Read Lelemi Baga 1 19 Bible Online

Baga 1 19 - Lelemi bible

Baga 1 19

¹Amu na Ɔga Ahab ɔ́su ulekudi Isebel lɛla biala na Elia ɔ́bla ku kalɛ na ɔ́du Baal kenye bediene bammɔ ƒui.

²Mmɔ na Ahab ulekudi Isebel úti kenye úmene Elia ɔnini, “Asa na uteedu kɔnaadi ɔƒaalɛ bene si ńtaya na awɔ lɛnɔ ekpi aani bana kalɛ ni, na baƒiɔ bammɔ bani-mi kɔtu biala na baayɔ́.”

³Ɔmmɔ ɔsu ka Elia únu kenye kammɔ ni, liƒu lɛ́da-nwu na úkeli ku nwuna kabla ɔblane kalɛ na balákɛ-nwu baládu. Na ka bédu Beer-Seba na Yuda kalɔ kemmo ni, ɔ́da-nwu ɔ́kya mmɔ,

⁴na anwu lɛti ɔ́sɔ úsie limeyi linwi ulu na ɔkɛ ketele kalɔ kakwiidi kemmo. Na ka úbedu kugyii kɔdi kalɔ ni, ɔ́yu úlie kalɔ mmɔ na ɔ́kpali Katɔti úvele ka ɔya na ukpi. Na ɔ́su ɔnini, “Lɛ́ɛnɔku-ni. Ƒɔ-mi ngba, ɔsika lɛɛɛdia liiitulo mina bati kuuku.”

⁵Ka ɔ́wɔlɔ ni, ɔ́sɔ ɔ́tɛ kugyii kɔmmɔ kalɔ na ɔ́lɛɛ. Kɔnakunwi ni, Katɔti ɔtu ɔdi útuku-nwu na ɔ́su-nwu ɔnini, “Ta na adi.”

⁶Na ka ɔ́ta ni, ɔ́tɛ anu. Na ka ɔ́nu nwuna eli kakɛ ni, bodobodo ɔni béƒi-nwu na uuƒí ku ntu ɔsii ɔdi ɔlɛ mmɔ. Mmɔ na ɔ́di na ɔ́ni na ɔ́sɔ ɔ́yu ɔ́tɛ.

⁷Amu na Unwoti ɔtu ɔmmɔ ɔ́sɔ úbo kunyɔdi na ɔ́gyila-nwu. Na ɔ́su-nwu ɔnini, “Ta na adi, ɔsika ulu busie bɔmmɔ bɔ́gyu-ɔ bɔ́gya.”

⁸Anwuɔsu ɔ́ta na ɔ́di na ɔ́ni. Na ka adila ammɔ ákya-nwu ɔkplu ni, úsie lɛgba usien ku ɔƒɛ emeyi aavlene útédu ka údu Katɔti kɔbi kɔni baalɔ banii Horeb.

⁹Mmɔ na útéduo lɛtakpɛ ubu ɔdi kemmo na ɔ́tɛ mmɔ usien umodi ɔmmɔ. Amu na Unwoti úye-nwu ɔnini, “Elia, bi na aabla mɛni?”

¹⁰Amu na Elia údie kenye ɔnini, “Lɛ́sia anu kpakplaa na lɛ́kpa Unwoti Ɔyikune Ƒui uwi biala. Na Israelƒuɔ béni ƒula bunyimi na bábwɛ ƒula akpabi. Na bádu ƒula kenye bediene ƒui ku lɛkɛɛ, na ami lɛti nébu. Na ɔƒaani benye baawia kuƒi ka badu ami lɛnɔ.”

¹¹Amu na Unwoti údie kenye ɔnini, “Lɛ ténye kɔbi kɔmmɔ lɛlɔ na Unwoti anumi. Ɔsika Unwoti ɔdubo ubasia mmɔ ɔvi.” Amu na ɔƒɛƒɛɛ ubendi ɔdi úkpo, na úle kɔbi kɔmmɔ kemmo inyɔ, na úgyingya atakpɛ ammɔ na Unwoti anumi. Nsu Unwoti uuubo ɔƒɛƒɛɛ ɔmmɔ kemmo. Na ɔƒɛƒɛɛ ɔmmɔ kama ni, kalɔ kákunku, nsu Unwoti uuubo kalɔ bɔkunku bɔmmɔ kemmo.

