Read Lelemi Samuel 2 22 Bible Online

Samuel 2 22 - Lelemi bible

Samuel 2 22

¹Dawid údie ɔnu ɔdi úte Unwoti uwi ɔni na údie-nwu ɔ́lɛku nwuna bekisine ƒui ku Saul enu kemmo.

²Na ɔ́su ɔnini, “Unwoti unye ute-mi aani lɛtakpɛ ku katamikukɔ kani lɛlɔ na líkpo kama.

³Ɔɔgyumana-mi aani ukyuli ɔni muunye teetile-mi na ɔɔƒɔ́-mi, na ɔɔyá na mɔɔkɛ́ ɔyikun. Anwu nédie-mi na balalane enu kemmo.

⁴Unwoti Katɔti, awɔ námanku bumwi. Lɛ́kpali-ɔ na édie-mi álɛku mina bekisine enu kemmo.

⁵“Kukpi kabuli kényimi-mi. Na útiku-mi úselaku aani kalɛ ketu kani néyi keeminime.

⁶Kukpi abuli ényimi-mi. Na kunye-mi anumi kɔɔkya-mi liƒu uwi ndi uwi.

⁷Na mina lɛbibo lɛmɛni kemmo ni, lɛ́kpali mina Unwoti Katɔti na líwulo lɛ́kya-nwu nnii ubunku-mi. Na únu-mi lɛdi ɔ́siku nwuna kakpakɔ na úbunku-mi.

⁸“Kalɔ kemodi kaagyú taawɔ na kaatɔ́ kpakpaakpa. Na abi ƒui ákunku, ɔsika Unwoti úti kɔnyi.

⁹Uyɔ ɔ́lɛ-nwu enwu kemmo na ogya lɛnɔ ɔ́lɛ-nwu kenye kemmo ɔ́kyula ala. Na ogya agyabi ani náƒɔ ogya geen sɔsɔ aasí taabayu.

¹⁰Na ɔ́lɛmi katɔ na ɔ́yu úbo kalɔ na liƒlukutu lɛ́ƒɔ-nwu lɛgba kalɔ ƒui na ɔ́bla suu.

¹¹Na ulie ɔtu udu ɔdi mbo avwi na baalɔ-nwu Kerub lɛlɔ na úveyi ɔ́yu úbo.

¹²Na lɛdisa libi-nwu lɛlɔ aani awu. Na liƒlukutu lɛni némini na lise suu lɛ́ka lɛ́mana-nwu na lɛ́bɛla-nwu.

¹³Nwuna bɔda bɔlɛ ku bukeye bɔni nédie lɛlɔ kayaa kaabwɛ ogya taalɛ mmɔ.

¹⁴Na Unwoti uudie lɛdi ku kudu bonwu na kayaa aani kalɛ na katɔ keedu. Na anwu ɔni ntulo ƒui mmɔ lɛdi lɛɛku taasi katɔ katɔ ƒui teebewi kalɔ.

¹⁵Unwoti úbo atula ɔ́kya nwuna bekisine bammɔ akɔ na úgyingya-ma. Na ɔ́ya na ogya ɔni mɔɔbwɛ taalɛ ɔ́bɔku-ma na békeli bátɔlɔ.

¹⁶Ɔ́bɔku ɛpu na ɔƒɛƒɛɛ ɔni mɔɔlɛ́-nwu enwu ɔ́ya na ɛpu ɔmmɔ kalɔ kátina nwaa na kalɔ kemmo atabi ɔka údie lɛlɔ.

¹⁷“Ɔkɛnku nwuna ɔyikun lɛlɔ na úbedie-mi ɔ́lɛku ligyu ntu bɔmmɔ kemmo.

¹⁸Údie-mi ɔ́lɛku mina bekisine kpakplaa bani muukisi-mi enu kemmo na ɔ́ƒɔ-mi na bani nábi básiaku-mi na bebo ɔkplu betulo-mi kudɔ.

¹⁹Mina bekisine bénye báda-mi ka nkya ɔgbankpi kemmo ɔsu. Nsu Unwoti údie-mi, ɔsika nwuna lɛlɔ na líkpo kama.

²⁰Údie-mi bana akɔ únyene kanwaadikɔ na lɛ́kɛ bɔnwuna, ɔsika mina lɛlɔ lɛɛda-nwu ebiti.

²¹“Unwoti ɔ́bla-mi lɛƒɔndia, ɔsika nsiaku-nwu kama siin na úse-mi kɔdɛ, ɔsika likpidi lɛdi lɛɛɛda-mi.

²²Mɔɔdi Unwoti ɔda bubo lɛlɔ. Na ńtedeyi ńtalɛ nwuna ulu lɛlɔ na lɛ́ƒiɔ-nwu.

²³Ngyi nwuna ɔda bubo ƒui na ńtedie ɔdi atu.

²⁴Ɔgyi kalɛ na nda lɛlɔ siin na ńtabla likpidi lɛdi.

²⁵Unwoti úse-mi kɔdɛ, ɔsika mɔɔbla ala siin na ɔgyi ka likpidi liiibo-mi kayi.

²⁶“Bekyuli bani mɔɔbla ala ulu lɛlɔ ni, awɔ lɛnɔ aabla-nya ulu lɛlɔ teete-ma. Na bani mɔɔdi ƒula litemi lɛlɔ ni, aabla-ma lɛƒɔndia uwi ndi uwi, eedie lɛlɔ taatina-ma na beledie-ɔ bɔƒiɔ bɔdi.

