Read Lelemi Ala Kalɔ Buse 50 Bible Online

Ala Kalɔ Buse 50 - Lelemi bible

Ala Kalɔ Buse 50

¹Yoseƒ ɔ́yu úwi ɔti lɛlɔ na úwulo geen na ɔ́kya-nwu kɔgbu.

²Ɔmmɔ kama ni, Yoseƒ ɔ́su bekyuli bani mɔɔklibi ɔnii baklibi ɔti. Anwuɔsu báklibi-nwu

³na emeyi aavlene ani nkɛnku bana ɔdi ala bɔbla kenye kemmo. Na Egyipteƒuɔ lɛnɔ beebo teebewulo Yoseƒ ɔti Israel emeyi liti ku aavlanyɔ.

⁴Ka emeyi ani na beeti teewulo ukpine ávi ni, Yoseƒ ɔ́su Ƒarao kelisa benengu ɔnini, “Si mina ablala áyɔ-mi kaƒɔ ni, na bitásu Ƒarao bɛnini,

⁵‘Mina ɔti ɔ́ya na lɛ́kpali Katɔti líse-nwu kenye ka mabla lɛla lɛni na wasu-mi. Na ɔ́su-mi ɔnini, “Uwi údu ka likpi. Na ɔlɛka ava-mi na kaƒiɔtɔ kani kemmo na ami ɔlati líku líse na Kanaan kalɔ lɛlɔ.” Ɔmmɔ ɔsu ni, bite-mi kuƒi na ntáva mina ɔti ukpine na mmɔ. Na ndubo bunwini bubo na ɔmmɔ kama.’ ”

⁶Mmɔ na Ƒarao údie kenye ɔnini, “Sie na atáva ƒ'ɔti aani kalɛ na ɔ́ya-a na ákpali Katɔti ése-nwu kenye ése ka adubo bɔbla.”

⁷Ɔmmɔ ɔsu ni, Yoseƒ úsie útáva ɔti. Na Ƒarao benengu básiaku-nwu bésie ku nwuna kelisa benengu ku bekpone benengu bamba ƒui na Egyipte kalɔ lɛlɔ. Na Yoseƒ banwani ku lɛlɔ bekyuli ku nwuna kaduli ku ɔti kaduli bekyuli bésie. Na bana bebi ku bebuo kani na báda bákya kama na Gosen.

⁹Kɛɛkɛ ku bapɔnkɔ beliene ƒui básiaku-nwu bésie na badi bekyuli lisu bonwu geen.

¹⁰Ka bédu ɔma ɔni baalɔ Atad na Yordan kudɔ na kesii kani bákwaa bésie na beewiile edula ni, béwulo momoomo geen. Na mmɔ ni, Yoseƒ ɔ́sɔ ɔ́bla ukpine buwulo ɔdi emeyi maatɛ úte ɔti.

¹¹Ɔƒɛni ka Kanaanƒuɔ bani nkya mmɔ bánu buwulo ɔdi ɔni baabla mmɔ ni, Kanaanƒuɔ básu banini, “Egyipteƒuɔ baabla buwulo ɔdi kpakplaa ɔdi.” Ɔmmɔ ɔsu na baalɔ kesii kani nde Yordan mmɔ banii Abel Misraim.

¹²Ɔmmɔ kama ni, ɔda ɔni na Yakob úbo nwuna bebi ni, bábla lɛni kani.

¹³Na béti-nwu bésienku Kanaan kalɔ lɛlɔ na bátáva-nwu na Makpela lɛtabi ubu. Na ude Mamre kesii kani na Abraham úye ka bataava nwuna bekyuli. Na Hitini ɔni baalɔ Eƒron kudɔ na úye kemo kani kemmo na ubu ɔmmɔ ɔkya.

¹⁴Ka báva bana ɔti báwɔlɔ ni, Yoseƒ ku nwuna banwani ku bekyuli bani ƒui násiaku-nwu bésie ɔti kavakɔ mmɔ bénwini bésie Egyipte.

¹⁵Ka Yoseƒ banwani bánu ka bana ɔti úkpi ni, básu banini, “Ɔƒɛni kalɛ Yoseƒ ɔdubo nwuna kɔnyi keyi budie na ɔƒɔ-bu likpidi lɛni na bɔ́bla-nwu kayu.”

¹⁶Ɔmmɔ ɔsu bátala ukyuli ɔdi ka usie utásu Yoseƒ ɔnini, “Ƒula banwani banii Ƒ'ɔti ɔ́da kenye kadi úse asa na úkpi ɔnini,

¹⁷‘Ƒula banwani ekpidi ani ƒui na bábla-a ku ulikplu ni, ti-nya ƒui kyiɛ-ma.’ Anwuɔsu buuvele-ɔ geen ka ƒula bati ƒui Unwoti Katɔti kabla bablane bamɛni ni, ti bana ekpidi kyiɛ-ma.” Ka kenye kamɛni kébedu Yoseƒ ni, úwulo geen.

¹⁸Mmɔ na nwuna banwani bébo bábayu bébi-nwu lɛgba kudɔ na bévele-nwu básu banini, “Ƒula kabla bablane na bɔdi.”

¹⁹Nsu Yoseƒ ɔ́su-ma ɔnini, “Bitayia, ɔɔɔdi ami ndi Unwoti Katɔti.

²⁰Ɔsika bɛ́kali bɛnii bɛɛbla-mi likpidi, nsu Unwoti Katɔti ɔ́ya na lɛbuni nálɛ lɛ́si-nwu kemmo kalɛ na ɔbla nwuna kabla kani bɛɛnu ɔƒɛni. Na ɔƒɔ bekyuli pii ngba.

²¹Anwuɔsu ni, bitayia. Ndubute amii ku bina bebi ƒui ala ani na bɛdubɔwia.” Na ɔ́sɔ úse-ma kayi na ɔ́tɛmiku-ma na lɛƒɔndia kemmo.

²²Yoseƒ úlie Egyipte mmɔ ku ɔti lɛlɔ bekyuli bakladi ƒui. Na ɔ́ƒɔ akwa eti anyɔ ku leevu.

²³Na ɔ́nu kaba katɛdi na Eƒraim bebi akɔ. Lɛni kani na ɔ́nu Manase ubidi Makir bebi lɛnɔ na béti-ma bábasia-nwu akɔnkɔ ka báwɔ-ma.

²⁴Ɔmmɔ kama ni, Yoseƒ ɔ́su nwuna banwani ɔnini, “Uwi údu ka likpi. Nsu Unwoti Katɔti ɔdubo-mii bubunku na ɔkpanku-mii ɔlɛku Egyipte kalɔ kamɛni kemmo usienku kalɔ kani na ɔ́su úse ka wete-mii kemmo. Lɛni na úse Abraham ku Isak ku Yakob kenye úse.”

²⁵Na Yoseƒ ɔ́ya na Israel bebi bákpali Katɔti bése kenye, na ɔ́su-ma ɔnini, “Ngyi geen ka Unwoti Katɔti ɔdubo ubebunku-mii. Na ɔdi ka biti mina ekubi bɛtɔlɔku mɛni.”

²⁶Yoseƒ úkpi na lɛkwa eti anyɔ ku leevudi kemmo. Na ka báklibi nwuna ukpine ɔmmɔ báwɔlɔ ku ala awɛɛdi ƒɛƒɛɛ ni, bákya-nwu adaka kemmo na Egyipte mmɔ.