtakpɛ ute-nwu.

²⁵Na Unwoti Katɔti ɔni ndi ƒula bati Katɔti muubunku-ɔ. Na ɔdubute-ɔ ntu bɔsiku katɔ ku kalɔ ƒui. Na ɔdubɔya na beleku bawɔ na bete bebi anyii ntu.

²⁶Kusɛ kusɛ ɔni na ami, ƒula ɔti, muute-ɔ ni, úbomo utulo ala ani nkya abi enengudi ku abinkpo ani nnye ási kukuuku ƒui kemmo. Ala amɛni ƒui na muuvele ka enwini kusɛ kusɛ ewi awɔ Yoseƒ lili aani ɔga ubi na ƒula banwani bakladi ƒui akɔ.

²⁷“Benyamin, adubɔdi ƒula bekisine lɛlɔ na ele ala ani na áƒɔ-ma kudɔ aani kalɛ na ebuoƒuala uuƒie ebuo ɔtanta ku useyi uwi si kɔka kɔɔda-nwu.”

²⁸Israel kaba kemmo bebi leevu-inyɔ bammɔ mɛni. Na ala ani na búnu mɛni ndi ala ani na ɔ́su-ma uwi ɔni na úte-ma kusɛ kusɛ.

²⁹Ɔmmɔ kama ni, Yakob úbo nwuna bebi ɔda ɔdi. Ɔ́su-ma ɔnini, “Kébu blii ndubɔda kayawi lise, na bɛdubusie-mi ulu na nteesie mina bati kudɔ. Anwuɔsu ɔlɛka bɛva-mi na kesii kani na mina bati batɛ na lɛtakpɛ ubu ɔni nkya Hitini ɔni baalɔ Eƒron kalɔ kemmo.

³⁰Lɛtakpɛ ubu ɔmmɔ ɔkya Makpela kalɔ kemmo na kede Mamre na Kanaan kalɔ lɛlɔ. Mmɔ na Abraham úye úse úte ka bataava bekyuli ɔ́si Hitini ɔni baalɔ Eƒron kudɔ úbunku kemo kani nwi mmɔ ƒui.

³¹Mmɔ na báva Abraham ku ulekudi Sara. Na mmɔ na báva Isak ku ulekudi Rebeka. Na mmɔ na lɛ́va Lea.

³²Kemo kammɔ ku lɛtabi ubu ɔmmɔ ni, Hetiƒuɔ kudɔ na béye mmɔ básiku.”

³³Ka Yakob úbo nwuna bebi ɔda ɔmɛni ɔ́wɔlɔ ni, ɔ́sɔku lɛgba útásia nwuna atɛla lɛlɔ na ɔ́yula, na úsie ɔti bene kudɔ.