²⁷Na bani mɔɔsia bana ablala anu ni, awɔ lɛnɔ aasia ala anu teete-ma. Na bani na balásia bana ablala anu ni, aaní-ma kɔtu na bana ablala kenye.

²⁸Aaƒɔ́ bekyuli bani muuboku lɛlɔ kalɔ, nsu bani mɔɔtalaku lɛlɔ katɔ na balábu ni, eeboku-ma kalɔ.

²⁹O Blɔti, awɔ nda-mi ukpo na uléni. Na kesii kani nse-mi suu ƒui kékeye.

³⁰Awɔ muute-mi ɔlɔkplu na muunye taasiaku bekpone kasala lidu lidu. Na aayá na mɔɔdi lɛma pii lɛlɔ teeƒie-ni taaƒɔ.

³¹“Katɔti lilu ƒui lise kede kede. Na ɔkɔ biala uuubo-nwu kemmo. Ɔdi lɛgyumanala ute bekyuli bani nátamiku-nwu.

³²Na ɔma lɛnɔ ndi Katɔti ɔmmɔ si ɔɔɔdi Blɔti? Ɔsika anwu kani ndi lɛtakpɛ lɛni lɛlɔ na bula kama kekpo.

³³Unwoti Katɔti mɔɔtu-mi akpagya ɔkɛnku nwuna ɔyikun lɛlɔ. Na ɔɔmɛnɛ kuƒi siin teete-bu.

³⁴Ɔ́ya na mina lɛgba lɛ́yu ɔkplu aani akwa. Na ɔɔtɔnku-mi taavinku ulu siin lɛlɔ.

³⁵Na anwu mɔɔtina-mi kekpo kɔkwɛ ƒui kalɛ lɛkana lɛda kataminta kani mbo ɔkplu geen.

³⁶O Unwoti, awɔ mɔɔgyumana-mi na aaƒɔ́-mi ngba. Na áya na lɛ́ƒɔ lɛnyi ɔkɛnku ƒula ɔyikun bonwu lɛlɔ.

³⁷Ábwɛ mina kasiakɔ éte-mi na kábɛbɛ na ńtagbanta ńteduo mina bekisine enu.

³⁸“Lɛ́bi lɛ́siaku-ma kama úti útédu ka lɛ́siaku-ma. Na ńtenwini kama útédu uwi ɔni na lɛ́yila-ma udu.

³⁹Líbo-ma líwi kalɔ ɔni na basɔ balákana bɔta na kesii kani na batɛ na mina lɛgba akɔ mmɔ.

⁴⁰Átu-mi akpagya ku ƒula ɔyikun na lísie kekpokɔ. Na áya na lɛ́di mina bekisine ƒui lɛlɔ.

⁴¹Na áya na lɛ́bɔku mina bekisine na békeli bátɔlɔ. Na bekyuli bani muukisi-mi ƒui áya na lɛ́yila-ma udu.

⁴²Báva bákpali ka ukyuli ɔdi ubaƒɔ-ma, nsu ɔdi uuubo na ɔƒɔ-ma. Na bákpali Unwoti muedi, nsu útakpete-ma.

⁴³Mmɔ na lɛ́kɔ-ma lɛ́bla kpɛtɛ kpɛtɛ aani ɔtumu ɔni na ɔƒɛƒɛɛ uuti taatɔlɔku. Na lɛ́tu-ma lídie aani aba ntéwi ulu lɛlɔ.

⁴⁴“Áƒɔ-mi álɛku batuɔkplune enu kemmo. Na áya na línwini kadi bekyuli ƒui ɔtɔnkune. Na kadi bekyuli bani na lɛɛɛgyi kudii mɛni muedi ni, awɔ Unwoti áya na bakya-mi kalɔ.

⁴⁵Baƒɔ bammɔ ƒui beebo na baakya lili kalɔ teete-mi, Si lídie lɛdi ni, baabla taasiaku mina etemila lɛlɔ.

⁴⁶Na bálɛ bási bana kɔbɛkɔ bébo ku liƒu, ɔsika básɔ beeebo lɛnunsia lɛdi.

⁴⁷“Bɛya bumwi Unwoti ɔni nli uwi ndi uwi. Anwu ndi mina lɛtakpɛ lɛni lɛlɔ na nkpo. Ndubo-nwu lɛnyi katɔ bɔkɔliku, ɔsika anwu mɔɔƒɔ́-mi.

⁴⁸Anwu muudie mina bekisine kasi teete-mi. Na anwu mɔɔyá na kadi bamba bekyuli baakya eli kalɔ teete-mi.

⁴⁹Unwoti údie-mi ɔ́lɛku mina bekisine enu kemmo. Na úti-ma ɔ́kya-mi lɛgba kalɔ. Na ɔ́gyumana-mi ɔ́siku bakantankpine kudɔ.

⁵⁰Ɔmɛni ɔsu ni, O mina Unwoti, ndubumwi-ɔ lɛnyi na kadi bekyuli ƒui akɔ. Na ndubudie agya lɛkɔliku-ɔ lɛnyi katɔ.

⁵¹Awɔ náya na Dawid ƒula ɔga ɔƒunadi ɔɔdi nwuna bekisine lɛlɔ geen. Na éti ƒula bɔyɔ bɔni naaavumana kudii éte anwu ɔni na ése likpo mmɔ ku nwuna bawɔ úsela uwi ƒui.”