Read Lelemi Baga 1 13 Bible Online

Baga 1 13 - Lelemi bible

Baga 1 13

¹Na Unwoti ɔda bubo kenye ni, kenye udiene ɔdi ɔ́si Yuda úsie Betel uwi ɔni na Yerobeam unye lɛkpabi anumi ka ɔbla akpala.

²Unwoti ɔ́kya kenye udiene ɔmmɔ litemi kenye na ɔ́va ɔ́kpali ɔnini, “O lɛkpabi, lɛkpabi! Unwoti ɔnii, ‘Badubo ubi ɔnanabi bɔwɔ na Dawid kaduli na balɔ-nwu banii Yosia. Na ƒula lɛlɔ na ɔdubo bɔdu abi eli baƒiɔkpane ƒui bani nnye ka babla akpala na ƒula lɛlɔ ɔƒaani, na ƒula lɛlɔ na badubɔkyula bana ekubi.’ ”

³Limeyi lɛmmɔ kani ni, Katɔti kenye udiene ɔmmɔ ɔ́bla likposela lɛdi na ɔ́su ɔnini, “Ɔmɛni ndi Unwoti likposela ka lɛkpabi lɛmɛni lɛdubo bɔbwɛ na lile lɛlɔ kemmo inyɔ. Na ntɔ bɔni na buwi-nwu kemmo ni, buwilimi buwi kalɔ.”

⁴Uwi ɔni na Yerobeam únu lɛla lɛni na Katɔti kenye udiene ɔmmɔ ɔ́va ɔ́su úwi Betel lɛkpabi lɛmmɔ lɛlɔ ni, únene kɔnu ɔ́kywɛ-nwu ɔ́siku lɛkpabi lɛmmɔ kudɔ mmɔ na ɔ́su ɔnini, “Biƒie ukyuli ɔmmɔ na binyimi-nwu.” Nsu kɔnu kɔni na únene ɔ́tina kenye udiene ɔmmɔ kúkpi kɔnakunwi, na kɔ́goglo na ɔ́sɔ útakana-ku bunene lɛnɔ.

⁵Na lɛkpabi lɛmmɔ lɛnɔ lile lɛlɔ kemmo inyɔ. Na ntɔ bɔni buwi-nwu kemmo búwilimi búwi kalɔ.

⁶Amu na Ɔga Yerobeam ɔ́su kenye udiene ɔmmɔ ɔnini, “Vele ƒula Unwoti Katɔti na akpali-nwu na ɔsɔku mina kɔnu ɔklibi aani kalɛ kuse kudeedi.” Ɔmmɔ ɔsu, kenye udiene ɔmmɔ úvele Unwoti na ɔ́ya na ɔga ɔmmɔ kɔnu kɔ́bla aani kalɛ kuse kudeedi.

⁷Amu na ɔga ɔmmɔ ɔ́su Katɔti kenye udiene ɔmmɔ ɔnini, “Siaku-mi na busie na ntáwia lɛla lɛdi lite-ɔ na adi, na lɛwia etela adi lɛnɔ lite-ɔ.”

⁸Nsu kenye udiene ɔmmɔ údie kenye ɔnini, “Si ina ƒula akɛla kemmo na anii eele kemmo akpa anyɔ na eti kakɛ ete-mi muedi ni, lɛɛɛdubo-ɔ bɔsiaku, iye lɛni ntu iye lɛdi na mɛni.

⁹Ɔsika Unwoti úbo-mi ɔda ɔnini, ‘Tadi adila adi, na tani ntu bɔdi, na tenwini tasia ulu ɔni lɛlɔ na akɛ ébo mɛni tatɔlɔ.’ ”

¹⁰Anwuɔsu kenye udiene ɔmmɔ ɔ́sia ulu bamba ɔ́tɔlɔ. Na ɔ́sɔ útasia ulu ɔni na ɔ́sia úbo Betel.

¹¹Ɔƒɛni kenye udiene ɔdi na ɔ́ɔbi lɛlɔ geen ɔdi úli Betel. Na nwuna bebi bébo-nwu kudɔ na básu-nwu ala ani ƒui na kenye udiene bamba ɔni nébo mmɔ úbabla limeyi lɛmmɔ. Na básu bana ɔti lɛla lɛni lɛnɔ na kenye udiene ɔmmɔ ɔ́su ɔga ɔmmɔ.

¹²Amu na bana ɔti úye-ma ɔnini, “Wɛ ulu na kenye udiene ɔmmɔ ɔkɛ ɔ́tɔlɔ?” Amu na nwuna bebi bammɔ bátina-nwu ulu ɔni na kenye udiene ɔni nási Yuda mmɔ ɔkɛ.

¹³Ɔmmɔ ɔsu ɔ́su nwuna bebi ɔnini, “Bɛƒɛnimi mina ɔpɔnkɔ bite-mi.” Amu ka báƒɛmini-nwu béte-nwu báwɔlɔ ni, ɔ́kɔ úlie-nwu lɛlɔ.

¹⁴Na ɔ́sia kenye udiene ɔni nátɔlɔ mmɔ kama. Na útánu-nwu ka úlie kugyii kubendi kɔdi kalɔ. Amu na úye-nwu ɔnini, “Awɔ ndi kenye udiene ɔni nási Yuda?” Amu na údie kenye ɔnini, “Ami mmɔ.”

¹⁵Amu na kenye udiene ɔmɛni ɔ́su-nwu ɔnini, “Siaku-mi na ntétɔ-ɔ lɛla lɛdi na adi.”

¹⁶Amu na kenye udiene ɔmmɔ údie kenye ɔnini, “Naaakana bɔsɔ bunwini na buteesie, na naaakana lɛla lɛdi lɛnɔ bɔdi iye lɛni na mɛni.

