Read Lelemi Samuel 2 7 Bible Online

Samuel 2 7 - Lelemi bible

Samuel 2 7

¹Unwoti ɔ́ya na Dawid ɔ́kɛ bɔnwuna ɔ́siku nwuna bekisine bani náka bámana-nwu enu kemmo na úbo úbelie nwuna ɔga kaduli.

²Ɔmmɔ kama ni, ɔ́su Katɔti Kenye Udiene Natan ɔnini, “Ami nli ɔga lɛgbanya lɛni na béti egyii ani na áƒɔ kuye geen bátu. Nsu Unwoti Bunyimi Adaka ɔmmɔ anwu ɔlɛ kevo kemmo.”

³Mmɔ na Natan údie kenye na ɔ́su-nwu ɔnini, “Lɛla biala na aakali ka abla ni, awɔ bla-ni. Ɔsika Unwoti uliku-ɔ na ɔdubo-ɔ bubunku.”

⁴Nsu usien ɔmmɔ kani na Unwoti ɔ́su Natan ɔnini,

⁵“Sie mina kabla ɔblane Dawid kudɔ na atásu-nwu ka lɛla lɛni na ami Unwoti muuye-nwu anini, ‘Awɔ ndubɔtu ɔtɔ ete-mi na lilie-nwu kemmo?

⁶Ńtelie ɔtɔ ɔni na bayawine béti bana enu bátu kudii, mmomu Adi Kevo kani na baagyú taada taavinku kemmo na lílie ɔ́si uwi ɔni na lídie mina kadi bekyuli Israelƒuɔ lɛ́lɛku Egyipte kalɔ úti úbedu ɔmwi.

⁷Na uwi biala na mina kadi bekyuli Israelƒuɔ báta bási kesii kadi bésela kesii bamba ni, ami lɛnɔ nsiaku-ma. Na batɔnkune bani na lɛ́ƒuna mmɔ ni, ɔmani na lɛ́su nnii beti egyii ani náƒɔ kuye mmɔ adi batu keliekɔ kadi bete-mi na lilie dii?’

⁸“Na ɔƒɛni ni, su mina kabla ɔblane Dawid anii ami Unwoti Ɔyikune Ƒui nnii, ‘Asa na ndubɔƒuna-a na enwini mina kadi Israel ɔtɔnkune ni, na nka baƒonu kani na aakpanku teesienku kadikɔ.

⁹Na kesii biala na akɛ ni, lɛ́siaku-ɔ. Na líbunku-ɔ na ádi ƒula bekisine ƒui lɛlɔ. Na ɔƒaani lɛnɔ ni, ndubɔbla-a na aƒɔ lɛnyi aani baga bamba bani náƒɔ lɛnyi bétulo ƒui na kalɔ lɛlɔ.

¹⁰Ɔƒɛni ni, ndubɔƒuna keliekɔ sɛsɛɛ kadi lise lite mina kadi bekyuli ka belie. Na ndubɔya na belie kesii kammɔ ɔni na bekyuli badi basɔ belékpoku-ma lɛnɔ aani kalɛ na kadi bamba badi bábla bábavi.

¹¹Ɔsika kuuku ni, lɛni na kadi bamba bekyuli bamɛni békpoku mina kadi bekyuli Israelƒuɔ ɔ́si uwi ɔni na líse kalɔ mɔɔƒuna batɔnkune teete-ma ka batɔnku-ma. “ ‘Na ɔƒaani ni, ndubute-mii bɔnwuna na ɔdi lɛnɔ ɔsɔ ulékpoku-mii na ɔdi-mii lɛlɔ lɛnɔ. Na lɛnɔ ni, ami Unwoti mɔɔsu-ɔ kpakplaa ka ndubɔƒuna ƒula kaba kemmo bebi na badi lɛga na babla kabla bete-mi.

¹²Na si uwi ɔni na ebekpi na átɔlɔ ébo ƒula bati kudɔ ni, ƒula kaba kemmo ubi na ndubɔya na bese lɛga na ƒula kenye na ɔdubɔlɛ ɔsi awɔ ɔlati kemmo. Na ndubɔya na nwuna lɛga kadikɔ kenye kpakplaa.

¹³Na ubi ɔmmɔ ndubɔtu ɔtɔ ute mina lɛnyi. Na ndubɔya nwuna lɛgakadikɔ liboku lɛdubuse liteesie uwi ƒui.

¹⁴Ndubɔdi-nwu kɔti. Na anwu lɛnɔ ɔdi mina ubi. Na si ɔ́bla lɛla lɛdi ɔ́ƒiɔ-mi ni, ndubɔni-nwu kɔtu aani kalɛ na ubi ɔti ɔɔní ubidi kɔtu,

¹⁵Nsu bɔyɔ bɔni nkya ami ku-nwu ntɛ bulékulo kudii aani ami ku Saul bɔdi kalɛ. Anwu na lɛ́da lídie lɛga kadikɔ mmɔ asa na líti awɔ líse nwuna kenyekɔ.

