Read Lelemi Samuel 2 9 Bible Online

Samuel 2 9 - Lelemi bible

Samuel 2 9

¹Limeyi lɛdi ni, Dawid úye Israelƒuɔ bammɔ únu ɔnini, “Saul kaba kemmo ubi ɔdi ɔsɔ ɔkya ngba? Na si ɔdi ɔkya ni, mɔɔyɔ́ ka lɛbla-nwu lɛƒɔndia lɛdi ɔkɛnku Yonatan ɔsu.”

²Ɔƒɛni na uwi ɔmmɔ kemmo ni, Saul kaduli kabla ɔblane ɔdi ɔ́kya na baalɔ-nwu Siba. Ukyuli ɔmɛni útaabla Saul kabla na nwuna kaduli. Ɔmmɔ ɔsu bésie na bátálɔ-nwu béboku. Na ka úbeduo ni, Ɔga Dawid úye-nwu ɔnini, “Awɔ ndi Siba?” Mmɔ ni, údie kenye ɔnini, “Ɛɛn, Ati Ɔbune, ami na ɔdi.”

³Amu na Dawid úye-nwu ɔnini, “Saul kaba kemmo ubi ɔdi ɔsɔ útebu ɔɔɔkya ngba na lɛbla-nwu Katɔti lɛƒɔndia?” Mmɔ na Siba údie kenye ka ukyuli ɔdi ɔkya. Na anwu ndi Meƒiboset ɔni na ɔdi Yonatan ubidi. Nsu ubidi ɔmɛni ɔ́ƒɛ uwi kalɔ.

⁴Amu na Ɔga Dawid úye-nwu ɔnini, “Wɛ na ukyuli ɔmmɔ ɔkya?” Siba údie kenye ka, “Ɔkya ɔnana ɔdi baalɔ Makir ɔni ɔti ndi Amiel kaduli na ɔma ɔni baalɔ Lo-Debar.”

⁵Anwuɔsu Dawid ɔ́tala ɔnii bátálɔ-nwu beboku.

⁶Ka Yonatan ubidi Meƒiboset úbeduo ni, úbo kalɔ buɛɛ na ɔ́kya Ɔga Dawid lili kalɔ ku ɔbu. Amu na Ɔga Dawid úye-nwu ɔnini, “Awɔ ndi Meƒiboset?” Údie kenye ɔnini, “Ati ami ƒula kabla ɔblane na ɔdi.”

⁷Mmɔ na Dawid ɔ́su-nwu ɔnini, “Tayia, ɔsika lɛ́bla kasusu ka lɛbla-a lɛƒɔndia. Na ndubɔnu-ɔ lɛlɔ na ƒ'ɔti Yonatan ɔsu. Na ndubɔsɔku kɔlɔ kɔni ƒui ndi ƒula nana ɔnana Saul kɔdi ƒui lite-ɔ. Na ɔɔɔdi ɔmmɔ lɛti, mmomu adubo butaadiku-mi uwi biala na mina kadikɔ.”

⁸Meƒiboset ɔ́kya lili kalɔ buɛɛ ka únu kenye kamɛni na ɔ́su ɔnini, “Ati, ami liiibo lɛla lɛdi kablakɔ. Na nse aani akpewe ɔni na úkpi. Bi ɔsu na eete-mi ɔbu ɔmɛni udu na ákɔliku-mi étésie kenyekɔ kenengudi kamɛni udu.”

⁹Ɔmmɔ kama ni, Dawid ɔ́ya na bálɔ Siba béte-nwu na ɔ́su-nwu ɔnini, “Ala ani ƒui na adi Saul ku nwuna kaba kemmo bekyuli adi ni, lɛ́sɔku-nya líte ƒula ati Saul uwɔ.

¹⁰Na awɔ ku ƒula bebi ku ƒula kabla bablane ƒui ni, amii na ɔlɛka bisie kemo bite-nwu na nwuna kalɔ kammɔ lɛlɔ. Na amii kani ndubɔƒɛ edula ammɔ ƒui bite-nwu kalɛ na adila ese ete anwu ku nwuna kaduli bekyuli ƒui kaduɛ. Nsu Meƒiboset ɔlati ni, anwu ɔdubo-mi kudɔ butaadi uwi biala.” Na Siba bebi ƒui bebo leevu-ɛlɔ ku kabla bablane aavlanyɔ.

¹¹Amu na Siba ɔ́su Ɔga Dawid ɔnini, “Mina Ati ku mina ɔga, ami ƒula kabla ɔblane lɛ́tuna ka lɛla biala na ébo-mi ɔda ka mbla ni, ndubɔbla-ni lɛni kani.” Na ɔ́si uwi ɔmmɔ kemmo ni, Meƒiboset útaadi ku Dawid aani kalɛ kani na anwu ku nwuna bebi baadi kalɛ.

¹²Meƒiboset ubo ubi ɔnanabi ɔnamudi ɔdi na baalɔ-nwu Mika. Na Siba ku nwuna kaduli bekyuli, baabla kaba teete Meƒiboset.

¹³Ɔmmɔ ɔsu Meƒiboset ɔni na ɔdi ukyuli ɔni na ɔ́ƒɛ uwi kalɔ na ulákana busie anwu ɔlati ni, ɔ́ƒɔ lɛlɔ ɔ́kya Yerusalem na Dawid kesii, ɔsika mmɔ na ɔɔdi nwuna adila biala.