Read Lelemi Baga 1 14 Bible Online

Baga 1 14 - Lelemi bible

Baga 1 14

¹Na uwi ɔmmɔ kemmo ni, Ɔga Yerobeam ubidi ɔni baalɔ Abia úbo ɔkya uuƒi.

²Amu na Yerobeam ɔ́su ulekudi ɔnini, “Vumana lɛlɔ kalɛ na ukyuli ɔdi ulanu-ɔ uláti. Na esie Kenye Udiene Ahia kudɔ na Silo. Mmɔ na uli. Anwu násu-mi ka ami ndubɔbla Israelƒuɔ ɔga.

³Na si ésela ni, ti bodobodo leevu ku agyidi ƒɛƒɛɛ ku uwɔ ɔsii bonwu unwi ada. Na eye-nwu lɛla lɛni ndubɔlɛku bula ubidi ɔni muuƒi mmɔ. Ɔdubɔsu-ɔ lɛla biala.”

⁴Ɔmmɔ ɔsu ulekudi ɔmmɔ lɛnɔ ɔ́tɔlɔ úsie Ahia kudɔ na Silo. Na Ahia ɔ́ɔbi ɔsu ɔsɔ ulánu lɛnɔ.

⁵Na Unwoti ɔ́su Ahia úse ka Yerobeam ulekudi ɔ́si ɔdubo-nwu kudɔ na uye-nwu ubidi ɔni muuƒi mmɔ kenyekɔ unu. Na Unwoti ɔ́su-nwu ka ɔdubɔtina-nwu lɛla lɛni na ɔlɛka ɔsu ɔnii, “Si Yerobeam ulekudi úbo ni, ɔdubudie lɛlɔ ɔtina aani ukyuli bamba. Nsu su-nwu lɛla lɛni na masu-ɔ.”

⁶Anwuɔsu uwi ɔni na Ahia únu uleku ɔmmɔ bɔnya na nwuna kayakun kenye ni, ɔ́su ɔnini, “Yerobeam ulekudi, duo ɔtɔ. Bi ɔsu na ábla lɛlɔ aani ukyuli bamba na adi? Unwoti ɔ́kya-mi litemi likpidi kenye ka lɛsu-ɔ.

⁷Nwini tásu Yerobeam ka lɛni na Unwoti ɔni ndi Israelƒuɔ Katɔti ɔɔsu, ‘Lídie-ɔ lɛ́lɛku bekyuli bammɔ akɔ na líti-ɔ lɛ́bla mina bekyuli Israelƒuɔ ɔtɔnkune.

⁸Na líle Ɔga Dawid lɛga kemmo na líti líte-ɔ. Nsu átabla aani mina kabla ɔblane Dawid ɔni nádi mina ɔda bubo lɛlɔ. Na úti nwuna kayi ƒui ɔ́siaku-mi kama. Na ɔ́bla ala ani kani nse siin na mina anumi.

⁹Na awɔ ni, ábla likpidi étulo baga bani ƒui nélie asa na ébo. Na éti lɛbuala ávɔ baƒiɔ éte lɛlɔ. Ɔmɛni ɔsu ákya-mi kɔnyi geen, ɔsika énwini kama ákya-mi.

¹⁰“ ‘Ɔkɛnku ɔmɛni ɔsu ni, ndubuti ɔgbankpi liboku Yerobeam kaduli. Na bananabi kawɔ kplo biala na bakya Israel kalɔ lɛlɔ, Israelni na ɔdi o-o kadi bamba bekyuli bani mɔɔbla-ma kabla o-o ni, ndubo-ma bɔdu budie Yerobeam lɛlɔ na kalɔ kammɔ lɛlɔ ƒui. Na ɔmɛni ɔdubuse kalɔ ɔsiku Israel. Na lɛkyula Yerobeam kaduli kemodi kammɔ ƒui aani kebu alakpi, utédu ka lɛla biala lɛ́kywi lɛ́sa.

¹¹Na bakpewɛ badubɔkun bekyuli bani ndi Yerobeam bekyuli lɛna na ɔma unengudi kemmo mmɔ. Na baasɛ lɛnɔ badubɔduli bani nékpi lɛku kemmo lɛna. Lɛni na Unwoti ɔɔsu!’

¹²“Na awɔ anwu ni, nwini teesie ɔma. Na si ƒula ɔgba ɔ́nya ɔma unengudi ɔmmɔ ni, ɔnamu ɔmmɔ ɔdubo bukpi.

¹³Na Israelƒuɔ ƒui badubo-nwu buwulo na bava-nwu, ɔsika anwu kani ndi Yerobeam ubidi unwi pɛ ɔni na Unwoti ɔni ndi Israel Katɔti ɔ́nu ka ɔdanku lɛla lɛbuni lɛdi.

¹⁴“Na Unwoti ɔlati ɔdubudie ukyuli ɔni madi lɛga na Israel. Na ukyuli ɔmmɔ ɔdubukulo Yerobeam kaduli bekyuli udie ɔmwi ɔmɛni kani. Nu! Kɔnakunwi kɔmɛni muedi, na ɔɔɔdubo uwi bubile.

