Read Lelemi Samuel 2 10 Bible Online

Samuel 2 10 - Lelemi bible

Samuel 2 10

¹Na uwi ɔdi kama ni, Amonƒuɔ Ɔga Nahas úbekpi. Na ubidi ɔni baalɔ Hanun na béti bése-nwu kenye na únwini bana ɔga.

²Ka Dawid únu-nwu kukpi ni, ɔ́su ɔnini, “Ndubɔbla lɛla lɛbuni lɛdi lite Hanun. Ɔsika lɛni kani na ɔti Nahas ɔ́bla-mi lɛƒɔndia.” Ɔmmɔ ɔsu Dawid ɔ́tala nwuna bekyuli badi ka batásia Hanun kɔnu na ɔti kukpi ɔsu. Ka Dawid bekyuli bétéduo Amon kalɔ lɛlɔ ni,

³básu-ma Dawid kenye kani na badanku. Nsu ka báwɔlɔ ni, Ɔga Hanun benengu bammɔ básu bana ɔga banini, “Aabu anii Ɔga Dawid ɔɔbu-ɔ na ɔɔyɔ́-ɔ ka ɔ́tala bekyuli bamɛni ɔnii babasia-a kɔnu ka ƒ'ɔti úkpi ɔsu? Alati ka bɔtala na Dawid ɔ́tala-ma aani batu na babasia bula ɔma ɔmmɔ anu kaduɛ na bebekpoku-bu na badi-bu lɛlɔ?”

⁴Anwuɔsu Hanun ɔ́ya na béƒie-ma na békpeyi ɔdi biala ukwi kakɛ kenwi. Lɛni kani na ɔ́ya na nwuna bekpone békulo lɛwu gyɔlɔɔ lɛni bakya mmɔ kalɔ bédie ɔ́si kavobi. Ɔmmɔ kama ɔ́ya na bédie-ma ulu na bátɔlɔ bésie bana ɔma.

⁵Ka ala ani nálɛ mmɔ litemi líbedu Dawid kudɔ ni, ɔ́tala batu badi na bátásiaku bekyuli bani na bábla kalala bákya-ma kɔƒa geen mmɔ na ulu lɛlɔ ɔnii batásu-ma ka ɔga ɔnini, “Bɛsɔ bɛkya Yeriko útédu ka bina likwi lɛ́sɔ lɛ́kwɛ linwini. Na ɔmmɔ kama na binwini bibo.”

⁶Uwi ɔni na Amonƒuɔ bánu báti ka Dawid ɔ́kɛ kɔnyi geen na lɛla lɛni na bábla nwuna batu ɔsu ni, bésie na bétévo Siriaƒuɔ bekpone mpim aavlanyɔ básiku Bet-Rehob ku Soba lɛma kemmo na básɔ bévo apim unwi básiku Maaka ɔga kudɔ na bévo mpim leevu-inyɔ básiku Tob lɛnɔ kudɔ.

⁷Ka Dawid únu ɔmɛni ni, ɔ́ya na nwuna bekpone ɔtɔnkune Yoab ɔ́tɔnku bekpone bammɔ ƒui ɔnii betékpoku-ma.

⁸Amonƒuɔ bekpone bésie bási bana ɔma unengudi kemmo bálɛ bébo na bekpone udu kenye bébenye ɔma unengudi ɔmmɔ ɔban kayakun na báklibi lɛlɔ béte kekpo kammɔ. Na uwi ɔmmɔ ni, Siriaƒuɔ bekpone bani na bási Soba ku Rehob ku Tob ku Maaka lɛnɔ bálɛ bénye ɔma ɔmmɔ kɔƒɛlɛ egyu egyu.

⁹Mmɔ ni, Yoab ɔ́nu ɔ́ti ka bekisine bammɔ baayɔ́ ka beyu-ma batu na bekpoku-ma ɔ́si anumi ku kama. Anwuɔsu ɔ́ƒuna bekpone babuni ɔnii ama batuaku Siriaƒuɔ bekpone.

¹⁰Na bakladi ni, Yoab ɔ́ya na ɔnwani Abisai ɔ́tɔnku-ma ɔnii ama bekpoku Amonƒuɔ.

¹¹Na Yoab ɔ́su Abisai ɔnini, “Si ánu ka Siriaƒuɔ baayɔ́ ka bayu ɔkplu betulo ami ku mina bekpone ni, na bibo bibekpo bɛƒɔ-bu. Na si Amonƒuɔ lɛnɔ mɔɔdi-mii lɛlɔ lɛnɔ ni, ami ku mina bekpone bɔdubo na bubekpo bɔƒɔ-mii.

¹²Anwuɔsu binye momoomo na bise kayi na bukpo bula bekisine na bula kadi bekyuli Israelƒuɔ ɔsu. Na bukpo na bɔƒɔ bula lɛma lɛni na Unwoti úte-bu ka bulie-ni kemmo buse. Unwoti ɔbla lɛla lɛni na anwu ɔlati ɔ́nu ka lɛdia.”

¹³Ɔmmɔ kama ni, Yoab ku nwuna bekpone bésie anumi na bénye ka bekpoku Siriaƒuɔ, nsu usi na bekisine bammɔ bakɛ békeli bátɔlɔ.

¹⁴Na ka Amonƒuɔ bánu ka Siriaƒuɔ békeli bátɔlɔ ni, ama lɛnɔ békeli bétéduo bana ɔma unengudi ɔmmɔ kemmo. Anwuɔsu Yoab ku nwuna bekpone ƒui bénwini bésie Yerusalem.

¹⁵Ɔmmɔ kama ka Siriaƒuɔ bánu ka Israelƒuɔ bádi-ma lɛlɔ ni, básɔ bálɔ lɛlɔ básala.

¹⁶Amu na Ɔga Hadadeser ɔ́tala na básɔ bátálɔ Siriaƒuɔ bekpone bamba bani nási ketu ɔvi. Na Hadadeser bekpone ɔtɔnkune ɔni baalɔ Sobak ɔ́kpanku bekpone bammɔ úsienku ɔma ɔni baalɔ Helam kemmo.

¹⁷Litemi lɛmɛni lɛnɔ líbeduo Dawid kɔtu. Ɔmmɔ ɔsu ɔ́sala Israelƒuɔ bekpone ƒui. Na bávia Yordan Ketu bésie Helam ɔma ɔmmɔ. Siriaƒuɔ lɛnɔ bátu akpagya na bekpo Dawid ku nwuna bekpone.

¹⁸Nsu básɔ bádi Siriaƒuɔ lɛlɔ na békeli Israelƒuɔ bammɔ. Na bana bekpone bani nkɛ lɛgba ni, Dawid ku nwuna bekpone bádu bana mpim aavlene. Na bani mɔɔka kɛɛkɛ lɛnɔ ni, bana eti leevu-ene (700) na bádu. Na kekpo kammɔ kemmo ni, Siriaƒuɔ bekpone ɔtɔnkune Sobak ɔ́ƒɔ ɔlɛ geen ɔni na úkpi na kekpokɔ mmɔ.

¹⁹Uwi ɔni na baga bani nkya Ɔga Hadadeser kalɔ bánu kalɛ na Israelƒuɔ békpo bádi-ma lɛlɔ ni, báblaku Israelƒuɔ unwi na béti lɛlɔ bákya-ma kalɔ. Anwuɔsu liƒu lɛ́da Siriaƒuɔ na básu ka basɔ belete Amonƒuɔ kebunku kadi.