Read Lelemi Baga 1 15 Bible Online

Baga 1 15 - Lelemi bible

Baga 1 15

¹Na lɛkwa leevu-maanedi lɛlɔ ɔni na Nebat ubidi Yerobeam ɔɔdi lɛga ni, Abia úbenwini ɔga na Yuda.

²Na ɔ́di lɛga lɛmmɔ akwa atɛ na Yerusalem. Na uni baalɔ banii Maaka, ɔni ɔdi Abisalom ubidi ulekubi.

³Na ekpidi ani ƒui na ɔti ɔ́bla asa na báwɔ-nwu ni, Abia lɛnɔ úbabla-nya. Na útakana na uti nwuna kayi ƒui ute Unwoti Katɔti aani kalɛ na nwuna Nana Dawid ɔ́bla.

⁴Nsu ina ka úbo úte lɛni ni, ɔkɛnku linyese lɛni na úte Dawid ɔsu ni, Unwoti Katɔti úte-nwu lɛnunsia aani asogya ɔkɛnku ɔni na nwuna kaba kemmo ubi úbo úbadi lɛga na Yerusalem ku kalɛ na ɔ́ya na Yerusalem únye kpakplaa ɔsu.

⁵Ɔsika na Dawid ngba bulie kemmo ƒui ni, ɔ́bla ala ani na ese siin na Unwoti anumi, na útedie atu na Unwoti ɔda bubo biala lɛlɔ. Ntu anwu ku Uria ɔni ɔdi Hetini likpidi lɛni na ɔ́bla mmɔ kani.

⁶Na Abia ngba bulie kemmo ƒui ni, kekpo sɔɔn na Rehabeam ku Yerobeam béteekpo.

⁷Na ala bamba ani nálɛku Abia ku ala ani na ɔ́bla na nwuna lɛga bɔdi uwi ni, bénweni-nya bákya Yudaƒuɔ baga lɛlɔ kɔtɛ ɔku kemmo. Na kekpo kákya Abia ku Yerobeam ntɛ.

⁸Na Abia úkpi na báva-nwu na Dawid ɔma unengudi. Na ubidi Asa úti-nwu keliekɔ aani ɔga kalɛ.

⁹Na lɛkwa aavlanyɔdi kemmo na Yerobeam lɛga bɔdi uwi na Israel ni, Asa úbenwini Yudaƒuɔ ɔga.

¹⁰Na ɔ́di lɛga lɛmɛni na Yerusalem akwa aavlene-unwi. Na nwuna nana uleku ndi Maaka ɔni ndi Abisalom ubidi ulekubi.

¹¹Asa ɔ́bla lɛla lɛni nse siin na Unwoti anumi aani kalɛ na ɔti Dawid ɔ́bla.

¹²Na ɔ́bɔku banana bayalɛ bani na bakya aƒiodu mmɔ ƒui údie kalɔ kammɔ ƒui lɛlɔ. Na baƒiɔ bani ƒui na nwuna bati bátu bálɛ ni, úgyingya-ma ƒui.

¹³Na nwuna nana uleku ɔni ɔdi uleku ɔga ni, ɔ́tu-nwu lɛga, ɔsika ɔ́bla Asera baƒiɔ badi ɔ́lɛ. Na Ɔga Asa ɔ́da kugyii kɔmmɔ na ɔ́kyula-ku na Kidron Kɔwɛ kemmo.

¹⁴Ina ka útegyingya baƒiɔ bammɔ na ekpo adi bene ni, Asa kayi kásia Unwoti lɛlɔ nwuna ngba emeyi ƒui.

¹⁵Na ɔ́sɔku sika ugyiedi ku ɔƒualadi ɔni na anwu ku nwuna bati bédie bése sɛsɛɛ béte Unwoti mmɔ úsienku kakpakɔ.

¹⁶Kekpo sɔɔn nákya Ɔga Asa ku Israelƒuɔ Ɔga Basa ntɛ uwi ɔni na bélie bátaadi lɛga.

¹⁷Na Israelƒuɔ Ɔga Basa útátu awodu ɔ́mana Rama kalɛ na busie teetenku lɛlɔ bɔdi bɔsɔ bulakya ama ku Yudaƒuɔ Ɔga Asa ku nwuna bekyuli ntɛ.

¹⁸Ka Asa únu ɔmɛni ni, úti sika ɔƒualadi ku ugyiedi ɔnaƒui ɔni nébu ɔ́siku nwuna lɛgakadikɔ ku Unwoti kakpakɔ na úti úmene Aram Ɔga Benhadad ɔni ɔti ndi Tabrimon ɔni ɔti ndi Hesion na Damasko ɔ́siaku nwuna bakutine benengu lɛlɔ ɔnii batásu-nwu kenye kamɛni banini,

¹⁹“Mɔɔyɔ́ ka abu ku-ɔ bɔbla unwi aani kalɛ na ƒ'ɔti ku mina ɔti bábla unwi dii. Nu, líti sika ugyiedi ku ɔƒualadi ɔmɛni muumene-ɔ, na ekulo unwi bɔbla bɔni nkya awɔ ku Israelƒuɔ Ɔga Basa ntɛ, na ɔda nwuna bekpone udie mina ɔmii lɛlɔ.”