¹⁵Na Unwoti ɔdubɔni Israel kɔtu na ɔkunku-nwu aani kalɛ na ntu buubó ketu kemmo alakpi teesie teebo. Na ɔdubɔgyu Israel udie kalɔ kabuni kani na úti úte bana bati kuuku, na úgyingya-ma útákya ketu ɔvi. Ɔsika bákya Unwoti kɔnyi ɔkɛnku Asera lɛƒiɔgyii lɛni na bálɛ mmɔ ɔsu.

¹⁶Na ɔdubudie Israel atu na likpidi lɛni na Yerobeam ɔ́bla na ɔ́ya na Israelƒuɔ lɛnɔ bábla ɔsu.”

¹⁷Ka kenye udiene ɔmmɔ ɔ́tɛmi ɔ́wɔlɔ ni, mmɔ na Yerobeam ulekudi ɔ́ta na ɔ́tɔlɔ úsie Tirsa. Uwi ɔni kani na nwuna ɔgba útuku kaduli kayakun ni, mmɔ kani na ɔnamu ɔmmɔ úkpi.

¹⁸Na báva-nwu. Na Israelƒuɔ béwulo-nwu aani kalɛ kani na Unwoti ɔ́su ɔ́siaku nwuna Kenye Udiene Ahia lɛlɔ.

¹⁹Na ala bamba ani na álɛku Yerobeam na nwuna lɛga bɔdi uwi ku kekpo kani na úkpo ku kalɛ na ɔ́di nwuna lɛga ɔ́vinku ni, bénweni-nya bákya Israelƒuɔ baga lɛlɔ kɔtɛ ɔku kemmo.

²⁰Na Yerobeam ɔ́di lɛga akwa aavlanyɔ asa na úkpi. Na ubidi Nadab úti-nwu keliekɔ.

²¹Na Salomo ubidi Rehabeam ɔ́ɔƒɔ akwa aavlene-unwi asa na bése-nwu lɛga na Yuda. Na ɔ́di lɛga lɛmmɔ akwa leevu-maatɛ na Yerusalem kemmo, ɔma ɔni na Unwoti ɔ́ƒuna ɔ́lɛku Israel adua ammɔ ƒui kemmo, kesii kani na ɔ́sia nwuna lɛnyi. Na Rehabeam uni baalɔ banii Naama. Na ɔ́si Amon kalɛkɛ lɛlɔ.

²²Yudaƒuɔ bábla likpidi na Unwoti anumi. Na bana ekpidi ágyila Unwoti kɔnyi kɔni muukpó kɔgyulo útulo bana bati kuuku adi ani bábla muedi.

²³Bátu akpabi ekpo ekpo na bálɛ atabi ani banii ese kedee ku lɛƒiɔgyii béte Asera baƒiɔ na abi ƒui eli ku egyii enengudi ani nábla ɔyuli kaduɛ kalɔ.

²⁴Na bebo banana na bakya aƒiodu ammɔ na benye bete lɛyalɛ ala bɔbla kani na kalɔ kammɔ ƒui lɛlɔ. Na Israelƒuɔ ƒui béti lɛlɔ béte ala ani muusé lɛlɔ bɔbla aani kalɛ na bekyuli bani na Unwoti ɔ́bɔku ɔ́lɛku kalɔ kammɔ lɛlɔ na Israelƒuɔ anumi baabla.

²⁵Na lɛkwa lɛlɔndi kemmo na Rehabeam lɛga bɔdi kemmo ni. Egyipteƒuɔ ɔga ɔni baalɔ Sisa útékpoku Yerusalemƒuɔ.

²⁶Na úti sika kɔlɛmii kɔni nkya kakpakɔ ku ɔga kaduli mmɔ na ɔ́sɔ úti sika lɛgyumanala lɛni na Ɔga Salomo ɔ́bla úse mmɔ ɔ́tɔlɔku.

²⁷Na Ɔga Rehabeam úti abuala egyiedi ɔ́bla agyumanala bamba na úti-nya ɔ́kya bagyumanane bani nnye kaduli kayakun enu kemmo.

²⁸Na uwi biala na ɔga wesie kakpakɔ mmɔ ni, bekyuli bammɔ baagyú abuala egyiedi agyumanala ammɔ taada. Na si ɔ́wɔlɔ ni, baasɔku-nya teetése ɔtɔ ɔni kemmo agyumanala ammɔ eesé.

²⁹Na ala bamba ani na Ɔga Rehabeam ɔ́bla ni, bénweni-nya bákya Yudaƒuɔ baga lɛlɔ kɔtɛ ɔku kemmo.

³⁰Na uwi ɔmɛni ƒui kemmo ni, Rehabeam ku Yerobeam béteekpoku lɛlɔ pla pla.

³¹Na Rehabeam úkpi na báva-nwu na baga kavakɔ na Dawid ɔma unengudi kemmo mmɔ. Na uni baalɔ Naama. Na Amonni na ɔdi. Na Abia úlie ɔti keliekɔ aani ɔga kalɛ.