Read Lelemi Baga 1 4 Bible Online

Baga 1 4 - Lelemi bible

Baga 1 4

¹Anwuɔsu Salomo ɔ́di lɛga na Israel kalɔ lɛlɔ ƒui.

²Na nwuna kabla bablane ku aban bagadine bani na údie anyi ndi amɛni, ɔkpane Sadok ubidi Asaria,

³Sisa bebi Elihoreƒ ku Ahia bani ndi lɛku benwenine ku Ahilud ubidi Yehosaƒat ɔni mɔɔnu ekposela kɔkunkɛ lɛlɔ,

⁴ku Yoiada ubidi Benaia ɔni na bábla bekpone batɔnkune unengu ku Sadok ku Abiatar bani ndi bakpane.

⁵Na Natan ubidi Asaria mɔɔnu kɔlɛkɛ kɔmmɔ aban bagadine lɛlɔ. Na Natan ubidi Sabud ndi ɔkpane ku ɔga kasusu ɔkyane.

⁶Na Ahisar ndi ɔga kaduli lɛlɔ ɔnune. Na Abda ubidi Adoniram ndi kabla kpakplaa bablane unengu.

⁷Na Salomo ubo kɔlɛkɛ leevu-inyɔ aban bagadine na Israel kalɔ ƒui. Na ama mɔɔwia adila teeboku ɔga ku ɔga kaduli bekyuli. Na ɔlɛka ɔdi biala ɔwia kɔbuli kunwi adila na lɛkwa kemmo.

⁸Na bagadine bammɔ anyi ndi bamɛni. Ben-Hur ɔni mɔɔnu Eƒraim kalɛkɛ abi lɛma kalɛkɔ lɛlɔ.

⁹Na Ben-Deker mɔɔnu Makas ku Saalbim ku Bet-Semes ku Elon-Bet-Hanan lɛma lɛlɔ.

¹⁰Na Ben-Hesed mɔɔnu Arubot ku Soko ku Heƒer kalɛkɛ lɛlɔ.

¹¹Na Ben-Abinadab ɔni néti Salomo ubidi ulekubi Taƒat mɔɔnu Naƒat-Dor kalɛkɛ ƒui lɛlɔ.

¹²Na Ahilud ubidi Baana mɔɔnu Taanak ku Megido ku Bet-San ɔni nde Sartan na Yesreel kada kakɛ lɛlɔ. Na ɔdanku ɔ́si Bet-San útédu Abel-Mehola na ɔ́via útédu Yokmeam.

¹³Na Ben-Geber mɔɔnu Ramot-Gilead kalɛkɛ lɛlɔ ku Manase ubidi Yair akpaklɔ lɛma lɛni nkya Gilead mmɔ ku Argob kalɔ kani nkya Basan kalɛkɛ. Na lɛma lɛmmɔ ƒui lɛdi liti ku leevu. Na bátu awodu bámana-nya. Na béti abuala egyiedi bábla-ni kɔyakun.

¹⁴Na Ido ubidi Abinadab mɔɔnu Mahanaim lɛlɔ.

¹⁵Na Ahimaas mɔɔnu Naƒtali lɛlɔ. Na anwu néti Salomo ubidi ulekubi Basmat.

¹⁶Na Husai ubidi Baana mɔɔnu Aser ku Alot lɛlɔ.

¹⁷Na Parua ubidi Yehosaƒat mɔɔnu Isakar lɛlɔ.

¹⁸Na Ela ubidi Simei mɔɔnu Benyamin lɛlɔ.

¹⁹Na Uri ubidi Geber mɔɔnu Gilead kalɔ lɛlɔ ku Sihon ɔni ndi Amoriƒuɔ ɔga ku Og ɔni ndi Basanƒuɔ ɔga kɔlɔ lɛlɔ. Na anwu kani ndi aban ɔgadine na mmɔ ƒui.

²⁰Na Yudaƒuɔ ku Israelƒuɔ bemomo aani ɛpu kɔnwinimi na bádi na báni na bákɛ ebiti.

