Read Lelemi Baga 1 12 Bible Online

Baga 1 12 - Lelemi bible

Baga 1 12

¹Rehabeam úsie Sekem, ɔsika Israelƒuɔ ƒui bésie mmɔ ka bétése-nwu lɛga.

²Uwi ɔni na Yerobeam, Nabat ubidi, únu kenye kamɛni ni, na ɔ́mu ɔkya Egyipte kesii kani na úkeli útábɛ ka Ɔga Salomo ɔɔwia-nwu ɔdu ɔsu. Na mmɔ na ɔ́si úbo.

³Ɔmmɔ ɔsu Israelƒuɔ bátala na bátálɔ Yerobeam béboku, na anwu ku Israelƒuɔ kasala kammɔ bekyuli ƒui báta bésie Yerobeam kudɔ na básu-nwu banini,

⁴“Ƒula ɔti Salomo útada-bu kaduɛ na úti etila ani na ebo unu ɔ́sia-bu lɛlɔ. Na bɔɔsu-ɔ ka si adubɔtimi etila ammɔ abla-nya ƒaa ƒaa ete-bu na keyi kayɔku-bu ni, bɔdubɔkya-a kalɔ.”

⁵Amu na Rehabeam údie-ma kenye ɔnini, “Binwini bibo emeyi atɛ kama na ndubɔsu-mii kalɛ na use.” Ɔmmɔ ɔsu bekyuli bammɔ básɔ bénwini bátɔlɔ.

⁶Ɔmmɔ kama Ɔga Rehabeam ɔ́ni úde benengu bani na nka bátaalɛ ɔti Ɔga Salomo na ɔ́su-ma etemila ammɔ. Na úye benengu bammɔ ɔnini, “Bi kenye na bɛɛyɔ́ ka ntédie lɛsu bekyuli bammɔ?”

⁷Amu na benengu bammɔ bédie kenye banini, “Si aayɔ́ ka abla-ma kabla kaduɛ bɔdi ni, na enu bana etemila ani baasu-ɔ mmɔ. Na abla ete-ma. Na ama lɛnɔ badubɔbla-a kabla kaduɛ.”

⁸Nsu Rehabeam úni benengu bammɔ bɔlɛ bɔmmɔ. Na únwini úsie bekyuli bani ndi nwuna ligyekpa na baabla-nwu kabla kudɔ mmomu útéye-ma bana kasusu.

⁹Mmɔ na úye bakloƒu bammɔ ɔnini, “Bi na bɛɛyɔ́ ka lɛbla? Na bi na ɔlɛka lɛsu bekyuli bani nábasu-mi banini, ‘Ƒ'ɔti útile-bu etila ani na étulo-bu, awɔ bla-nya na abla-bu ƒaa ƒaa’ mmɔ?”

¹⁰Amu na nwuna ligyekpa bakloƒu bammɔ bédie kenye banini, “Bekyuli bani násu-ɔ banini, ‘Ƒ'ɔti útile-bu etila ani na étulo-bu, awɔ bla-nya na abla-bu ƒaa ƒaa’ mmɔ ni, su-ma anini, ‘Mina kɔnu lɛnimi libliidi ƒui líbomo litulo mina ɔti kavobi.

¹¹Na mina ɔti úti etila ani mbo unu ɔ́sia-mii lɛlɔ. Na mɔɔsu-mii ka ani na ebo unu etulo mina ɔti adi na ami ndubuti lɛsia-mii lɛlɔ. Na kugyiimi na anwu úwi-mii. Nsu ami batamlukpa lɛka na ndubuti lɛta-mii.’ ”

¹²Emeyi atɛ kama ni, Yerobeam ku bekyuli bammɔ ƒui bénwini bésie Ɔga Rehabeam kudɔ aani kalɛ na ɔ́su-ma úse ɔnini, “Binwini bibo emeyi atɛ kama.”

¹³Na Ɔga Rehabeam útemiku-ma ku kɔnyi na úni kasusu kani na benengu bammɔ bákya-nwu,

¹⁴na úti bakloƒu bammɔ mmomu kasusu kani na bákya-nwu na ɔ́su-ma ɔnini, “Mina ɔti úti etila ani na ebo unu ɔ́sia-mii lɛlɔ. Nsu mɔɔsu-mii ka mina adi adubɔyu unu etulo nwuna adi. Na kugyiimi na úti úbo-mii, na nsu ami ndubuti batamlukpa lɛka bɔta-mii.”

¹⁵Ka ɔdi Unwoti lɛyɔla ka ɔya na lɛla lɛni na Kenye Udiene Ahia ɔni nási Silo ɔ́su Nebat ubidi ubo-nwu kemmo ɔsu ni, ɔga ɔmmɔ útete-ma anumi na unu lɛla lɛni na baasu-nwu munu munu.

¹⁶Uwi ɔni na bekyuli bammɔ bánu báti ka ɔga ɔmmɔ ulabla bana lɛyɔla ulete-ma ni, mmɔ na báva momoomo básu banini, “Bi kadikɔ na bubo ɔ́siku Dawid kudɔ? Kakɛ kamani na bunye na Yisai ubidi kudɔ? Israel banana, bɛya na bunwini buteesie bula nvo kemmo! Dawid utiku nwuna kaduli na utaanu-ka lɛlɔ.” Ɔmmɔ ɔsu Israelƒuɔ bénwini bésie bana ɔma.