¹²Na kalɔ bɔkunku bɔmmɔ kama ni, lɛgyavonku lɛ́bwɛ lɛ́lɛ, nsu Unwoti uuubo ogya ɔmmɔ kemmo. Na ogya ɔmmɔ kama ni, únu butemi bɔdi ku kabɛnsɛ.

¹³Na ka Elia únu lɛdi lɛmmɔ ni, ɔni nwuna awu ɔtɔdi úbi anumi na ɔ́lɛ úténye ubu ɔmmɔ kenye. Mmɔ na lɛdi lɛmmɔ líye Elia ɔnini, “Bi na aabla mɛni?”

¹⁴Amu na Elia údie kenye ɔnini, “Uwi biala ni, mɔɔkpá awɔ Unwoti Ɔyikune Ƒui, na Israelƒuɔ béni ƒula bunyimi na bábwɛ ƒula akpabi na bádu ƒula kenye bediene ƒui ku lɛkɛɛ, na ami kani nébu. Na ɔƒaani benye baawia kuƒi ka badu ami lɛnɔ.”

¹⁵Amu na Unwoti ɔ́su Elia ɔnini, “Nwini na atásia ulu ɔni na akɛ ébo. Na eteesie Damasko ketele kalɔ kakwiidi kemmo. Na si édu mmɔ ni, na ewi Hasael lili nnɔmii na ese-nwu Siriaƒuɔ ɔga.

¹⁶Na ewi Nimsi ubidi Yehu lɛnɔ nnɔmii lili na ese-nwu Israelƒuɔ ɔga. Na ewi Saƒat ubidi Elisa ɔni na ɔ́si Abel-Mehola nnɔmii lili na uti-ɔ kenyekɔ aani kenye udiene kalɛ.

¹⁷Na Yehu ɔdubɔdu ukyuli biala na úkeli na útekpi na Hasael ɔkɛɛ kenye. Na Elisa ɔdubɔdu ukyuli biala na úkeli na útekpi na Yehu ɔkɛɛ kenye.

¹⁸Nsu lídie Israelƒuɔ bekyuli mpim maatɛ bani nátalɛ akɔnkɔ bétete Baal iye bakya-nwu kɔgbu.”

¹⁹Anwuɔsu Elia ɔ́tɔlɔ mmɔ na útánu Saƒat ubidi Elisa na kemo kadi ka bébo anwami báda ɔmantɛ bakɔ inyɔ akpa leevu-anyɔ. Na Elisa ɔda lɛkpa leevu-linyɔdi na baatu kalɔ teenwini. Amu na Elia úsie-nwu kudɔ mmɔ, ka úti nwuna lɛduni lɛni na ɔda úbo úwi-nwu lɛlɔ.

²⁰Amu na Elisa lɛnɔ ɔ́da nwuna ɔmantɛ bakɔ bammɔ ɔ́nyonu na ɔbi ɔ́siaku Elia na ɔ́su-nwu ɔnini, “Ya na lisie na ntákada mina bawɔne asa bɔtɔlɔ.” Amu na Elia údie kenye ɔnini, “Teesie, nsu bla kasusu na lɛla lɛni na lɛ́bla-a lɛlɔ.”

²¹Amu na Elisa únwini úsie nwuna ɔmantɛ bakɔ kudɔ na ɔ́du-ma, na úti ala ani na úbo ɔ́da-ma mmɔ ɔ́bla ekyweni na úti úƒulo lɛna lɛmmɔ. Na úti lɛna lɛmmɔ úte nwuna bekyuli na bákun. Na ɔmmɔ kama ni, Elisa únwini útásiaku Elia kama aani nwuna ubunkune kalɛ.