Read Lelemi Baga 1 10 Bible Online

Baga 1 10 - Lelemi bible

Baga 1 10

¹Uwi ɔni na Seebaƒuɔ ɔga ɔni ndi uleku únu Salomo lɛnyi kalɛ na lísie anumi na lɛ́ƒɔ kuye mmɔ, ku kalɛ na Salomo ku Unwoti ntɛ buse mmɔ ni, ɔ́ta úsie-nwu kudɔ utákɔku-nwu, na uye-nwu ala ani mbo ɔkplu unu.

²Na ka úsela ni, ɔda bekyuli pii, na bebuo ala betine lɛnɔ béti ala ani muunwenyi ƒɛƒɛɛ ku sika asɛɛ lidu lidu ku sika ugyiedi béboku Salomo. Na bátɛmi básiku ala ani ƒui nkya-nwu kasusu kemmo lɛlɔ.

³Na Salomo údie ala ani ƒui na uleku ɔmmɔ úye-nwu kenye. Na lɛla biala lítayu Salomo ɔkplu.

⁴Na uwi ɔmmɔ ni, Seebaƒuɔ ɔga uleku ɔ́nu Salomo lɛnunda ku kaduli kani na ɔ́tu uli mmɔ.

⁵Na ɔ́sɔ ɔ́nu adila ani na béti bése nwuna kadikɔ ku nwuna benengu bani muulie taadiku-nwu ku kalɛ na nwuna kaduli kabla bablane baabla ala taavinku, ku lɛwu lɛni baakya teenye kagyumana si ɔɔdi, ku akpala ani na ɔɔbla na Unwoti kakpakɔ. Ala amɛni ƒui ábla-nwu kalɛ kadi, na úbimi kenye úwi.

⁶Amu na ɔ́su Ɔga Salomo ɔnini, “Lɛnunda lɛni na ebo ku ala ani línu lɛ́siku-ɔ lɛlɔ na mina kalɔ lɛlɔ ni, sɔsɔ geen na adi.

⁷Nsu nka ńtaƒɔ-nya ńtadi úti úbedu uwi ɔni na ami ɔlati líbo ḿbanu-nya ku mina lɛnumi. Nsu ala ammɔ kakɛ muedi ńtenu-nya. Ɔsika ƒula lɛnunda ku ƒula lɛlakɛ litulo ala ani básu-mi mmɔ ƒui.

⁸Lili lɛdia ƒula benengu ku ƒula kabla bablane bani nkya-a kudɔ uwi biala na beenú lɛnunda etemila amɛni udu!

⁹Na buumwi Unwoti ɔni ndi ƒula Katɔti, kalɛ na údie nwuna bɔyɔ ɔ́tina-a. Na úse-ɔ Israelƒuɔ ɔga. Ɔsika ubo bɔyɔ ute Israel uwi ƒui ɔsu na úti-ɔ úse lɛga kalɛ na ataanu nwuna ɔda bubo taabla ala ulu lɛlɔ.”

¹⁰Amu na úte Ɔga Salomo sika ugyiedi aani antabi aƒo liti ku ala ani muunwenyi ƒɛƒɛɛ lidu lidu pii ku sika asɛɛ. Na ala ƒɛƒɛɛ lidu lidu ani na Seeba Beleku Ɔga úte Salomo mmɔ ni, emomo ɔni na ukyuli biala útete-nwu ammɔ udu kudii.

¹¹Na Hiram ɔkɔlɔ ubendi ɔmmɔ úti sika ugyiedi ɔ́siku Oƒir úboku-nwu. Na ɔda kugyii kpakplaa kɔdi ekuku pii ku asɛɛ úboku-nwu.

¹²Na Salomo úti ligyii lɛmmɔ úbunku ɔ́tu Unwoti kakpakɔ ku nwuna kaduli. Na ɔ́sɔ úti ligyii lɛmmɔ lɛdi ɔ́bla agyala úti úte lɛnu batune. Na ɔdi útakada kugyii kɔmmɔ ku kuna limomo udu útasiku kesii kadi úteboku mmɔ kudii na kɔsɔ kuuubo lɛnɔ na anu.

¹³Na Ɔga Salomo úte Seeba ɔga uleku lɛla biala na úye-nwu. Ɔmmɔ uuubunku ala ani na Salomo ɔlati úte-nwu ku kaƒɔ ƒaa. Ɔmmɔ kama uleku ɔmmɔ ku nwuna ulu besiene bénwini bésie Seba kalɔ lɛlɔ.

¹⁴Lɛkwa ndi lɛkwa ni, beeti sika ugyiedi aani antabi aƒo eti alɔ (250) teeboku Ɔga Salomo.

¹⁵Ɔmɛni uuubunku kɔsia kɔni na kuye badine baaƒɔ taasiku bana kɔsia kemmo ku kuyii kɔni na Arabiaƒuɔ baga beeyi ku Israelƒuɔ kɔlɛkɛ bagadine kuyii kɔni beete.