¹⁷Unwoti ɔ́su-mi ɔkɛnku nwuna litemi lɛlɔ ɔnini, ‘Útalɛ ka adi iye ani lɛla lɛdi na mmɔ iye asɔ enwini asia ulu ɔni lɛlɔ na ásia ésie mmɔ.’ ”

¹⁸Amu na kenye udiene ɔni náabi lɛlɔ mmɔ údie kenye ɔnini, “Ami lɛnɔ kenye udiene na ndi aani ƒula kalɛ. Na Katɔti ɔtu ɔdi ɔ́su-mi ka Unwoti ɔnii, ‘Nwiniku-nwu boku ƒula kaduli na ubadi na ɔni lɛla lɛdi.’ ” Nsu ɔkɔ na unengu ɔmmɔ ɔɔnyi.

¹⁹Anwuɔsu Katɔti kenye udiene ɔmmɔ únwini na ɔ́siaku-nwu na útádi na ɔ́ni na nwuna kaduli.

²⁰Amu uwi ɔni bakya baadi ni, Unwoti litemi líbo kenye udiene ɔni náabi lɛlɔ mmɔ kudɔ,

²¹na ɔ́va ɔ́su kenye udiene ɔni nási Yuda mmɔ ka lɛni na Unwoti ɔɔsu ɔnini, “Átabu Unwoti litemi na átadi ɔda ɔni na Unwoti ƒula Katɔti úbo-ɔ lɛlɔ.

²²Ásɔ énwini ébo kama, na ábadi adila na áni ntu na kesii kani na ɔ́su-ɔ ka tadi iye tani lɛla lɛdi. Ɔkɛnku ɔmɛni ɔsu ni, baaadubo ƒula ɔlɔna bɔva na ƒula bati kaƒiɔtɔ kemmo.”

²³Amu ka bádi báwɔlɔ ni, kenye udiene ɔni náabi lɛlɔ mmɔ ɔ́bala nwuna ebuo ala utine úte-nwu.

²⁴Na ka úsela ni, útásiaku gyata na ulu lɛlɔ. Na gyata ɔmmɔ ɔ́du-nwu. Na ukpine ɔmmɔ ɔtɛ ulu ntɛ mmɔ. Na ebuo ala utine ɔmmɔ ku gyata ɔmmɔ ƒui benye ukpine ɔmmɔ kudɔ.

²⁵Amu ka bekyuli badi bási baaví ni, bánu ukpine ɔmmɔ ka ɔtɛ kuludɔ na gyata ɔmmɔ unye-nwu kudɔ. Na bekyuli bammɔ bésie Betel bátásu lɛla lɛni bánu.

²⁶Amu ka kenye udiene ɔni nénwiniku-nwu úboku nwuna kaduli mmɔ únu litemi lɛmmɔ ni, mmɔ na ɔ́su ɔnini, “Ɔɔɔdi ukyuli biala na ɔdi, mmomu kenye udiene ɔni nétenu Katɔti litemi mmɔ na ɔdi. Unwoti néti-nwu úte gyata ɔmmɔ na ɔ́du aani kalɛ na Unwoti litemi lɛ́su-nwu líse kalɛ.”

²⁷Amu na kenye udiene ɔni náabi lɛlɔ mmɔ ɔ́su nwuna bebi ɔnini, “Bɛbala mina ebuo ala utine bite-mi.” Na banamu bammɔ lɛnɔ bábla lɛni.

²⁸Ɔmmɔ kama ni, ɔ́vi ɔ́lɛ útánu ka kenye udiene ɔmmɔ ukpine ɔtɛ kuludɔ. Na gyata ɔmmɔ ku nwuna ebuo ala utine ƒui bénye-nwu kudɔ. Na gyata ɔmmɔ útakun lɛna lɛmmɔ lɛdi iye ɔbla ebuo ala utine ɔmmɔ lɛla lɛdi.

²⁹Anwuɔsu kenye udiene ɔmmɔ ɔ́gyu ukpine ɔmmɔ ɔ́mana nwuna ebuo ala utine kama na úti-nwu úsienku nwuna ɔma ka utéwulo-nwu na ɔva-nwu.

³⁰Na úti ukpine ɔmmɔ útáva anwu ɔlati kaƒiɔtɔ kemmo. Na béwulo-nwu na ɔ́su ɔnini, “O mina ɔnwani!”

³¹Na ka ɔ́va-nwu ɔ́wɔlɔ ni, ɔ́su nwuna bebi ɔnini, “Si líkpi ni, na bɛva-mi kesii kani na lɛ́va kenye udiene ɔmɛni. Na ami ku-nwu ekubi atɛ liku linwi.

³²Ɔsika etemila ani ƒui Unwoti úbo-nwu ɔda na ɔ́su na adanku lɛkpabi lɛni nkya Betel ku aƒiodu ani ƒui na akya lɛma lɛni nkya Samaria adubo-nwu kemmo lɛni kani.”

³³Nsu na ɔmɛni ƒui kama ni, Ɔga Yerobeam útavumana nwuna likyulikpi ɔbladu ɔmmɔ. Na busie na úsie anumi na uudie bekyuli keeke taasiku kɔduli kemmo na beenwíni bakpane teete nwuna akpabi ani na ɔ́tu ɔ́lɛ abi eli. Na ukyuli biala mɔɔyɔ́ ka ɔbla ɔkpane ni, na uti-nwu ɔbla ɔkpane.

³⁴Na likpidi lɛmɛni nébo Yerobeam kaduli lɛlɔ na nwuna lɛgadi lɛ́bɔ-nwu. Ɔmɛni ɔsu Katɔti ɔ́yila nwuna udu ɔ́lɛku kayawi kamɛni kemmo.