¹⁷Nsu Israelƒuɔ bani nli Yuda kalɛkɛ kammɔ lɛlɔ ni, Rehabeam ɔmu ɔɔdi-ma lɛlɔ.

¹⁸Ɔmmɔ kama Ɔga Rehabeam ɔ́tala Adoram ɔni mɔɔnu bani mɔɔbla kabla kpakplaa lɛlɔ ka usie Israel. Ka úsie ni, Israelƒuɔ bammɔ bébo-nwu atabi bádu. Na ka Rehabeam únu ɔmɛni ni, ɔ́babla na úti nwuna bapɔnkɔ kɛɛkɛ na úkeli úsie Yerusalem.

¹⁹Na ɔ́si uwi ɔmmɔ ƒui ni, Israelƒuɔ katɔ kakɛ bekyuli bata bénye Ɔga Dawid kaduli bekyuli lɛlɔ úbedu ɔmwi kadi.

²⁰Na uwi ɔni na Israelƒuɔ bénu ka Yerobeam únwini ɔ́si Egyipte úbo ni, bekyuli bammɔ bálɔ-nwu na anwu ku-ma bátɛmi, na bábla-nwu Israelƒuɔ ɔga. Na Yuda kɔdua bekyuli lɛti ndi bani nsiaku Dawid bekyuli kama.

²¹Uwi ɔni na Rehabeam útéduo Yerusalem ni, údie bekpone bani ngyi bukpo kaduɛ eti atɛ ku avlaatɛ (180) ɔ́siku Yuda ku Benyamin adua kemmo ka nka betékpoku Israelƒuɔ adua ani nkya katɔ kakɛ.

²²Nsu Katɔti ɔ́su Kenye Udiene Semaia

²³ka utásu Rehabeam ku Yuda ku Benyamin adua bekyuli ƒui ɔnini,

²⁴“Bitesie bitetékpoku bina banwani Israelƒuɔ. Mmomu ɔdi biala unwini uteesie nwuna kaduli, ɔsika ami náya na úbo úte lɛni.” Anwuɔsu bekyuli bammɔ ƒui bénu Unwoti ɔda bubo bɔmmɔ na bénwini bésie kaduli.

²⁵Na uwi ɔmmɔ ni, Ɔga Yerobeam ɔ́tu ɔ́mana Sekem na Eƒraim abi lɛlɔ kalɔ kemmo na uli mmɔ. Ɔmmɔ kama ɔ́ta úsie útáda Panuel ɔma.

²⁶Ɔmmɔ kama ni, Yerobeam úti kasusu na ɔ́su lɛlɔ ɔnini, “Ɔƒɛni kalɛ lɛgadi lɛmɛni lɛdubɔkana na lɛsɔ linwini lisie Dawid kaduli si ńtanu kaduɛ.

²⁷Na si bekyuli bamɛni bésie Unwoti kakpakɔ na Yerusalem banii batábla akpala ni, badubunwini kasusu na benwini basiaku Ɔga Rehabeam na bakya-nwu kalɔ na badu ami.”

²⁸Na ka ɔ́wia bekyuli kasusu únu ni, ɔga ɔmmɔ úti sika ugyiedi ɔ́bla bakɔ bebi inyɔ. Na ɔ́su bekyuli bammɔ ɔnini, “Yerusalem busie teesie taatábla akpala ɔdubuduoku-mii lɛlɔ bɔvili. Ɔmmɔ ɔsu ni, O Israel, bɛɛnu bina benwoti bani nákpanku-mii bálɛku Egyipte kalɔ lɛlɔ.”

²⁹Na úti baƒiɔ bammɔ unwi útálɛ Betel na úti ɔkladi lɛnɔ útálɛ Dan ɔma kemmo.

³⁰Na ala amɛni ebenwini-ma likpidi. Na bekyuli muedi baata teesie Dan ku Betel taatákpa baƒiɔ bammɔ na mmɔ.

³¹Yerobeam ɔ́sɔ ɔ́tu aƒiodu bamba na abi eli na anwu ɔlati údie bakpane ɔ́siku kesii biala na ɔɔyɔ́ ina ka baaadi Lewiƒuɔ.

³²Na Yerobeam údie kɔbuli maanedi limeyi leevu-ɛlɔ úse úte baƒiɔ bammɔ limeyi bɔdi. Aani limeyi lɛni udu na baadi na Yuda. Na ɔ́bla akpala na lɛkpabi lɛmmɔ lɛlɔ. Lɛni na ɔ́bla na Betel mmɔ na ɔ́kyula akpala úte baƒiɔ bani na ɔ́vɔ mmɔ.

³³Na kɔbuli maanedi limeyi leevu-lɛlɔndi lɛdi limeyi lɛni na anwu Yerobeam údie úse na uusié Betel taatákyula akpala na lɛkpabi lɛmmɔ lɛlɔ. Na údie-ni aani limeyi bɔdi úte Israelƒuɔ.