²¹Na Salomo ɔ́di kɔlɔ kɔmmɔ ƒui lɛlɔ. Ɔ́si Euƒrate Ketu ɔkɛ Ƒilisti útédu Egyipteƒuɔ ɔmii. Na kɔlɔ kɔmmɔ bekyuli beeyi kuyi teete Ɔga Salomo. Na bákya-nwu kalɔ nwuna ngba bulie uwi ƒui.

²²Na ala ani na Salomo ɔɔwia ɔsiku kadi bekyuli bammɔ kudɔ limeyi ndi limeyi adi, bodobodo ɔlaaƒɔ akyami eti atɛ ku antabi ɔlaaƒɔ akyami eti aku

²³ku ɔmantɛ bakɔ leevu ku bakɔ badi aavlanyɔ ku baƒonu eti anyɔ ku bese lɛnɔ eti anyɔ ku bakwa ku bebuo bamba lidu ku bakɔkɔ bani nélie lɛmwi.

²⁴Na úbo-ma ɔda ɔmɛni, ɔsika anwu mɔɔdi lɛgakɔdikɔ kɔni ƒui nkya ketu kammɔ ɔƒɛ kanukɔ kakɛ ɔ́si Tiƒsa úbedu Gasa lɛlɔ. Na bekyuli bákɛ atu bɔyɔ.

²⁵Na Salomo ngba bulie uwi ƒui ni, Yuda ku Israel ɔ́si Dan útédu Beer-Seba ni, bana ƒui bélie ku keyi buɛɛ na ɔdi biala ɔ́di nwuna adingyii mmo ebi ku atu bɔyɔ.

²⁶Na uwi ɔmmɔ ni, Salomo ubo kɔkyakɔ mpim ine ute bapɔnkɔ bani mɔɔní kɛɛkɛ ku bapɔnkɔ bamba mpim leevu-inyɔ.

²⁷Na kɔlɛkɛ kɔmmɔ lɛlɔ banune ɔdi biala úti ɔ́sia lɛlɔ na uute ala ani ƒui na ɔga ku bekyuli bani muubo-nwu kudɔ taabadi baawia na kɔbuli kɔni na béle béte ɔdi biala kemmo na ɔdi útayaki lɛla lɛdi.

²⁸Na lɛni kani na beeboku bapɔnkɔ bani mɔɔní kɛɛkɛ mmɔ alakpi ku bapɔnkɔ bamba ku alakpi ani lɛlɔ na batɛ kalɛ na ɔdi ka ɔdi biala ute.

²⁹Katɔti úte Salomo lɛnunda ku ala kemmo bɔnu taati ku lɛlati lɛni neeebo bɔkɔku aani kalɛ na ɛpu kɔnwinimi kuse kalɛ.

³⁰Na Salomo lɛnunda litulo lɛnunda lɛni na banana bani ƒui na bakya kalɔ kammɔ ɔ́ƒɛ kanukɔ ku Egyipte ƒui bebo.

³¹Na nwuna lɛnunda litulo ukyuli biala ku Etan ɔni ndi Esrahini lɛdi. Na ɔ́da anu utulo Heman ku Kalkol ku Darda bani ndi Mahol bebi. Na nwuna lɛnyi lígyingya lítédu kadi bamba lɛma lɛni nkya amadɔ mmɔ ƒui.

³²Ɔga Salomo úbo agba mpim eti aku na ɔ́tu lɛnu lidu lidu apim ku ɛlɔ.

³³Na ɔ́tɛmi ɔ́siku egyii lidu lidu ngba lɛlɔ ɔ́si sida egyii ani nkya Lebanon ku alakpi ani baalɔ hisope na aakwɛ́ na awodu lɛlɔ. Na ɔ́sɔ ɔ́tina ala ɔ́siku bebuo ku baasɛ ku kɔkpaku ku bebuo bani mɔɔkpɛ́ kaƒɔ lɛlɔ lɛnɔ lɛlɔ.

³⁴Na kayawi baga ƒui baatala bekyuli na beesié teeténu Ɔga Salomo lɛnunda etemila ani na ɔɔtɛmi.