¹⁶Ƒula ɔtɔ kemmo ku ƒula lɛgakadikɔ kadubuse keteesie uwi ƒui.’ ”

¹⁷Ala ani na Natan únu mɛni ni, ɔ́sɔku-nya ƒui úbasu Dawid kalɛ kani na Unwoti ɔ́su-nwu.

¹⁸Ka Dawid únu ala amɛni ni, anwu kani na ɔ́ta úsie Adi Kevo kani kemmo na beesié taatákpali Unwoti na útélie kalɔ. Mmɔ na ɔ́su ɔnini, “O Unwoti ɔni ntulo ƒui, ami ku mina kaduli bekyuli bútamanku lɛƒɔndia libendi lɛni udu na ábla éte-bu.

¹⁹O Unwoti Ɔbune, ɔɔɔdi ami kani na éte kusɛ kusɛ ábavi. Mmomu ƒula anu asia mina ɔtɔ kemmo bekyuli lɛnɔ lɛlɔ. Na aasu kpakplaa ɔƒaani ka adubute-ma kusɛ kusɛ na uwi ɔni ndubo kemmo. O Unwoti Ɔbune, mɔɔnu ka ɔmɛni ɔɔɔdi lɛla lɛni na aabla teete bekyuli ƒui.

²⁰“O Unwoti, bi na ami Dawid nsɔ mbo lɛnɔ na masu-ɔ, ɔsika agyi ami ƒula kabla ɔblane.

²¹Ɔkɛnku ƒula litemi ku lɛƒɔyɔ lɛlɔ na ábla ala enengudi amɛni na édie-nya átina ami ƒula kabla ɔblane.

²²“O Unwoti Ɔbune, ébomo geen na ɔdi uuuse aani ƒula kalɛ. Na aani kalɛ na búnu ku bula atu ni, Katɔti ɔdi uuubo ntu awɔ kani.

²³Na bekyuli badi lɛnɔ beeese aani ƒula kadi bekyuli Israelƒuɔ kalɛ na kalɔ kamɛni lɛlɔ. Ama kani na awɔ Katɔti étédie álɛku Egyipteƒuɔ lɛlɔ bɔdi kalɔ éte lɛlɔ na bénwini ƒula kadi bekyuli. Na ƒula lɛnyi lɛ́ƒɔ kuye na ábla ala enengudi éte-bu ku akɔla ala budie taatina ani mɔɔda bekyuli liƒu. Na ábɔku kadi bamba bekyuli ku bana baƒiɔ álɛku bana kuliekɔ na bana kalɔ kénwini abu Israelƒuɔ bati kadi.

²⁴Éti abu Israelƒuɔ énwini ƒula kadi bekyuli geen uwi ƒui. Na awɔ Unwoti énwini bula Katɔti.

²⁵“Unwoti Katɔti, ɔƒaani ni, bla ƒula linyese lɛlɔ te ami ƒula kabla ɔblane ku mina kaduli bekyuli aani kalɛ na ásu.

²⁶Na ƒula lɛnyi lɛdubusie ɔgyu uti úsela uwi ƒui. Na kadi ƒui bekyuli badubɔsu banini, ‘Unwoti Katɔti Ɔyikune Ƒui mɔɔdi Israelƒuɔ lɛlɔ. Na Dawid kaba kemmo bebi ndi bagadine bani na ɔ́ƒuna.’

²⁷“O Unwoti Ɔyikune Ƒui, Israelƒuɔ Katɔti, édie átina-mi na ásu-mi ka awɔ ndubo mina lɛgadi ɔtɔ bɔtu bute-mi. Ɔmmɔ ɔsu na ami ƒula kabla ɔblane líse kayi mɔɔkpali-ɔ na lɛda ala amɛni lɛva-a anumi.

²⁸O Unwoti Ɔbune, awɔ ndi bula Katɔti ɔni lɛlɔ kani na ukyuli ɔdubɔkɛ kama kekpokɔ. Na ásu-mi kpakplaa ka adubɔbla ala abuni enengudi amɛni ete-mi anii ƒula kabla ɔblane kalɛ.

²⁹Anwuɔsu muuvele-ɔ nnii te mina kaduli bekyuli kusɛ kusɛ. Na ulu ɔmmɔ lɛlɔ kani na adubuti ada-ma na ataanu-ma lɛlɔ uwi ƒui. Ɔsika lɛni na awɔ Unwoti Ɔbune ásu kpakplaa ése. Na si ábla ɔmɛni sɔsɔ ni, na adubute mina kaduli bekyuli kusɛ kusɛ ɔmmɔ geen úsela uwi ƒui!”