Read Lelemi Samuel 2 12 Bible Online

Samuel 2 12 - Lelemi bible

Samuel 2 12

¹Unwoti ɔ́tala nwuna Kenye Udiene Natan ɔ́kya Dawid. Ka údu-nwu kudɔ ni, ɔ́su-nwu ɔnini, “Nkyuli inyɔ badi bákya ɔma ɔdi kemmo. Unwi ɔdi ɔlakɛne na unyɔdi ɔdi ɔwabane.

²Na ɔlakɛne ɔmɛni ubo baƒonu ku ɔmantɛ bakɔ, na bemomo geen.

³Nsu ɔwabane ɔmmɔ anwu ni, uuubo lɛla lɛdi uuutulo koƒonu kuledi kunwi pɛ kɔni na úye. Ɔ́tumini koƒonu kɔmmɔ, na kɔ́bi lɛlɔ na kɔ́ti-nwu geen ku nwuna bebi ƒui. Ɔɔyá na koƒonu kɔmɛni kɔɔdiku-nwu na lɛkyami kemmo na kɔɔníku-nwu na ɔɔƒɛɛ unwi kemmo. Na nwuna enu kemmo kani na kɔɔlɛɛ taatɛ, na kuse kute-nwu aani ubi ulekubi kalɛ.

⁴“Uwi ɔmmɔ kemmo kani ni, ulusiene ɔdi úbeduo ɔlakɛne ɔmmɔ. Nsu ɔlakɛne ɔmmɔ úni na úteƒie koƒonu kɔdi iye ɔmantɛ akɔ na nwuna bebuo akɔ na uti ɔbla nwuna ulusiene ɔmmɔ lɛƒɔ. Mmomu úsie útéƒie ɔwabane ɔmmɔ koƒonu kuledi kunwi kɔni na ubo, na úti ɔ́nwa úte nwuna ɔƒɔ ɔmmɔ.”

⁵Litemi lɛmɛni lɛ́ya na Dawid ɔ́kɛ kɔnyi geen na ɔlakɛne ɔmmɔ ɔbladu ɔmmɔ ɔsu. Mmɔ na ɔ́su Natan ɔnini, “Ɔkɛnku Unwoti ɔni nli ngba uwi ƒui lɛlɔ ni, ɔlɛka ukyuli ɔni nábla lɛla lɛmmɔ ukpi!

⁶Na ɔlɛka ɔƒɔ koƒonu kɔni na úƒie mmɔ kayu akpa ene. Ɔsika ɔ́bla ulikplu na útanu kɔnyana.”

⁷Amu na Natan ɔ́su Dawid ɔnini, “Awɔ ndi ukyuli ɔni nábla lɛla lɛmmɔ! Ɔƒɛni teenu. Unwoti Israel Katɔti ɔnini, ‘Líwi-ɔ nnɔmii lili na líse-ɔ lɛga ka ataadi Israelƒuɔ lɛlɔ. Na lídie-ɔ na Saul enu kemmo.

⁸Líti ƒula ɔtɔlati kaduli líte-ɔ. Na nwuna beleku lɛnɔ bakya-a enu kemmo. Israel ku Yuda kaba kemmo bebi ƒui awɔ mɔɔdi-ma lɛlɔ. Na si ala amɛni ƒui átabɔ-ɔ ni, lɛkana na liti abambadi libunku-nya lite-ɔ.

⁹Bi ɔsu na átadi Unwoti litemi lɛlɔ na ábla likpidi na nwuna anumi? Awɔ nádu Uria Hitini ku kewii na áƒɔ ulekudi énwini awɔ ɔdi. Ɔkɛnku awɔ ɔsu na Amonƒuɔ bádu-nwu ku kewii.

¹⁰Na ɔƒɛni ni, ka éni na átadi mina litemi lɛlɔ mmomu éƒie Uria ulekudi áƒɔ éti ɔsu ni, kekpo kaaadubo bɔsa ƒula kaduli kudii.’

¹¹“Na asɔ enu lɛla lɛni na Unwoti ɔ́sɔ ɔ́su. Ɔnini, ‘Awɔ ɔlati ƒula kaduli ubi na ndubɔya na ɔgbankpi ubo-ɔ lɛlɔ. Na ndubɔya na enye ataanu nwaa asa na liti ƒula beleku lite ƒula kaduli ukyuli ɔni mma-a lɛlɔ geen. Na anwu ku-ma badubo bɔtɛ ɔƒiiwi.

¹²Lɛla lɛni na awɔ ábla ni, ábla-ni na bɔbɛ kemmo. Nsu ami ndubɔya na babla-a lɛla lɛmmɔ ɔƒiiwi nwaa na Israel kadi ƒui anumi.’ ”

¹³Mmɔ na Dawid ɔ́su Natan ɔnini, “Lɛ́bla likpidi lɛ́ƒiɔ Unwoti.” Na Natan lɛnɔ údie kenye ɔnini, “Unwoti úti ƒula likpidi ɔ́kyiɛ-ɔ ɔni na ɔɔɔdubo bɔya na ekpi na ɔmmɔ ɔsu.

¹⁴Nsu ka lɛla lɛni na ábla ɔsu áya na Unwoti bekisine baasu ala teewi-nwu lɛlɔ na basɔ balánu-nwu taabu ɔsu ni, ubi ɔni na báwɔ béte-ɔ mmɔ ɔdubo bukpi.”

¹⁵Ɔmmɔ kama ni, Natan ɔ́tɔlɔ úsie kaduli na Katɔti ɔ́ya na ɔlɛ kpakplaa úbo ubi ɔni na Uria ulekudi ɔ́wɔ úte Dawid mmɔ.