²⁰Benhadad ɔ́bla lɛla lɛni na Asa ɔ́su-nwu na úti Siriaƒuɔ bekpone úmene Israel kalɔ lɛlɔ na bétékpo Iyon ku Dan ku Abel-Bet-Maaka ku Kinerot ƒui ku Naƒtali kɔlɔ ƒui.

²¹Uwi ɔni na Ɔga Basa únu lɛla lɛni nálɛ ni, ɔ́da Rama bɔtu ɔ́ya na ɔ́tɔlɔ úsie Tirsa.

²²Amu na Asa úbo ɔda úte Yudaƒuɔ ƒui ɔni na bátada ɔdi bétedie ɔnii beti atabi ku ligyii lɛni na Basa ɔ́ya na béti bébewi Rama mmɔ ka batu bamana-nwu na ɔbla kagyumanakɔ kpakplaa mmɔ batɔlɔku mmɔ. Na ɔ́ya na béti atula ammɔ kani bátu bámana Geba na Benyamin kalɛkɛ, ku Mispa lɛnɔ.

²³Na ala bamba ani na Ɔga Asa ɔ́bla ku nwuna kayi kani na ɔ́kya ku lɛma lɛni na ɔ́tu awodu ɔ́mana ni, bénweni-nya bákya Yuda baga lɛlɔ kɔtɛ ɔku kemmo. Nsu na Ɔga Asa lɛlɔ bɔbi uwi ni, ɔ́kɛ lɛgba ɔlɛ ɔdi.

²⁴Na Ɔga Asa úkpi na báva-nwu na Dawid ɔma unengudi. Na ubidi Yehosaƒat úbelie-nwu keliekɔ.

²⁵Na lɛkwa linyɔdi kemmo ɔni na Ɔga Asa ɔ́di lɛga na Yuda ni, Ɔga Yerobeam ubidi Nadab únwini ɔga na Israel. Na ɔ́di lɛga akwa anyɔ.

²⁶Na aani kalɛ na ɔti ɔ́bla kalɛ ni, anwu lɛnɔ ɔ́bla likpidi. Na ɔ́tɔnku Israelƒuɔ lɛnɔ na bábla likpidi na Unwoti anumi.

²⁷Na Ahia ubidi Basa ɔni na ɔ́si Isakar kaba kemmo úti kasusu kekpidi na Nadab lɛlɔ. Ɔmmɔ ɔsu ɔ́du-nwu uwi ɔni na Nadab ku nwuna bekpone bésie bákya Gibeton na Ƒilistiƒuɔ kalɔ lɛlɔ ka bétekpoku-ma.

²⁸Na Basa ɔ́du Nadab na Asa lɛga bɔdi lɛkwa lɛtɛdi kemmo. Anwuɔsu Basa úti Nadab keliekɔ aani Israelƒuɔ ɔga kalɛ.

²⁹Na ka bése-nwu lɛga kani na úse kalɔ ɔɔdú Yerobeam kaduli bekyuli. Na ɔmɛni úbo úte lɛni ɔkɛnku kenye kani na Unwoti ɔ́sia nwuna Kenye Udiene Ahia ɔni na ɔ́si Silo ɔ́su úse. Na Yerobeam kaduli bekyuli békpi ɔni na unwi muedi útebu.

³⁰Na ɔmɛni úbo úte lɛni, ɔsika Yerobeam ɔ́kya Unwoti ɔni ndi Israelƒuɔ Katɔti kɔnyi ɔ́kɛnku likpidi lɛni na ɔ́bla ku lɛla lɛni na ɔ́ya na Israelƒuɔ lɛnɔ bábla ɔsu.

³¹Na ala bamba ani na Nadab ɔ́bla ni, bénweni-nya bákya Israelƒuɔ baga lɛlɔ kɔtɛ ɔku kemmo.

³²Na Ɔga Asa ɔni na ɔ́si Yuda ku Ɔga Basa ɔni ɔ́si Israel lɛga bɔdi uwi ni, kekpo lɛti lɛti nákya-ma ntɛ.

³³Na lɛkwa lɛtɛdi na Ɔga Asa ɔni na ɔ́si Yuda lɛga bɔdi kemmo ni, Ahia ubidi Basa únwini Israelƒuɔ ɔga. Na ɔ́di lɛga lɛmmɔ na Tirsa. Na ɔ́di-ni akwa aavlanyɔ-ine.

³⁴Anwu lɛnɔ ɔ́bla likpidi na Unwoti anumi aani kalɛ na Yerobeam ɔ́bla. Na ɔ́tɔnku Israelƒuɔ lɛnɔ na bábla likpidi.