¹⁶Na Salomo ɔ́bla kekpo agyumanala bonwu eti ene (200). Na lɛgyumanala biala lɛlɔ ni, úti sika ugyiedi antabi akyami atɛ unu ɔ́kwa-ni.

¹⁷Na ɔ́sɔ ɔ́bla kekpo agyumanala wɛlɛ wɛlɛ eti aku (300) bamba na ɔ́kwaa ɔdi biala lɛlɔ ku sika ugyiedi antabi lɛkyami linwi ku kakɛ unu. Na úti-nya úse nwuna baga kesii na kesii kani baalɔ banii Lebanon lɛku.

¹⁸Ɔmmɔ kama ɔga ɔmmɔ ɔ́sɔ ɔ́nwi baga liboku bonwu lɛdi, na ɔ́klibi-ni kemmo ku ɔtunkpɛ na úti sika ugyiedi ɔ́kwaa-ni lɛlɔ ƒui.

¹⁹Ubili kakɔkɔ ɛku nkya liboku lɛmmɔ. Na ɔ́bla kama kekpokɔ eli kakɛ munu munu. Na ɔ́bla liboku lɛmmɔ na gyata unye enu kɔsiakɔ inyɔ bɔmmɔ ɔvi ɔni ku ɔni.

²⁰Na ubili kakɔkɔ kammɔ lɛnɔ ni, bagyata leevu-inyɔ benye na bebo inyɔ nnye ubili kakɔkɔ biala lɛlɔ ɔvi ɔni ku ɔni. Na bátabla lɛmɛni udu ɔdi bétese lɛga kadikɔ kadi bétete ɔga ɔdi kudii.

²¹Na Ɔga Salomo lɛɛƒɛɛ lɛni kemmo ƒui na ɔɔní ntu ni, sika ugyiedi na béti bábla-ni. Na akyami ani nlɛ kesii kani baalɔ banii Lebanon Lɛku Baga Ɔtɔ kemmo lɛnɔ sika ugyiedi ɔni muukeye sɔɔn ala na adi. Na béteti sika ɔƒualadi bátabla lɛla lɛdi, ɔsika Salomo uwi ni, balábu sika ɔƒualadi aani lɛla lɛni na lɛ́ƒɔ kuye.

²²Na Salomo ubo lɛkɔlɔ libendi pii lɛni mɔɔdi kuye na ntu anumi úbunku Hiram lɛkɔlɔ. Na akwa atɛ biala kemmo ni, nwuna lɛkɔlɔ lɛmmɔ liinwíni teebo na liiti sika ugyiedi ku ɔƒualadi ku ɔtunkpɛ ku baagyii ku baku teeboku.

²³Na ɔga biala uuubo ɔni mbo akɛla aani Ɔga Salomo kalɛ.

²⁴Na kayawi bekyuli ƒui bátaawia kuƒi ka bebenu lɛla lɛdi basiku Ɔga Salomo kudɔ ɔ́si lɛnunda lɛni na Katɔti úti ɔ́kya-nwu kayi kemmo ɔsu.

²⁵Na ukyuli biala mebo Salomo kudɔ ni, uute-nwu etela. Na etela ammɔ adi bene ndi sika ɔƒualadi ku ugyiedi ku lɛwu ku ekpola ku kutu akyala ani muunwenyi ƒɛƒɛɛ ku bapɔnkɔ ku bebuo ala betine. Na ɔmɛni na bekyuli baabla lɛkwa ndi lɛkwa.

²⁶Na Salomo ɔ́sala bapɔnkɔ ku bapɔnkɔ kɛɛkɛ bumomo aani apim unwi ku eti maane (1,400) ku bapɔnkɔ mpim leevu-inyɔ (12,000) bani na úle ɔ́kya lɛma linengudi lɛdi kemmo ku Yerusalem.

²⁷Na Salomo lɛgadi uwi ni, ɔ́ya na sika ɔƒualadi ɔ́bu na Yerusalem aani atabi. Na ɔ́ya na bálɛ sida egyii na émomo geen aani kɔnwingyie egyii ani nábu akya Yuda abi kaƒɔna mmɔ.

²⁸Na Salomo bapɔnkɔ bammɔ ni, nwuna beyedine néye-ma básiku Egyipte ku Kue.

²⁹Na beeyé ɔpɔnkɔ kɛɛkɛ unwi taasiku Egyipte sika ɔƒualadi antabi akyami maatɛ unu. Na ɔpɔnkɔ unwi kuye kɔdi sika ɔƒualadi antabi lɛkyami linwi ku kakɛ unu. Na beyedine bammɔ basɔku-ma beye bete Hetiƒuɔ ku Siriaƒuɔ baga.