¹⁶Dawid úvele Katɔti na ubi ɔmmɔ lili. Únyimi kenye na ɔ́kalɛ lɛlɔ ɔ́kya ɔtɔ, na kalɔkplu kani na ɔɔtɛ usien biala.

¹⁷Na benengu bani nkya-nwu kaduli bénye-nwu lɛlɔ ka nka ɔta na ubadi lɛla lɛdi, nsu úni ɔnii ulata na wakya lɛla lɛdi lɛnɔ kenye.

¹⁸Na limeyi maatɛdi lɛlɔ ni, ubi ɔmmɔ úbekpi. Nsu Dawid kabla bablane baayia ka basu-nwu ka ubi ɔmmɔ úkpi. Ɔsika bákali na básu banini, “Uwi ɔni na ubi ɔmmɔ ɔtɛ na útekpi tɔ ni, bɔ́su Dawid lɛla biala, nsu útakpete-bu. Dɛ na bɔdubo-nwu bɔsu ɔƒɛni bɔnii ubidi úkpi na utéti lɛla lɛdi ɔbla lɛlɔ.”

¹⁹Ka badaku ɔmɛni ni, Dawid únu-ma kabɛnsɛ na ɔ́ti ka ubi ɔmmɔ úkpi. Ɔmmɔ ɔsu úye-ma ɔnini, “Bukpi na ubi ɔmmɔ úkpi?” Amu na bédie kenye banini, “Ɛɛn ubi ɔmmɔ úkpi.”

²⁰Mmɔ kani na Dawid ɔ́ta kɔnakunwi. Na ka útákpi ntu ɔ́wɔlɔ ni, ɔ́wɛɛ ala ƒɛƒɛɛ na ɔ́vumana nwuna adala na úsie útákpa na Unwoti kakpakɔ na. Ɔmmɔ kama únwini úsie kaduli na úye na béboku-nwu adila na ɔ́di.

²¹Dawid kabla bablane béye-nwu banini, “Bi ɔsu na aabla lɛla lɛmɛni udu? Uwi ɔni na ƒ'ubidi ɔkya ni, ényimi kenye na éwulo kɔnyana geen. Na ɔƒɛni ka ubi ɔmmɔ úkpi ni, áta na eli aadi!”

²²Mmɔ na Dawid údie kenye ɔnini, “Uwi ɔni na ubi ɔmmɔ uli ngba ni, línyimi kenye na líwulo kɔnyana. Na mina kasusu ndi ka ukyuli ɔdi ɔɔɔgyi lɛla, ɔƒɛni kalɛ Unwoti ɔdubɔnu-mi kɔnyana na ɔya na ubi ɔmmɔ ɔnwanya na ɔsɔ ulekpi.

²³Nsu ka útebo-nwu kemmo lɛni na bukpi na úkpi ni, bi ɔsu na ɔlɛka lɛsɔ nteenyimi kenye lɛnɔ? Bɔkana na ndubɔkana na lɛsɔku-nwu liboku ngba? Ami kani ndubo bukpi na lisie-nwu kudɔ na anwu ɔsɔ ulénwini ulebo-mi kudɔ.”

²⁴Ɔmmɔ kama Dawid ɔ́sia ulekudi Bat-Seba kɔnu. Na anwu ku-nwu básɔ bátɛ na báwɔ ubi bamba na básia-nwu lɛnyi banii Salomo. Na ubi ɔmmɔ lɛlɔ lɛ́da Unwoti ebiti.

²⁵Na ɔkɛ ɔmmɔ ɔsu Unwoti ɔ́tala nwuna Kenye Udiene Natan ɔnii utásia-nwu lɛnyi ɔnii Yedidia na nwuna kalɔ ndi Unwoti ɔɔyɔ́-nwu.

²⁶Na uwi ɔmmɔ kemmo ni, Yoab úkpoku Amonƒuɔ na bana ɔma unengudi ɔni baalɔ Raba kemmo na úƒie bana ɔga lɛgbanya lɛni na ɔ́tu ɔ́mana ɔ́ƒɔ.

²⁷Na ɔtala batu ɔ́kya Dawid ɔnii batásu-nwu banini, “Líkpoku Raba ɔma bekyuli na líƒie bana ketu kani na beedú ntu lɛ́ƒɔ-ma kudɔ.

²⁸Ɔmmɔ ɔsu sala bekpone bakladi na beyu ɔma ɔmmɔ batu na bikpoku-ma na bɛƒɔ ɔma ɔmmɔ. Si ɔɔɔdi lɛni ni, ndubukpo lɛƒɔ ɔma ɔmmɔ na liti mina lɛnyi lɛsia mmɔ.”

²⁹Ɔmmɔ ɔsu Dawid ɔ́sala bekpone bammɔ ƒui na báyu ulu bésie Raba bétékpoku-ma na béƒie ɔma ɔmmɔ báƒɔ.

³⁰Na úbimi kagabwa kani mbi bana ɔga lili. Na sika ugyiedi kabwa kammɔ unu wabla aani antabi akyami avlaatɛ unu. Na bákya-ka bɔdia ku asɛɛ ani na béti atabi ani náƒɔ kuye bábla. Na béti-ka bébi Dawid lili. Na béƒie ala pii lɛnɔ báƒɔ na béti bátɔlɔku ɔma ɔmmɔ kemmo.

³¹Únye bani ƒui na kekpo kéƒie mmɔ lɛlɔ, na útákya-ma kɔdadi ku anwami ku atumala bamba enu, na beekúlo atimbɔ. Na lɛni kani na ɔ́bla na Amonƒuɔ lɛma bamba kemmo ƒui lɛnɔ. Ɔmmɔ kama Dawid ku nwuna bekpone bammɔ bénwini bésie Yerusalem.